| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
7. ஸத்தமனிஸ்ஸக்³கி³யபாசித்தியஸிக்கா²பத³வண்ணனா
7. Sattamanissaggiyapācittiyasikkhāpadavaṇṇanā
764. ஸத்தமே ‘‘ஸயங் யாசிதகேனா’’தி கிஞ்சாபி அவிஸேஸேன வுத்தங். ததா²பி அஞ்ஞத³த்தி²கேன அத்துத்³தே³ஸிகேன ஸஞ்ஞாசிகேனாதி அத்தோ² வேதி³தப்³போ³. அயமத்தோ² ‘‘பி⁴க்கு²னியோ தேன ச பரிக்கா²ரேன ஸயம்பி யாசித்வா பே⁴ஸஜ்ஜங் சேதாபெத்வா பரிபு⁴ஞ்ஜிங்ஸூ’’தி இமிஸ்ஸா பாளியா அத்தே²ன ஸங்ஸந்தி³த்வா வேதி³தப்³போ³. தஸ்ஸாயமத்தோ² – தேன பரிக்கா²ரேன பே⁴ஸஜ்ஜங் சேதாபெத்வா ச-ஸத்³தே³ன ஸஞ்ஞாசிகேன ச பே⁴ஸஜ்ஜங் சேதாபெத்வாதி இமமத்த²ங் தீ³பெந்தோ ‘‘ஸயம்பி யாசித்வா பே⁴ஸஜ்ஜங் சேதாபெத்வா’’தி ஆஹ. அஞ்ஞதா² ‘‘தேன பரிக்கா²ரேன பே⁴ஸஜ்ஜங் சேதாபெத்வா ஸயம்பி யாசித்வா பரிபு⁴ஞ்ஜிங்ஸூ’’தி இமினா அனுக்கமேன பாளி வத்தப்³பா³ ஸியா.
764. Sattame ‘‘sayaṃ yācitakenā’’ti kiñcāpi avisesena vuttaṃ. Tathāpi aññadatthikena attuddesikena saññācikenāti attho veditabbo. Ayamattho ‘‘bhikkhuniyo tena ca parikkhārena sayampi yācitvā bhesajjaṃ cetāpetvā paribhuñjiṃsū’’ti imissā pāḷiyā atthena saṃsanditvā veditabbo. Tassāyamattho – tena parikkhārena bhesajjaṃ cetāpetvā ca-saddena saññācikena ca bhesajjaṃ cetāpetvāti imamatthaṃ dīpento ‘‘sayampi yācitvā bhesajjaṃ cetāpetvā’’ti āha. Aññathā ‘‘tena parikkhārena bhesajjaṃ cetāpetvā sayampi yācitvā paribhuñjiṃsū’’ti iminā anukkamena pāḷi vattabbā siyā.
பத³பா⁴ஜனே பன ‘‘ஸங்யாசிகேனாதி ஸயங் யாசித்வா’’தி தஸ்ஸேவ பத³ஸ்ஸ அதி⁴ப்பாயமத்தங் வுத்தங். ஸா ஹி பத³பா⁴ஜனத⁴ம்மதா. ‘‘ஸங்கி⁴கங் லாப⁴ங் பரிணத’’ந்திஆதி³பதா³னங் பா⁴ஜனே பன ஸா பாகடா. அஞ்ஞதா² ஸங்யாசிகபதே³ன கோ அஞ்ஞோ அதிரேகத்தோ² ஸங்க³ஹிதோ ஸியா, ஸோ ந தி³ஸ்ஸதீதி ததே³வ பத³ங் நிப்பயோஜனங், இத³ஞ்ச ஸிக்கா²பத³ங் புரிமேன நின்னானாகரணங் ஸியா. அத்தனோ ஹி ஸந்தகங் யதா²காமங் கரணீயந்தி. எத்த² ச ஸங்க⁴ஸ்ஸ யாசனாய வஸேன ஏகதோ ஹுத்வா யாசனாய லத்³த⁴ங் ஸங்யாசிகந்தி வேதி³தப்³ப³ங். அஞ்ஞதா² இதோ பரேன ஸங்யாசிக-ஸத்³தே³ன இத³ங் நிப்³பி³ஸேஸங் ஆபஜ்ஜதீதி ‘‘புக்³க³லிகேன ஸங்யாசிகேனா’’தி இத³ஞ்ச ஸிக்கா²பத³ங் விஸுங் ந வத்தப்³ப³ங் ஸியா இதே⁴வ தேன ஆபஜ்ஜிதப்³பா³பத்தியா ஸங்க³ஹிதத்தா, ந ச ஸங்க³ஹிதா ஆபத்தித்³வயபா⁴வதோ. மிஸ்ஸெத்வா சேதாபிதத்தா ஹி ஏகமேவ ஆபத்தீதி சே? ந, ஸங்யாசிகபத³ஸ்ஸ நிப்பயோஜனபா⁴வப்பஸங்க³தோ, ஏவங் ஸங்கி⁴கமஹாஜனிகபுக்³க³லிகானி மிஸ்ஸித்வா சேதாபனே ஏகாபத்திபா⁴வப்பஸங்க³தோ ச.
Padabhājane pana ‘‘saṃyācikenāti sayaṃ yācitvā’’ti tasseva padassa adhippāyamattaṃ vuttaṃ. Sā hi padabhājanadhammatā. ‘‘Saṅghikaṃ lābhaṃ pariṇata’’ntiādipadānaṃ bhājane pana sā pākaṭā. Aññathā saṃyācikapadena ko añño atirekattho saṅgahito siyā, so na dissatīti tadeva padaṃ nippayojanaṃ, idañca sikkhāpadaṃ purimena ninnānākaraṇaṃ siyā. Attano hi santakaṃ yathākāmaṃ karaṇīyanti. Ettha ca saṅghassa yācanāya vasena ekato hutvā yācanāya laddhaṃ saṃyācikanti veditabbaṃ. Aññathā ito parena saṃyācika-saddena idaṃ nibbisesaṃ āpajjatīti ‘‘puggalikena saṃyācikenā’’ti idañca sikkhāpadaṃ visuṃ na vattabbaṃ siyā idheva tena āpajjitabbāpattiyā saṅgahitattā, na ca saṅgahitā āpattidvayabhāvato. Missetvā cetāpitattā hi ekameva āpattīti ce? Na, saṃyācikapadassa nippayojanabhāvappasaṅgato, evaṃ saṅghikamahājanikapuggalikāni missitvā cetāpane ekāpattibhāvappasaṅgato ca.
ஸத்தமனிஸ்ஸக்³கி³யபாசித்தியஸிக்கா²பத³வண்ணனா நிட்டி²தா.
Sattamanissaggiyapācittiyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 7. ஸத்தமஸிக்கா²பத³ங் • 7. Sattamasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / ஸத்தமனிஸ்ஸக்³கி³யபாசித்தியஸிக்கா²பத³வண்ணனா • Sattamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா) • 3. Nissaggiyakaṇḍaṃ (bhikkhunīvibhaṅgavaṇṇanā)
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. ஸத்தமனிஸ்ஸக்³கி³யபாசித்தியஸிக்கா²பத³ங் • 7. Sattamanissaggiyapācittiyasikkhāpadaṃ
