| Library / Tipiṭaka / ཏིཔིཊཀ • Tipiṭaka / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā |
༧. སཏྟམནཡོ སམྤཡུཏྟེནཝིཔྤཡུཏྟཔདཝཎྞནཱ
7. Sattamanayo sampayuttenavippayuttapadavaṇṇanā
༣༠༦. སམྤཡུཏྟེནཝིཔྤཡུཏྟཔདནིདྡེསེ རཱུཔཀྑནྡྷཱདཡོ ཏེཧི སམྤཡུཏྟཱབྷཱཝཏོ ན གཧིཏཱ། སམུདཡསཙྩཱདཱིནི སཏིཔི ཏེཧི སམྤཡུཏྟེ, སམྤཡུཏྟེཧི ཙ ཝིཔྤཡུཏྟེ སམྤཡུཏྟེནཝིཔྤཡུཏྟཱནཾ ཁནྡྷཱདཱིཧི ཝིཔྤཡོགཱབྷཱཝཏོ། ན ཧི སམུདཡསཙྩེན སམྤཡུཏྟེཧི ལོབྷསཧགཏཙིཏྟུཔྤཱདེཧི ཝིཔྤཡུཏྟཱནཾ ཏཏོ ཨཉྙདྷམྨཱནཾ ཁནྡྷཱདཱིསུ ཀེནཙི ཝིཔྤཡོགོ ཨཏྠི། ནནུ ཙ ཏེ ཨེཝ ཙིཏྟུཔྤཱདཱ ཙཏྟཱརོ ཁནྡྷཱ ཨཌྜྷདུཏིཡཱནི ཨཱཡཏནཱནི ཨཌྜྷདུཏིཡཱ དྷཱཏུཡོ ཙ ཧོནྟཱིཏི ཏེཧི ཝིཔྤཡོགོ ཝཏྟབྦོཏི? ན, ཏདཉྙདྷམྨཱནཾ ཁནྡྷཱདིབྷཱཝཏོ། ན ཧི ཏེ ཨེཝ དྷམྨཱ ཙཏྟཱརོ ཁནྡྷཱ, ཨཐ ཁོ ཏེ ཙ ཏཏོ ཨཉྙེ ཙ, ཏཐཱ ཨཌྜྷདུཏིཡཱཡཏནདྷཱཏུཡོཔི། ན ཙ ཏདཉྙསམུདཱཡེཧི ཨཉྙེ ཝིཔྤཡུཏྟཱ ཧོནྟི སམུདཱཡེཀདེསཱནཾ ཨེཀདེསཉྙསམུདཱཡཱནཉྩ ཝིཔྤཡོགཱབྷཱཝཏོ། ཨེས ནཡོ མགྒསཙྩསུཁིནྡྲིཡཱདཱིསུ། ཨཝིཏཀྐཝིཙཱརམཏྟེསུཔི ནིརཝསེསེསུ ཨདྷིཔྤེཏེསུ ཏེསཾ སཝིཏཀྐསཝིཙཱརསམཱནགཏིཀཏྟཱ ཨགྒཧཎེ ཀཱརཎཾ ན དིསྶཏི།
306. Sampayuttenavippayuttapadaniddese rūpakkhandhādayo tehi sampayuttābhāvato na gahitā. Samudayasaccādīni satipi tehi sampayutte, sampayuttehi ca vippayutte sampayuttenavippayuttānaṃ khandhādīhi vippayogābhāvato. Na hi samudayasaccena sampayuttehi lobhasahagatacittuppādehi vippayuttānaṃ tato aññadhammānaṃ khandhādīsu kenaci vippayogo atthi. Nanu ca te eva cittuppādā cattāro khandhā aḍḍhadutiyāni āyatanāni aḍḍhadutiyā dhātuyo ca hontīti tehi vippayogo vattabboti? Na, tadaññadhammānaṃ khandhādibhāvato. Na hi te eva dhammā cattāro khandhā, atha kho te ca tato aññe ca, tathā aḍḍhadutiyāyatanadhātuyopi. Na ca tadaññasamudāyehi aññe vippayuttā honti samudāyekadesānaṃ ekadesaññasamudāyānañca vippayogābhāvato. Esa nayo maggasaccasukhindriyādīsu. Avitakkavicāramattesupi niravasesesu adhippetesu tesaṃ savitakkasavicārasamānagatikattā aggahaṇe kāraṇaṃ na dissati.
ཨཊྛཀཐཱཡཾ པན ཨེཝརཱུཔཱནཱིཏི ཡཐཱ རཱུཔཀྑནྡྷེ ཝིསྶཛྫནཾ ན ཡུཛྫཏི, ཨེཝཾ ཡེསུ ཨཉྙེསུཔི ན ཡུཛྫཏི, ཏཱནི ཝིསྶཛྫནསྶ ཨཡོགེན ‘‘ཨེཝརཱུཔཱནཱི’’ཏི ཝུཏྟཱནི, ན སམྤཡུཏྟཱབྷཱཝེནཱཏི དཊྛབྦཾ། ཡཱནི པན པདཱནི དྷམྨདྷཱཏུཡཱ སམྤཡུཏྟེ དྷམྨེ དཱིཔེནྟཱིཏི ཨེཏེན ཝེདནཱཀྑནྡྷཱདིཔདཱནི དསྶེཏི, ཝིཉྙཱཎཉྩ ཨཉྙེན ཨསམྨིསྶནྟི ཝིཉྙཱཎཀྑནྡྷམནཱཡཏནཱདིཔདཱནི། ཏཏྠ ཨཉྙེན ཨསམྨིསྶནྟི ཨསམྤཡུཏྟེན ཨསམྨིསྶནྟི ཨཏྠོ། ཨདུཀྑམསུཁཱཡཝེདནཱཡསམྤཡུཏྟཔདཱནིཔི ཧི སམྤཡུཏྟེཧི སམྨིསྶཝིཉྙཱཎདཱིཔཀཱནི ཨིདྷ གཧིཏཱནཱིཏི། ཨེཏེན ཙ ལཀྑཎེན ཨེཝརཱུཔཱནེཝ གཧིཏཱནཱིཏི དསྶེཏི, ན ཨེཝརཱུཔཱནི གཧིཏཱནེཝཱཏི སམུདཡསཙྩཱདིཨིདྡྷིཔཱདཱདིཔདཱནཾ ཨསངྒཧིཏཏྟཱ། ‘‘ཨཐ ཕསྶསཏྟཀཾ ཙིཏྟཾ སཧ ཡུཏྟཔདེཧི སཏྟཱ’’ཏི པུརཱཎཔཱཋོ, ཨཡཾ པན ཨཱུནོཏི ཀཏྭཱ ‘‘ཨཐ ཕསྶསཏྟཀཾ, ཏིཀེ ཏཡོ སཏྟ མཧནྟརེ ཙཱ’’ཏི པཱཋོ ཀཏོ།
Aṭṭhakathāyaṃ pana evarūpānīti yathā rūpakkhandhe vissajjanaṃ na yujjati, evaṃ yesu aññesupi na yujjati, tāni vissajjanassa ayogena ‘‘evarūpānī’’ti vuttāni, na sampayuttābhāvenāti daṭṭhabbaṃ. Yāni pana padāni dhammadhātuyā sampayutte dhamme dīpentīti etena vedanākkhandhādipadāni dasseti, viññāṇañca aññena asammissanti viññāṇakkhandhamanāyatanādipadāni. Tattha aññena asammissanti asampayuttena asammissanti attho. Adukkhamasukhāyavedanāyasampayuttapadānipi hi sampayuttehi sammissaviññāṇadīpakāni idha gahitānīti. Etena ca lakkhaṇena evarūpāneva gahitānīti dasseti, na evarūpāni gahitānevāti samudayasaccādiiddhipādādipadānaṃ asaṅgahitattā. ‘‘Atha phassasattakaṃ cittaṃ saha yuttapadehi sattā’’ti purāṇapāṭho, ayaṃ pana ūnoti katvā ‘‘atha phassasattakaṃ, tike tayo satta mahantare cā’’ti pāṭho kato.
༣༠༩. པུཙྪཱཡ ཨུདྡྷཊཔདེནེཝ སདྡྷིཾ ཝིཔྤཡུཏྟཱནཾ ཝསེནཱཏི ཨིདཾ པུཙྪཱཡ ཨུདྡྷཊཔདེན སམྤཡུཏྟེཧི ཝིཔྤཡུཏྟཱ ཏེན སདྡྷིཾ ཝིཔྤཡུཏྟཱ ཧོནྟཱིཏི ཀཏྭཱ ཝུཏྟཾ། པཱལི༹ཨུདྡཱནགཱཐཱཡཾ དྭེ ཙ མནེན ཡུཏྟཱ, ཝིཏཀྐཝིཙཱརཎཱཏི མནོདྷཱཏུཡཱ ཨེཀནྟསམྤཡུཏྟཱ དྭེ ཝིཏཀྐཝིཙཱརཱཏི སཝིཏཀྐཔདཾ སཝིཙཱརཔདཉྩ དསྶེཏི།
309. Pucchāya uddhaṭapadeneva saddhiṃ vippayuttānaṃ vasenāti idaṃ pucchāya uddhaṭapadena sampayuttehi vippayuttā tena saddhiṃ vippayuttā hontīti katvā vuttaṃ. Pāḷiuddānagāthāyaṃ dve ca manena yuttā, vitakkavicāraṇāti manodhātuyā ekantasampayuttā dve vitakkavicārāti savitakkapadaṃ savicārapadañca dasseti.
སཏྟམནཡསམྤཡུཏྟེནཝིཔྤཡུཏྟཔདཝཎྞནཱ ནིཊྛིཏཱ།
Sattamanayasampayuttenavippayuttapadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / དྷཱཏུཀཐཱཔཱལི༹ • Dhātukathāpāḷi / ༧. སམྤཡུཏྟེནཝིཔྤཡུཏྟཔདནིདྡེསོ • 7. Sampayuttenavippayuttapadaniddeso
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༧. སཏྟམནཡོ སམྤཡུཏྟེནཝིཔྤཡུཏྟཔདཝཎྞནཱ • 7. Sattamanayo sampayuttenavippayuttapadavaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༧. སཏྟམནཡོ སམྤཡུཏྟེནཝིཔྤཡུཏྟཔདཝཎྞནཱ • 7. Sattamanayo sampayuttenavippayuttapadavaṇṇanā
