| Library / Tipiṭaka / တိပိဋက • Tipiṭaka / ပဉ္စပကရဏ-အနုဋီကာ • Pañcapakaraṇa-anuṭīkā |
၅. သတ္တက္ခတ္တုပရမကထာဝဏ္ဏနာ
5. Sattakkhattuparamakathāvaṇṇanā
၆၄၁-၆၄၅. အသ္သာတိ ဣမသ္သ သတ္တက္ခတ္တုပရမသ္သ။ တေနာဟ ‘‘သတ္တက္ခတ္တုပရမဘာဝေ စ နိယာမံ ဣစ္ဆသီ’’တိ။ ယေန အာနန္တရိယကမ္မေန။ အန္တရာတိ သတ္တ ဘဝေ အနိဗ္ဗတ္တေတ္ဝာ တေသံ အန္တရေယေဝ။ ကေစီတိ အဘယဂိရိဝာသိနော။ အပရေတိ ပဒကာရာ။ တသ္သာတိ ယော သတ္တက္ခတ္တုပရမောတိ ဝာ, ကောလံကောလောတိ ဝာ, ဧကဗီဇီတိ ဝာ ဘဂဝတာ ဉာဏေန ပရိစ္ဆိန္ဒိတ္ဝာ ဗ္ယာကတော, တသ္သ ယထာဝုတ္တပရိစ္ဆေဒာ အန္တရာ ဥပရိမဂ္ဂာဓိဂမော နတ္ထိ အဝိတထဒေသနတ္တာ။ ယထာပရိစ္ဆေဒမေဝ တသ္သ အဘိသမယော, သ္ဝာယံ ဝိဘာဂော တေသံယေဝ ပုဂ္ဂလာနံ ဣန္ဒ္ရိယပရောပရိယတ္တေန ဝေဒိတဗ္ဗော ဘဝနိယာမေန တာဒိသသ္သ ကသ္သစိ အဘာဝတော။ ယသ္မာ ကသ္သစိ မုဒုကာနိပိ ဣန္ဒ္ရိယာနိ ပစ္စယဝိသေသေန တိက္ခဘာဝံ အာပဇ္ဇေယ္ယုံ, တသ္မာ တာဒိသံ သန္ဓာယ ‘‘ဘဗ္ဗောတိ ဝုစ္စတိ, န သော အဘဗ္ဗော နာမာ’’တိ စ ဝုတ္တံ။ ယသ္မာ ပန ဘဂဝာ န တာဒိသံ ‘‘သတ္တက္ခတ္တုပရမော’’တိအာဒိနာ နိယမေတ္ဝာ ဗ္ယာကရောတိ, တသ္မာ အာဟ ‘‘န ပန အန္တရာ အဘိသမေတုံ ဘဗ္ဗတာ ဝုတ္တာ’’တိ။ အယဉ္စ နယော ဧကန္တေန ဣစ္ဆိတဗ္ဗော။ အညထာ ပုဂ္ဂလသ္သ သင္ကရော သိယာတိ ဒသ္သေန္တော ‘‘ယဒိ စာ’’တိအာဒိမာဟ။
641-645. Assāti imassa sattakkhattuparamassa. Tenāha ‘‘sattakkhattuparamabhāve ca niyāmaṃ icchasī’’ti. Yena ānantariyakammena. Antarāti satta bhave anibbattetvā tesaṃ antareyeva. Kecīti abhayagirivāsino. Apareti padakārā. Tassāti yo sattakkhattuparamoti vā, kolaṃkoloti vā, ekabījīti vā bhagavatā ñāṇena paricchinditvā byākato, tassa yathāvuttaparicchedā antarā uparimaggādhigamo natthi avitathadesanattā. Yathāparicchedameva tassa abhisamayo, svāyaṃ vibhāgo tesaṃyeva puggalānaṃ indriyaparopariyattena veditabbo bhavaniyāmena tādisassa kassaci abhāvato. Yasmā kassaci mudukānipi indriyāni paccayavisesena tikkhabhāvaṃ āpajjeyyuṃ, tasmā tādisaṃ sandhāya ‘‘bhabboti vuccati, na so abhabbo nāmā’’ti ca vuttaṃ. Yasmā pana bhagavā na tādisaṃ ‘‘sattakkhattuparamo’’tiādinā niyametvā byākaroti, tasmā āha ‘‘na pana antarā abhisametuṃ bhabbatā vuttā’’ti. Ayañca nayo ekantena icchitabbo. Aññathā puggalassa saṅkaro siyāti dassento ‘‘yadi cā’’tiādimāha.
သတ္တက္ခတ္တုပရမကထာဝဏ္ဏနာ နိဋ္ဌိတာ။
Sattakkhattuparamakathāvaṇṇanā niṭṭhitā.
ဒ္ဝာဒသမဝဂ္ဂဝဏ္ဏနာ နိဋ္ဌိတာ။
Dvādasamavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၂၀) ၅. သတ္တက္ခတ္တုပရမကထာ • (120) 5. Sattakkhattuparamakathā
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၅. သတ္တက္ခတ္တုပရမကထာဝဏ္ဏနာ • 5. Sattakkhattuparamakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၅. သတ္တက္ခတ္တုပရမကထာဝဏ္ဏနာ • 5. Sattakkhattuparamakathāvaṇṇanā
