| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೫. ಸತ್ತಕ್ಖತ್ತುಪರಮಕಥಾವಣ್ಣನಾ
5. Sattakkhattuparamakathāvaṇṇanā
೫೪೧-೫೪೫. ಇದಾನಿ ಸತ್ತಕ್ಖತ್ತುಪರಮಕಥಾ ನಾಮ ಹೋತಿ, ತತ್ಥ ಯಸ್ಮಾ ‘‘ಸತ್ತಕ್ಖತ್ತುಪರಮೋ’’ತಿ ವುತ್ತಂ, ತಸ್ಮಾ ‘‘ಸತ್ತಕ್ಖತ್ತುಪರಮೋ ಪುಗ್ಗಲೋ ಸತ್ತಕ್ಖತ್ತುಪರಮತಾಯ ನಿಯತೋ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಉತ್ತರಾಪಥಕಾನಂ; ತೇಸಂ ಠಪೇತ್ವಾ ‘‘ಅರಿಯಮಗ್ಗಂ ಅಞ್ಞೋ ತಸ್ಸ ನಿಯಮೋ ನತ್ಥಿ, ಯೇನ ಸೋ ಸತ್ತಕ್ಖತ್ತುಪರಮತಾಯ ನಿಯತೋ ಭವೇಯ್ಯಾ’’ತಿ ಇಮಂ ವಿಭಾಗಂ ದಸ್ಸೇತುಂ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ।
641-645. Idāni sattakkhattuparamakathā nāma hoti, tattha yasmā ‘‘sattakkhattuparamo’’ti vuttaṃ, tasmā ‘‘sattakkhattuparamo puggalo sattakkhattuparamatāya niyato’’ti yesaṃ laddhi, seyyathāpi uttarāpathakānaṃ; tesaṃ ṭhapetvā ‘‘ariyamaggaṃ añño tassa niyamo natthi, yena so sattakkhattuparamatāya niyato bhaveyyā’’ti imaṃ vibhāgaṃ dassetuṃ pucchā sakavādissa, paṭiññā itarassa.
ಮಾತಾ ಜೀವಿತಾತಿಆದೀಸು ಅಯಮಧಿಪ್ಪಾಯೋ – ದ್ವೇ ನಿಯಾಮಾ ಸಮ್ಮತ್ತನಿಯಾಮೋ ಚ ಮಿಚ್ಛತ್ತನಿಯಾಮೋ ಚ। ಸಮ್ಮತ್ತನಿಯಾಮೋ ಅರಿಯಮಗ್ಗೋ। ಸೋ ಅವಿನಿಪಾತಧಮ್ಮತಞ್ಚೇವ ಫಲುಪ್ಪತ್ತಿಞ್ಚ ನಿಯಮೇತಿ। ಮಿಚ್ಛತ್ತನಿಯಾಮೋ ಆನನ್ತರಿಯಕಮ್ಮಂ। ತಂ ಅನನ್ತರಾ ನಿರಯೂಪಪತ್ತಿಂ ನಿಯಮೇತಿ। ತತ್ಥ ಸತ್ತಕ್ಖತ್ತುಪರಮೋ ಸೋತಾಪತ್ತಿಮಗ್ಗೇನ ಅವಿನಿಪಾತಧಮ್ಮತಾಯ ಚ ಫಲುಪ್ಪತ್ತಿಯಾ ಚ ನಿಯಮಿತೋ। ಸೇಸಮಗ್ಗನಿಯಾಮೋ ಪನಸ್ಸ ನತ್ಥಿ ಅನಧಿಗತತ್ತಾ, ಆನನ್ತರಿಯಮ್ಪಿ ಕಾತುಂ ಸೋ ಅಭಬ್ಬೋ। ತ್ವಂ ಪನಸ್ಸ ನಿಯಾಮಂ ಇಚ್ಛಸಿ, ತೇನ ತಂ ವದಾಮ – ‘‘ಕಿಂ ತೇ ಸೋ ಇಮಿನಾ ಮಿಚ್ಛತ್ತನಿಯಾಮೇನ ನಿಯಮಿತೋ’’ತಿ।
Mātā jīvitātiādīsu ayamadhippāyo – dve niyāmā sammattaniyāmo ca micchattaniyāmo ca. Sammattaniyāmo ariyamaggo. So avinipātadhammatañceva phaluppattiñca niyameti. Micchattaniyāmo ānantariyakammaṃ. Taṃ anantarā nirayūpapattiṃ niyameti. Tattha sattakkhattuparamo sotāpattimaggena avinipātadhammatāya ca phaluppattiyā ca niyamito. Sesamagganiyāmo panassa natthi anadhigatattā, ānantariyampi kātuṃ so abhabbo. Tvaṃ panassa niyāmaṃ icchasi, tena taṃ vadāma – ‘‘kiṃ te so iminā micchattaniyāmena niyamito’’ti.
ಅಭಬ್ಬೋ ಅನ್ತರಾತಿ ಪಞ್ಹೇಸು ಆನನ್ತರಿಯಾಭಾವಂ ಸನ್ಧಾಯ ಪಟಿಕ್ಖಿಪತಿ, ಸತ್ತಕ್ಖತ್ತುಪರಮಂ ಸನ್ಧಾಯ ಪಟಿಜಾನಾತಿ। ಅತ್ಥಿ ಸೋ ನಿಯಾಮೋತಿ ಪಞ್ಹೇ ಸತ್ತಕ್ಖತ್ತುಪರಮತಾಯ ನಿಯಾಮಂ ಅಪಸ್ಸನ್ತೋ ಪಟಿಕ್ಖಿಪತಿ। ಅತ್ಥಿ ತೇ ಸತಿಪಟ್ಠಾನಾತಿಆದಿ ನಿಯಾಮಸಙ್ಖಾತೇ ಮಗ್ಗಧಮ್ಮೇ ದಸ್ಸೇತುಂ ವುತ್ತಂ। ತಸ್ಸ ಪನ ಪುನ ಪಠಮಮಗ್ಗಾನುಪ್ಪತ್ತಿತೋ ತೇಪಿ ನತ್ಥಿ, ತಸ್ಮಾ ಪಟಿಕ್ಖಿಪತಿ। ಸೇಸಮೇತ್ಥ ಉತ್ತಾನತ್ಥಮೇವ। ನನು ಸೋ ಸತ್ತಕ್ಖತ್ತುಪರಮೋತಿ ಏತ್ಥ ಭಗವಾ ‘‘ಅಯಂ ಪುಗ್ಗಲೋ ಏತ್ತಕೇ ಭವೇ ಸನ್ಧಾವಿತ್ವಾ ಪರಿನಿಬ್ಬಾಯಿಸ್ಸತಿ, ಅಯಂ ಏತ್ತಕೇ’’ತಿ ಅತ್ತನೋ ಞಾಣಬಲೇನ ಬ್ಯಾಕರೋತಿ, ನ ಭವನಿಯಾಮಂ ನಾಮ ಕಿಞ್ಚಿ ತೇನ ಸತ್ತಕ್ಖತ್ತುಪರಮೋ, ಕೋಲಂಕೋಲೋ, ಏಕಬೀಜೀ ವಾತಿ ವುತ್ತಂ, ತಸ್ಮಾ ಅಸಾಧಕಮೇತನ್ತಿ।
Abhabbo antarāti pañhesu ānantariyābhāvaṃ sandhāya paṭikkhipati, sattakkhattuparamaṃ sandhāya paṭijānāti. Atthi so niyāmoti pañhe sattakkhattuparamatāya niyāmaṃ apassanto paṭikkhipati. Atthi te satipaṭṭhānātiādi niyāmasaṅkhāte maggadhamme dassetuṃ vuttaṃ. Tassa pana puna paṭhamamaggānuppattito tepi natthi, tasmā paṭikkhipati. Sesamettha uttānatthameva. Nanu so sattakkhattuparamoti ettha bhagavā ‘‘ayaṃ puggalo ettake bhave sandhāvitvā parinibbāyissati, ayaṃ ettake’’ti attano ñāṇabalena byākaroti, na bhavaniyāmaṃ nāma kiñci tena sattakkhattuparamo, kolaṃkolo, ekabījī vāti vuttaṃ, tasmā asādhakametanti.
ಸತ್ತಕ್ಖತ್ತುಪರಮಕಥಾವಣ್ಣನಾ।
Sattakkhattuparamakathāvaṇṇanā.
೬೪೬-೬೪೭. ಕೋಲಂಕೋಲಏಕಬೀಜಿಕಥಾಯೋಪಿ ಇಮಿನಾವುಪಾಯೇನ ವೇದಿತಬ್ಬಾ।
646-647. Kolaṃkolaekabījikathāyopi imināvupāyena veditabbā.
ಕೋಲಂಕೋಲಏಕಬೀಜಿಕಥಾವಣ್ಣನಾ।
Kolaṃkolaekabījikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi
(೧೨೦) ೫. ಸತ್ತಕ್ಖತ್ತುಪರಮಕಥಾ • (120) 5. Sattakkhattuparamakathā
(೧೨೧) ೬. ಕೋಲಙ್ಕೋಲಕಥಾ • (121) 6. Kolaṅkolakathā
(೧೨೨) ೭. ಏಕಬೀಜೀಕಥಾ • (122) 7. Ekabījīkathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೫. ಸತ್ತಕ್ಖತ್ತುಪರಮಕಥಾವಣ್ಣನಾ • 5. Sattakkhattuparamakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೫. ಸತ್ತಕ್ಖತ್ತುಪರಮಕಥಾವಣ್ಣನಾ • 5. Sattakkhattuparamakathāvaṇṇanā
