| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā |
೫. ಸತ್ತಕ್ಖತ್ತುಪರಮಕಥಾವಣ್ಣನಾ
5. Sattakkhattuparamakathāvaṇṇanā
೬೪೧-೬೪೫. ಸತ್ತಕ್ಖತ್ತುಪರಮತಾನಿಯತೋತಿ ಸತ್ತಕ್ಖತ್ತುಪರಮತಾಯ ನಿಯತೋ। ಇಮಂ ವಿಭಾಗನ್ತಿ ಇಮಂ ವಿಸೇಸಂ। ತ್ವಂ ಪನಸ್ಸ ನಿಯಾಮಂ ಇಚ್ಛಸೀತಿ ಅವಿನಿಪಾತಧಮ್ಮತಾಫಲಪ್ಪತ್ತೀಹಿ ಅಞ್ಞಸ್ಮಿಂ ಸತ್ತಕ್ಖತ್ತುಪರಮಭಾವೇ ಚ ನಿಯಾಮಂ ಇಚ್ಛಸೀತಿ ಅತ್ಥೋ।
641-645. Sattakkhattuparamatāniyatoti sattakkhattuparamatāya niyato. Imaṃ vibhāganti imaṃ visesaṃ. Tvaṃ panassa niyāmaṃ icchasīti avinipātadhammatāphalappattīhi aññasmiṃ sattakkhattuparamabhāve ca niyāmaṃ icchasīti attho.
ಆನನ್ತರಿಯಾಭಾವನ್ತಿ ಯೇನ ಸೋ ಧಮ್ಮಾಭಿಸಮಯೇನ ಭಬ್ಬೋ ನಾಮ ಹೋತಿ, ತಸ್ಸ ಆನನ್ತರಿಯಕಮ್ಮಸ್ಸ ಅಭಾವನ್ತಿ ಅತ್ಥೋ, ಪುಗ್ಗಲಸ್ಸ ವಾ ಆನನ್ತರಿಯಭಾವಸ್ಸ ಅಭಾವನ್ತಿ। ಕಿಂ ಪನ ಸೋ ಅನ್ತರಾಧಮ್ಮಂ ಅಭಿಸಮಿಸ್ಸತೀತಿ? ಕೇಚಿ ವದನ್ತಿ ‘‘ಸತ್ತಕ್ಖತ್ತುಪರಮೋ ಸತ್ತಮಂ ಭವಂ ನಾತಿಕ್ಕಮತಿ, ಓರತೋ ಪನ ನತ್ಥಿ ಪಟಿಸೇಧೋ’’ತಿ। ಅಪರೇ ‘‘ಯೋ ಭಗವತಾ ಞಾಣಬಲೇನ ಬ್ಯಾಕತೋ, ತಸ್ಸ ಅನ್ತರಾ ಅಭಿಸಮಯೋ ನಾಮ ನತ್ಥಿ, ತಥಾಪಿ ಭವನಿಯಾಮಸ್ಸ ಕಸ್ಸಚಿ ಅಭಾವಾ ಭಬ್ಬೋತಿ ವುಚ್ಚತಿ। ಯಥಾ ಕುಸಲಾ ಅಭಿಞ್ಞಾಚೇತನಾ ಕದಾಚಿ ವಿಪಾಕಂ ಅದದಮಾನಾಪಿ ಸತಿ ಕಾರಣೇ ದಾತುಂ ಭಬ್ಬತಾಯ ವಿಪಾಕಧಮ್ಮಧಮ್ಮಾ ನಾಮ, ತಥಾ ಇನ್ದ್ರಿಯಾನಂ ಮುದುತಾಯ ಸತ್ತಕ್ಖತ್ತುಪರಮೋ, ನ ನಿಯಾಮಸಬ್ಭಾವಾ ನಾಪಿ ಭಗವತಾ ಬ್ಯಾಕತತ್ತಾ, ನ ಚ ಇನ್ದ್ರಿಯಮುದುತಾ ಅಭಬ್ಬತಾಕರೋ ಧಮ್ಮೋತಿ ನ ಸೋ ಅಭಬ್ಬೋ ನಾಮ। ಅಭಬ್ಬತಾಕರಧಮ್ಮಾಭಾವತೋ ಚೇತ್ಥ ಅಭಬ್ಬತಾ ಪಟಿಸೇಧಿತಾ, ನ ಪನ ಅನ್ತರಾ ಅಭಿಸಮೇತುಂ ಭಬ್ಬತಾ ವುತ್ತಾ। ಯದಿ ಚ ಸತ್ತಕ್ಖತ್ತುಪರಮೋ ಅನ್ತರಾ ಅಭಿಸಮೇಯ್ಯ, ಕೋಲಂಕೋಲೋ ಸಿಯಾ’’ತಿ। ವಿಸೇಸಂ ಪನ ಅಕತ್ವಾ ಭಬ್ಬಸಭಾವತಾಯ ಭಬ್ಬೋತಿ ವತ್ತುಂ ಯುತ್ತಂ। ನ ಭವನಿಯಾಮಕಂ ಕಿಞ್ಚೀತಿ ಏತ್ಥ ಪಸ್ಸಿತ್ವಾತಿ ವಚನಸೇಸೋ, ಬ್ಯಾಕರೋತೀತಿ ವಾ ಸಮ್ಬನ್ಧೋ।
Ānantariyābhāvanti yena so dhammābhisamayena bhabbo nāma hoti, tassa ānantariyakammassa abhāvanti attho, puggalassa vā ānantariyabhāvassa abhāvanti. Kiṃ pana so antarādhammaṃ abhisamissatīti? Keci vadanti ‘‘sattakkhattuparamo sattamaṃ bhavaṃ nātikkamati, orato pana natthi paṭisedho’’ti. Apare ‘‘yo bhagavatā ñāṇabalena byākato, tassa antarā abhisamayo nāma natthi, tathāpi bhavaniyāmassa kassaci abhāvā bhabboti vuccati. Yathā kusalā abhiññācetanā kadāci vipākaṃ adadamānāpi sati kāraṇe dātuṃ bhabbatāya vipākadhammadhammā nāma, tathā indriyānaṃ mudutāya sattakkhattuparamo, na niyāmasabbhāvā nāpi bhagavatā byākatattā, na ca indriyamudutā abhabbatākaro dhammoti na so abhabbo nāma. Abhabbatākaradhammābhāvato cettha abhabbatā paṭisedhitā, na pana antarā abhisametuṃ bhabbatā vuttā. Yadi ca sattakkhattuparamo antarā abhisameyya, kolaṃkolo siyā’’ti. Visesaṃ pana akatvā bhabbasabhāvatāya bhabboti vattuṃ yuttaṃ. Na bhavaniyāmakaṃ kiñcīti ettha passitvāti vacanaseso, byākarotīti vā sambandho.
ಸತ್ತಕ್ಖತ್ತುಪರಮಕಥಾವಣ್ಣನಾ ನಿಟ್ಠಿತಾ।
Sattakkhattuparamakathāvaṇṇanā niṭṭhitā.
ದ್ವಾದಸಮವಗ್ಗವಣ್ಣನಾ ನಿಟ್ಠಿತಾ।
Dvādasamavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೨೦) ೫. ಸತ್ತಕ್ಖತ್ತುಪರಮಕಥಾ • (120) 5. Sattakkhattuparamakathā
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೫. ಸತ್ತಕ್ಖತ್ತುಪರಮಕಥಾವಣ್ಣನಾ • 5. Sattakkhattuparamakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೫. ಸತ್ತಕ್ಖತ್ತುಪರಮಕಥಾವಣ್ಣನಾ • 5. Sattakkhattuparamakathāvaṇṇanā
