| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៥. សត្តក្ខត្តុបរមកថាវណ្ណនា
5. Sattakkhattuparamakathāvaṇṇanā
៥៤១-៥៤៥. ឥទានិ សត្តក្ខត្តុបរមកថា នាម ហោតិ, តត្ថ យស្មា ‘‘សត្តក្ខត្តុបរមោ’’តិ វុត្តំ, តស្មា ‘‘សត្តក្ខត្តុបរមោ បុគ្គលោ សត្តក្ខត្តុបរមតាយ និយតោ’’តិ យេសំ លទ្ធិ, សេយ្យថាបិ ឧត្តរាបថកានំ; តេសំ ឋបេត្វា ‘‘អរិយមគ្គំ អញ្ញោ តស្ស និយមោ នត្ថិ, យេន សោ សត្តក្ខត្តុបរមតាយ និយតោ ភវេយ្យា’’តិ ឥមំ វិភាគំ ទស្សេតុំ បុច្ឆា សកវាទិស្ស, បដិញ្ញា ឥតរស្ស។
641-645. Idāni sattakkhattuparamakathā nāma hoti, tattha yasmā ‘‘sattakkhattuparamo’’ti vuttaṃ, tasmā ‘‘sattakkhattuparamo puggalo sattakkhattuparamatāya niyato’’ti yesaṃ laddhi, seyyathāpi uttarāpathakānaṃ; tesaṃ ṭhapetvā ‘‘ariyamaggaṃ añño tassa niyamo natthi, yena so sattakkhattuparamatāya niyato bhaveyyā’’ti imaṃ vibhāgaṃ dassetuṃ pucchā sakavādissa, paṭiññā itarassa.
មាតា ជីវិតាតិអាទីសុ អយមធិប្បាយោ – ទ្វេ និយាមា សម្មត្តនិយាមោ ច មិច្ឆត្តនិយាមោ ច។ សម្មត្តនិយាមោ អរិយមគ្គោ។ សោ អវិនិបាតធម្មតញ្ចេវ ផលុប្បត្តិញ្ច និយមេតិ។ មិច្ឆត្តនិយាមោ អានន្តរិយកម្មំ។ តំ អនន្តរា និរយូបបត្តិំ និយមេតិ។ តត្ថ សត្តក្ខត្តុបរមោ សោតាបត្តិមគ្គេន អវិនិបាតធម្មតាយ ច ផលុប្បត្តិយា ច និយមិតោ។ សេសមគ្គនិយាមោ បនស្ស នត្ថិ អនធិគតត្តា, អានន្តរិយម្បិ កាតុំ សោ អភព្ពោ។ ត្វំ បនស្ស និយាមំ ឥច្ឆសិ, តេន តំ វទាម – ‘‘កិំ តេ សោ ឥមិនា មិច្ឆត្តនិយាមេន និយមិតោ’’តិ។
Mātā jīvitātiādīsu ayamadhippāyo – dve niyāmā sammattaniyāmo ca micchattaniyāmo ca. Sammattaniyāmo ariyamaggo. So avinipātadhammatañceva phaluppattiñca niyameti. Micchattaniyāmo ānantariyakammaṃ. Taṃ anantarā nirayūpapattiṃ niyameti. Tattha sattakkhattuparamo sotāpattimaggena avinipātadhammatāya ca phaluppattiyā ca niyamito. Sesamagganiyāmo panassa natthi anadhigatattā, ānantariyampi kātuṃ so abhabbo. Tvaṃ panassa niyāmaṃ icchasi, tena taṃ vadāma – ‘‘kiṃ te so iminā micchattaniyāmena niyamito’’ti.
អភព្ពោ អន្តរាតិ បញ្ហេសុ អានន្តរិយាភាវំ សន្ធាយ បដិក្ខិបតិ, សត្តក្ខត្តុបរមំ សន្ធាយ បដិជានាតិ។ អត្ថិ សោ និយាមោតិ បញ្ហេ សត្តក្ខត្តុបរមតាយ និយាមំ អបស្សន្តោ បដិក្ខិបតិ។ អត្ថិ តេ សតិបដ្ឋានាតិអាទិ និយាមសង្ខាតេ មគ្គធម្មេ ទស្សេតុំ វុត្តំ។ តស្ស បន បុន បឋមមគ្គានុប្បត្តិតោ តេបិ នត្ថិ, តស្មា បដិក្ខិបតិ។ សេសមេត្ថ ឧត្តានត្ថមេវ។ ននុ សោ សត្តក្ខត្តុបរមោតិ ឯត្ថ ភគវា ‘‘អយំ បុគ្គលោ ឯត្តកេ ភវេ សន្ធាវិត្វា បរិនិព្ពាយិស្សតិ, អយំ ឯត្តកេ’’តិ អត្តនោ ញាណពលេន ព្យាករោតិ, ន ភវនិយាមំ នាម កិញ្ចិ តេន សត្តក្ខត្តុបរមោ, កោលំកោលោ, ឯកពីជី វាតិ វុត្តំ, តស្មា អសាធកមេតន្តិ។
Abhabbo antarāti pañhesu ānantariyābhāvaṃ sandhāya paṭikkhipati, sattakkhattuparamaṃ sandhāya paṭijānāti. Atthi so niyāmoti pañhe sattakkhattuparamatāya niyāmaṃ apassanto paṭikkhipati. Atthi te satipaṭṭhānātiādi niyāmasaṅkhāte maggadhamme dassetuṃ vuttaṃ. Tassa pana puna paṭhamamaggānuppattito tepi natthi, tasmā paṭikkhipati. Sesamettha uttānatthameva. Nanu so sattakkhattuparamoti ettha bhagavā ‘‘ayaṃ puggalo ettake bhave sandhāvitvā parinibbāyissati, ayaṃ ettake’’ti attano ñāṇabalena byākaroti, na bhavaniyāmaṃ nāma kiñci tena sattakkhattuparamo, kolaṃkolo, ekabījī vāti vuttaṃ, tasmā asādhakametanti.
សត្តក្ខត្តុបរមកថាវណ្ណនា។
Sattakkhattuparamakathāvaṇṇanā.
៦៤៦-៦៤៧. កោលំកោលឯកពីជិកថាយោបិ ឥមិនាវុបាយេន វេទិតព្ពា។
646-647. Kolaṃkolaekabījikathāyopi imināvupāyena veditabbā.
កោលំកោលឯកពីជិកថាវណ្ណនា។
Kolaṃkolaekabījikathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi
(១២០) ៥. សត្តក្ខត្តុបរមកថា • (120) 5. Sattakkhattuparamakathā
(១២១) ៦. កោលង្កោលកថា • (121) 6. Kolaṅkolakathā
(១២២) ៧. ឯកពីជីកថា • (122) 7. Ekabījīkathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៥. សត្តក្ខត្តុបរមកថាវណ្ណនា • 5. Sattakkhattuparamakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៥. សត្តក្ខត្តុបរមកថាវណ្ណនា • 5. Sattakkhattuparamakathāvaṇṇanā
