| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
৫. সত্তক্খত্তুপরমকথাৰণ্ণনা
5. Sattakkhattuparamakathāvaṇṇanā
৬৪১-৬৪৫. সত্তক্খত্তুপরমতানিযতোতি সত্তক্খত্তুপরমতায নিযতো। ইমং ৰিভাগন্তি ইমং ৰিসেসং। ত্ৰং পনস্স নিযামং ইচ্ছসীতি অৰিনিপাতধম্মতাফলপ্পত্তীহি অঞ্ঞস্মিং সত্তক্খত্তুপরমভাৰে চ নিযামং ইচ্ছসীতি অত্থো।
641-645. Sattakkhattuparamatāniyatoti sattakkhattuparamatāya niyato. Imaṃ vibhāganti imaṃ visesaṃ. Tvaṃ panassa niyāmaṃ icchasīti avinipātadhammatāphalappattīhi aññasmiṃ sattakkhattuparamabhāve ca niyāmaṃ icchasīti attho.
আনন্তরিযাভাৰন্তি যেন সো ধম্মাভিসমযেন ভব্বো নাম হোতি, তস্স আনন্তরিযকম্মস্স অভাৰন্তি অত্থো, পুগ্গলস্স ৰা আনন্তরিযভাৰস্স অভাৰন্তি। কিং পন সো অন্তরাধম্মং অভিসমিস্সতীতি? কেচি ৰদন্তি ‘‘সত্তক্খত্তুপরমো সত্তমং ভৰং নাতিক্কমতি, ওরতো পন নত্থি পটিসেধো’’তি। অপরে ‘‘যো ভগৰতা ঞাণবলেন ব্যাকতো, তস্স অন্তরা অভিসমযো নাম নত্থি, তথাপি ভৰনিযামস্স কস্সচি অভাৰা ভব্বোতি ৰুচ্চতি। যথা কুসলা অভিঞ্ঞাচেতনা কদাচি ৰিপাকং অদদমানাপি সতি কারণে দাতুং ভব্বতায ৰিপাকধম্মধম্মা নাম, তথা ইন্দ্রিযানং মুদুতায সত্তক্খত্তুপরমো, ন নিযামসব্ভাৰা নাপি ভগৰতা ব্যাকতত্তা, ন চ ইন্দ্রিযমুদুতা অভব্বতাকরো ধম্মোতি ন সো অভব্বো নাম। অভব্বতাকরধম্মাভাৰতো চেত্থ অভব্বতা পটিসেধিতা, ন পন অন্তরা অভিসমেতুং ভব্বতা ৰুত্তা। যদি চ সত্তক্খত্তুপরমো অন্তরা অভিসমেয্য, কোলংকোলো সিযা’’তি। ৰিসেসং পন অকত্ৰা ভব্বসভাৰতায ভব্বোতি ৰত্তুং যুত্তং। ন ভৰনিযামকং কিঞ্চীতি এত্থ পস্সিত্ৰাতি ৰচনসেসো, ব্যাকরোতীতি ৰা সম্বন্ধো।
Ānantariyābhāvanti yena so dhammābhisamayena bhabbo nāma hoti, tassa ānantariyakammassa abhāvanti attho, puggalassa vā ānantariyabhāvassa abhāvanti. Kiṃ pana so antarādhammaṃ abhisamissatīti? Keci vadanti ‘‘sattakkhattuparamo sattamaṃ bhavaṃ nātikkamati, orato pana natthi paṭisedho’’ti. Apare ‘‘yo bhagavatā ñāṇabalena byākato, tassa antarā abhisamayo nāma natthi, tathāpi bhavaniyāmassa kassaci abhāvā bhabboti vuccati. Yathā kusalā abhiññācetanā kadāci vipākaṃ adadamānāpi sati kāraṇe dātuṃ bhabbatāya vipākadhammadhammā nāma, tathā indriyānaṃ mudutāya sattakkhattuparamo, na niyāmasabbhāvā nāpi bhagavatā byākatattā, na ca indriyamudutā abhabbatākaro dhammoti na so abhabbo nāma. Abhabbatākaradhammābhāvato cettha abhabbatā paṭisedhitā, na pana antarā abhisametuṃ bhabbatā vuttā. Yadi ca sattakkhattuparamo antarā abhisameyya, kolaṃkolo siyā’’ti. Visesaṃ pana akatvā bhabbasabhāvatāya bhabboti vattuṃ yuttaṃ. Na bhavaniyāmakaṃ kiñcīti ettha passitvāti vacanaseso, byākarotīti vā sambandho.
সত্তক্খত্তুপরমকথাৰণ্ণনা নিট্ঠিতা।
Sattakkhattuparamakathāvaṇṇanā niṭṭhitā.
দ্ৰাদসমৰগ্গৰণ্ণনা নিট্ঠিতা।
Dvādasamavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১২০) ৫. সত্তক্খত্তুপরমকথা • (120) 5. Sattakkhattuparamakathā
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৫. সত্তক্খত্তুপরমকথাৰণ্ণনা • 5. Sattakkhattuparamakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৫. সত্তক্খত্তুপরমকথাৰণ্ণনা • 5. Sattakkhattuparamakathāvaṇṇanā
