| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
5. සත්‌තක්‌ඛත්‌තුපරමකථාවණ්‌ණනා
5. Sattakkhattuparamakathāvaṇṇanā
541-545. ඉදානි සත්‌තක්‌ඛත්‌තුපරමකථා නාම හොති, තත්‌ථ යස්‌මා ‘‘සත්‌තක්‌ඛත්‌තුපරමො’’ති වුත්‌තං, තස්‌මා ‘‘සත්‌තක්‌ඛත්‌තුපරමො පුග්‌ගලො සත්‌තක්‌ඛත්‌තුපරමතාය නියතො’’ති යෙසං ලද්‌ධි, සෙය්‍යථාපි උත්‌තරාපථකානං; තෙසං ඨපෙත්‌වා ‘‘අරියමග්‌ගං අඤ්‌ඤො තස්‌ස නියමො නත්‌ථි, යෙන සො සත්‌තක්‌ඛත්‌තුපරමතාය නියතො භවෙය්‍යා’’ති ඉමං විභාගං දස්‌සෙතුං පුච්‌ඡා සකවාදිස්‌ස, පටිඤ්‌ඤා ඉතරස්‌ස.
641-645. Idāni sattakkhattuparamakathā nāma hoti, tattha yasmā ‘‘sattakkhattuparamo’’ti vuttaṃ, tasmā ‘‘sattakkhattuparamo puggalo sattakkhattuparamatāya niyato’’ti yesaṃ laddhi, seyyathāpi uttarāpathakānaṃ; tesaṃ ṭhapetvā ‘‘ariyamaggaṃ añño tassa niyamo natthi, yena so sattakkhattuparamatāya niyato bhaveyyā’’ti imaṃ vibhāgaṃ dassetuṃ pucchā sakavādissa, paṭiññā itarassa.
මාතා ජීවිතාතිආදීසු අයමධිප්‌පායො – ද්‌වෙ නියාමා සම්‌මත්‌තනියාමො ච මිච්‌ඡත්‌තනියාමො ච. සම්‌මත්‌තනියාමො අරියමග්‌ගො. සො අවිනිපාතධම්‌මතඤ්‌චෙව ඵලුප්‌පත්‌තිඤ්‌ච නියමෙති. මිච්‌ඡත්‌තනියාමො ආනන්‌තරියකම්‌මං. තං අනන්‌තරා නිරයූපපත්‌තිං නියමෙති. තත්‌ථ සත්‌තක්‌ඛත්‌තුපරමො සොතාපත්‌තිමග්‌ගෙන අවිනිපාතධම්‌මතාය ච ඵලුප්‌පත්‌තියා ච නියමිතො. සෙසමග්‌ගනියාමො පනස්‌ස නත්‌ථි අනධිගතත්‌තා, ආනන්‌තරියම්‌පි කාතුං සො අභබ්‌බො. ත්‌වං පනස්‌ස නියාමං ඉච්‌ඡසි, තෙන තං වදාම – ‘‘කිං තෙ සො ඉමිනා මිච්‌ඡත්‌තනියාමෙන නියමිතො’’ති.
Mātā jīvitātiādīsu ayamadhippāyo – dve niyāmā sammattaniyāmo ca micchattaniyāmo ca. Sammattaniyāmo ariyamaggo. So avinipātadhammatañceva phaluppattiñca niyameti. Micchattaniyāmo ānantariyakammaṃ. Taṃ anantarā nirayūpapattiṃ niyameti. Tattha sattakkhattuparamo sotāpattimaggena avinipātadhammatāya ca phaluppattiyā ca niyamito. Sesamagganiyāmo panassa natthi anadhigatattā, ānantariyampi kātuṃ so abhabbo. Tvaṃ panassa niyāmaṃ icchasi, tena taṃ vadāma – ‘‘kiṃ te so iminā micchattaniyāmena niyamito’’ti.
අභබ්‌බො අන්‌තරාති පඤ්‌හෙසු ආනන්‌තරියාභාවං සන්‌ධාය පටික්‌ඛිපති, සත්‌තක්‌ඛත්‌තුපරමං සන්‌ධාය පටිජානාති. අත්‌ථි සො නියාමොති පඤ්‌හෙ සත්‌තක්‌ඛත්‌තුපරමතාය නියාමං අපස්‌සන්‌තො පටික්‌ඛිපති. අත්‌ථි තෙ සතිපට්‌ඨානාතිආදි නියාමසඞ්‌ඛාතෙ මග්‌ගධම්‌මෙ දස්‌සෙතුං වුත්‌තං. තස්‌ස පන පුන පඨමමග්‌ගානුප්‌පත්‌තිතො තෙපි නත්‌ථි, තස්‌මා පටික්‌ඛිපති. සෙසමෙත්‌ථ උත්‌තානත්‌ථමෙව. නනු සො සත්‌තක්‌ඛත්‌තුපරමොති එත්‌ථ භගවා ‘‘අයං පුග්‌ගලො එත්‌තකෙ භවෙ සන්‌ධාවිත්‌වා පරිනිබ්‌බායිස්‌සති, අයං එත්‌තකෙ’’ති අත්‌තනො ඤාණබලෙන බ්‍යාකරොති, න භවනියාමං නාම කිඤ්‌චි තෙන සත්‌තක්‌ඛත්‌තුපරමො, කොලංකොලො, එකබීජී වාති වුත්‌තං, තස්‌මා අසාධකමෙතන්‌ති.
Abhabbo antarāti pañhesu ānantariyābhāvaṃ sandhāya paṭikkhipati, sattakkhattuparamaṃ sandhāya paṭijānāti. Atthi so niyāmoti pañhe sattakkhattuparamatāya niyāmaṃ apassanto paṭikkhipati. Atthi te satipaṭṭhānātiādi niyāmasaṅkhāte maggadhamme dassetuṃ vuttaṃ. Tassa pana puna paṭhamamaggānuppattito tepi natthi, tasmā paṭikkhipati. Sesamettha uttānatthameva. Nanu so sattakkhattuparamoti ettha bhagavā ‘‘ayaṃ puggalo ettake bhave sandhāvitvā parinibbāyissati, ayaṃ ettake’’ti attano ñāṇabalena byākaroti, na bhavaniyāmaṃ nāma kiñci tena sattakkhattuparamo, kolaṃkolo, ekabījī vāti vuttaṃ, tasmā asādhakametanti.
සත්‌තක්‌ඛත්‌තුපරමකථාවණ්‌ණනා.
Sattakkhattuparamakathāvaṇṇanā.
646-647. කොලංකොලඑකබීජිකථායොපි ඉමිනාවුපායෙන වෙදිතබ්‌බා.
646-647. Kolaṃkolaekabījikathāyopi imināvupāyena veditabbā.
කොලංකොලඑකබීජිකථාවණ්‌ණනා.
Kolaṃkolaekabījikathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi
(120) 5. සත්‌තක්‌ඛත්‌තුපරමකථා • (120) 5. Sattakkhattuparamakathā
(121) 6. කොලඞ්‌කොලකථා • (121) 6. Kolaṅkolakathā
(122) 7. එකබීජීකථා • (122) 7. Ekabījīkathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 5. සත්‌තක්‌ඛත්‌තුපරමකථාවණ්‌ණනා • 5. Sattakkhattuparamakathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 5. සත්‌තක්‌ඛත්‌තුපරමකථාවණ්‌ණනා • 5. Sattakkhattuparamakathāvaṇṇanā
