| Library / Tipiṭaka / តិបិដក • Tipiṭaka / បញ្ចបករណ-មូលដីកា • Pañcapakaraṇa-mūlaṭīkā |
៥. សត្តក្ខត្តុបរមកថាវណ្ណនា
5. Sattakkhattuparamakathāvaṇṇanā
៦៤១-៦៤៥. សត្តក្ខត្តុបរមតានិយតោតិ សត្តក្ខត្តុបរមតាយ និយតោ។ ឥមំ វិភាគន្តិ ឥមំ វិសេសំ។ ត្វំ បនស្ស និយាមំ ឥច្ឆសីតិ អវិនិបាតធម្មតាផលប្បត្តីហិ អញ្ញស្មិំ សត្តក្ខត្តុបរមភាវេ ច និយាមំ ឥច្ឆសីតិ អត្ថោ។
641-645. Sattakkhattuparamatāniyatoti sattakkhattuparamatāya niyato. Imaṃ vibhāganti imaṃ visesaṃ. Tvaṃ panassa niyāmaṃ icchasīti avinipātadhammatāphalappattīhi aññasmiṃ sattakkhattuparamabhāve ca niyāmaṃ icchasīti attho.
អានន្តរិយាភាវន្តិ យេន សោ ធម្មាភិសមយេន ភព្ពោ នាម ហោតិ, តស្ស អានន្តរិយកម្មស្ស អភាវន្តិ អត្ថោ, បុគ្គលស្ស វា អានន្តរិយភាវស្ស អភាវន្តិ។ កិំ បន សោ អន្តរាធម្មំ អភិសមិស្សតីតិ? កេចិ វទន្តិ ‘‘សត្តក្ខត្តុបរមោ សត្តមំ ភវំ នាតិក្កមតិ, ឱរតោ បន នត្ថិ បដិសេធោ’’តិ។ អបរេ ‘‘យោ ភគវតា ញាណពលេន ព្យាកតោ, តស្ស អន្តរា អភិសមយោ នាម នត្ថិ, តថាបិ ភវនិយាមស្ស កស្សចិ អភាវា ភព្ពោតិ វុច្ចតិ។ យថា កុសលា អភិញ្ញាចេតនា កទាចិ វិបាកំ អទទមានាបិ សតិ ការណេ ទាតុំ ភព្ពតាយ វិបាកធម្មធម្មា នាម, តថា ឥន្ទ្រិយានំ មុទុតាយ សត្តក្ខត្តុបរមោ, ន និយាមសព្ភាវា នាបិ ភគវតា ព្យាកតត្តា, ន ច ឥន្ទ្រិយមុទុតា អភព្ពតាករោ ធម្មោតិ ន សោ អភព្ពោ នាម។ អភព្ពតាករធម្មាភាវតោ ចេត្ថ អភព្ពតា បដិសេធិតា, ន បន អន្តរា អភិសមេតុំ ភព្ពតា វុត្តា។ យទិ ច សត្តក្ខត្តុបរមោ អន្តរា អភិសមេយ្យ, កោលំកោលោ សិយា’’តិ។ វិសេសំ បន អកត្វា ភព្ពសភាវតាយ ភព្ពោតិ វត្តុំ យុត្តំ។ ន ភវនិយាមកំ កិញ្ចីតិ ឯត្ថ បស្សិត្វាតិ វចនសេសោ, ព្យាករោតីតិ វា សម្ពន្ធោ។
Ānantariyābhāvanti yena so dhammābhisamayena bhabbo nāma hoti, tassa ānantariyakammassa abhāvanti attho, puggalassa vā ānantariyabhāvassa abhāvanti. Kiṃ pana so antarādhammaṃ abhisamissatīti? Keci vadanti ‘‘sattakkhattuparamo sattamaṃ bhavaṃ nātikkamati, orato pana natthi paṭisedho’’ti. Apare ‘‘yo bhagavatā ñāṇabalena byākato, tassa antarā abhisamayo nāma natthi, tathāpi bhavaniyāmassa kassaci abhāvā bhabboti vuccati. Yathā kusalā abhiññācetanā kadāci vipākaṃ adadamānāpi sati kāraṇe dātuṃ bhabbatāya vipākadhammadhammā nāma, tathā indriyānaṃ mudutāya sattakkhattuparamo, na niyāmasabbhāvā nāpi bhagavatā byākatattā, na ca indriyamudutā abhabbatākaro dhammoti na so abhabbo nāma. Abhabbatākaradhammābhāvato cettha abhabbatā paṭisedhitā, na pana antarā abhisametuṃ bhabbatā vuttā. Yadi ca sattakkhattuparamo antarā abhisameyya, kolaṃkolo siyā’’ti. Visesaṃ pana akatvā bhabbasabhāvatāya bhabboti vattuṃ yuttaṃ. Na bhavaniyāmakaṃ kiñcīti ettha passitvāti vacanaseso, byākarotīti vā sambandho.
សត្តក្ខត្តុបរមកថាវណ្ណនា និដ្ឋិតា។
Sattakkhattuparamakathāvaṇṇanā niṭṭhitā.
ទ្វាទសមវគ្គវណ្ណនា និដ្ឋិតា។
Dvādasamavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១២០) ៥. សត្តក្ខត្តុបរមកថា • (120) 5. Sattakkhattuparamakathā
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. សត្តក្ខត្តុបរមកថាវណ្ណនា • 5. Sattakkhattuparamakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៥. សត្តក្ខត្តុបរមកថាវណ្ណនា • 5. Sattakkhattuparamakathāvaṇṇanā
