Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā

    ၇. သတ္တမနိသ္သဂ္ဂိယပာစိတ္တိယသိက္ခာပဒဝဏ္ဏနာ

    7. Sattamanissaggiyapācittiyasikkhāpadavaṇṇanā

    ၇၆၄. သတ္တမေ ‘‘သယံ ယာစိတကေနာ’’တိ ကိဉ္စာပိ အဝိသေသေန ဝုတ္တံ။ တထာပိ အညဒတ္ထိကေန အတ္တုဒ္ဒေသိကေန သညာစိကေနာတိ အတ္ထော ဝေဒိတဗ္ဗော။ အယမတ္ထော ‘‘ဘိက္ခုနိယော တေန စ ပရိက္ခာရေန သယမ္ပိ ယာစိတ္ဝာ ဘေသဇ္ဇံ စေတာပေတ္ဝာ ပရိဘုဉ္ဇိံသူ’’တိ ဣမိသ္သာ ပာဠိယာ အတ္ထေန သံသန္ဒိတ္ဝာ ဝေဒိတဗ္ဗော။ တသ္သာယမတ္ထော – တေန ပရိက္ခာရေန ဘေသဇ္ဇံ စေတာပေတ္ဝာ စ-သဒ္ဒေန သညာစိကေန စ ဘေသဇ္ဇံ စေတာပေတ္ဝာတိ ဣမမတ္ထံ ဒီပေန္တော ‘‘သယမ္ပိ ယာစိတ္ဝာ ဘေသဇ္ဇံ စေတာပေတ္ဝာ’’တိ အာဟ။ အညထာ ‘‘တေန ပရိက္ခာရေန ဘေသဇ္ဇံ စေတာပေတ္ဝာ သယမ္ပိ ယာစိတ္ဝာ ပရိဘုဉ္ဇိံသူ’’တိ ဣမိနာ အနုက္ကမေန ပာဠိ ဝတ္တဗ္ဗာ သိယာ။

    764. Sattame ‘‘sayaṃ yācitakenā’’ti kiñcāpi avisesena vuttaṃ. Tathāpi aññadatthikena attuddesikena saññācikenāti attho veditabbo. Ayamattho ‘‘bhikkhuniyo tena ca parikkhārena sayampi yācitvā bhesajjaṃ cetāpetvā paribhuñjiṃsū’’ti imissā pāḷiyā atthena saṃsanditvā veditabbo. Tassāyamattho – tena parikkhārena bhesajjaṃ cetāpetvā ca-saddena saññācikena ca bhesajjaṃ cetāpetvāti imamatthaṃ dīpento ‘‘sayampi yācitvā bhesajjaṃ cetāpetvā’’ti āha. Aññathā ‘‘tena parikkhārena bhesajjaṃ cetāpetvā sayampi yācitvā paribhuñjiṃsū’’ti iminā anukkamena pāḷi vattabbā siyā.

    ပဒဘာဇနေ ပန ‘‘သံယာစိကေနာတိ သယံ ယာစိတ္ဝာ’’တိ တသ္သေဝ ပဒသ္သ အဓိပ္ပာယမတ္တံ ဝုတ္တံ။ သာ ဟိ ပဒဘာဇနဓမ္မတာ။ ‘‘သင္ဃိကံ လာဘံ ပရိဏတ’’န္တိအာဒိပဒာနံ ဘာဇနေ ပန သာ ပာကဋာ။ အညထာ သံယာစိကပဒေန ကော အညော အတိရေကတ္ထော သင္ဂဟိတော သိယာ, သော န ဒိသ္သတီတိ တဒေဝ ပဒံ နိပ္ပယောဇနံ, ဣဒဉ္စ သိက္ခာပဒံ ပုရိမေန နိန္နာနာကရဏံ သိယာ။ အတ္တနော ဟိ သန္တကံ ယထာကာမံ ကရဏီယန္တိ။ ဧတ္ထ စ သင္ဃသ္သ ယာစနာယ ဝသေန ဧကတော ဟုတ္ဝာ ယာစနာယ လဒ္ဓံ သံယာစိကန္တိ ဝေဒိတဗ္ဗံ။ အညထာ ဣတော ပရေန သံယာစိက-သဒ္ဒေန ဣဒံ နိဗ္ဗိသေသံ အာပဇ္ဇတီတိ ‘‘ပုဂ္ဂလိကေန သံယာစိကေနာ’’တိ ဣဒဉ္စ သိက္ခာပဒံ ဝိသုံ န ဝတ္တဗ္ဗံ သိယာ ဣဓေဝ တေန အာပဇ္ဇိတဗ္ဗာပတ္တိယာ သင္ဂဟိတတ္တာ, န စ သင္ဂဟိတာ အာပတ္တိဒ္ဝယဘာဝတော။ မိသ္သေတ္ဝာ စေတာပိတတ္တာ ဟိ ဧကမေဝ အာပတ္တီတိ စေ? န, သံယာစိကပဒသ္သ နိပ္ပယောဇနဘာဝပ္ပသင္ဂတော, ဧဝံ သင္ဃိကမဟာဇနိကပုဂ္ဂလိကာနိ မိသ္သိတ္ဝာ စေတာပနေ ဧကာပတ္တိဘာဝပ္ပသင္ဂတော စ။

    Padabhājane pana ‘‘saṃyācikenāti sayaṃ yācitvā’’ti tasseva padassa adhippāyamattaṃ vuttaṃ. Sā hi padabhājanadhammatā. ‘‘Saṅghikaṃ lābhaṃ pariṇata’’ntiādipadānaṃ bhājane pana sā pākaṭā. Aññathā saṃyācikapadena ko añño atirekattho saṅgahito siyā, so na dissatīti tadeva padaṃ nippayojanaṃ, idañca sikkhāpadaṃ purimena ninnānākaraṇaṃ siyā. Attano hi santakaṃ yathākāmaṃ karaṇīyanti. Ettha ca saṅghassa yācanāya vasena ekato hutvā yācanāya laddhaṃ saṃyācikanti veditabbaṃ. Aññathā ito parena saṃyācika-saddena idaṃ nibbisesaṃ āpajjatīti ‘‘puggalikena saṃyācikenā’’ti idañca sikkhāpadaṃ visuṃ na vattabbaṃ siyā idheva tena āpajjitabbāpattiyā saṅgahitattā, na ca saṅgahitā āpattidvayabhāvato. Missetvā cetāpitattā hi ekameva āpattīti ce? Na, saṃyācikapadassa nippayojanabhāvappasaṅgato, evaṃ saṅghikamahājanikapuggalikāni missitvā cetāpane ekāpattibhāvappasaṅgato ca.

    သတ္တမနိသ္သဂ္ဂိယပာစိတ္တိယသိက္ခာပဒဝဏ္ဏနာ နိဋ္ဌိတာ။

    Sattamanissaggiyapācittiyasikkhāpadavaṇṇanā niṭṭhitā.







    Related texts:



    တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ဘိက္ခုနီဝိဘင္ဂ • Bhikkhunīvibhaṅga / ၇. သတ္တမသိက္ခာပဒံ • 7. Sattamasikkhāpadaṃ

    အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / သတ္တမနိသ္သဂ္ဂိယပာစိတ္တိယသိက္ခာပဒဝဏ္ဏနာ • Sattamanissaggiyapācittiyasikkhāpadavaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. နိသ္သဂ္ဂိယကဏ္ဍံ (ဘိက္ခုနီဝိဘင္ဂဝဏ္ဏနာ) • 3. Nissaggiyakaṇḍaṃ (bhikkhunīvibhaṅgavaṇṇanā)

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၂. ဒုတိယနိသ္သဂ္ဂိယာဒိပာစိတ္တိယသိက္ခာပဒဝဏ္ဏနာ • 2. Dutiyanissaggiyādipācittiyasikkhāpadavaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇. သတ္တမနိသ္သဂ္ဂိယပာစိတ္တိယသိက္ခာပဒံ • 7. Sattamanissaggiyapācittiyasikkhāpadaṃ


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact