| Library / Tipiṭaka / တိပိဋက • Tipiṭaka / ဘိက္ခုနီဝိဘင္ဂ • Bhikkhunīvibhaṅga |
၇. သတ္တမသင္ဃာဒိသေသသိက္ခာပဒံ
7. Sattamasaṅghādisesasikkhāpadaṃ
၇၀၉. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန စဏ္ဍကာဠီ ဘိက္ခုနီ ဘိက္ခုနီဟိ သဒ္ဓိံ ဘဏ္ဍိတ္ဝာ ကုပိတာ အနတ္တမနာ ဧဝံ ဝဒေတိ – ‘‘ဗုဒ္ဓံ ပစ္စာစိက္ခာမိ, ဓမ္မံ ပစ္စာစိက္ခာမိ, သင္ဃံ ပစ္စာစိက္ခာမိ, သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော, သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ တာသာဟံ သန္တိကေ ဗ္ရဟ္မစရိယံ စရိသ္သာမီ’’တိ။ ယာ တာ ဘိက္ခုနိယော အပ္ပိစ္ဆာ။ပေ.။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယာ စဏ္ဍကာဠီ 1 ကုပိတာ အနတ္တမနာ ဧဝံ ဝက္ခတိ – ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော, သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ တာသာဟံ သန္တိကေ ဗ္ရဟ္မစရိယံ စရိသ္သာမီ’’တိ။ပေ.။ သစ္စံ ကိရ, ဘိက္ခဝေ, စဏ္ဍကာဠီ ဘိက္ခုနီ ကုပိတာ အနတ္တမနာ ဧဝံ ဝဒေတိ – ‘‘ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော, သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’’တိ ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ, ဘိက္ခဝေ, စဏ္ဍကာဠီ ဘိက္ခုနီ ကုပိတာ အနတ္တမနာ ဧဝံ ဝက္ခတိ – ‘‘ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော, သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’’တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဘိက္ခုနိယော ဣမံ သိက္ခာပဒံ ဥဒ္ဒိသန္တု –
709. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena caṇḍakāḷī bhikkhunī bhikkhunīhi saddhiṃ bhaṇḍitvā kupitā anattamanā evaṃ vadeti – ‘‘buddhaṃ paccācikkhāmi, dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi. Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā tāsāhaṃ santike brahmacariyaṃ carissāmī’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā caṇḍakāḷī 2 kupitā anattamanā evaṃ vakkhati – buddhaṃ paccācikkhāmi…pe… sikkhaṃ paccācikkhāmi. Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā tāsāhaṃ santike brahmacariyaṃ carissāmī’’ti…pe… saccaṃ kira, bhikkhave, caṇḍakāḷī bhikkhunī kupitā anattamanā evaṃ vadeti – ‘‘buddhaṃ paccācikkhāmi…pe… sikkhaṃ paccācikkhāmi. Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’’ti ? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, caṇḍakāḷī bhikkhunī kupitā anattamanā evaṃ vakkhati – ‘‘buddhaṃ paccācikkhāmi…pe… sikkhaṃ paccācikkhāmi. Kinnumāva samaṇiyo yā samaṇiyo sakyadhītaro, santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’’ti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
၇၁၀. ‘‘ယာ ပန ဘိက္ခုနီ ကုပိတာ အနတ္တမနာ ဧဝံ ဝဒေယ္ယ – ‘ဗုဒ္ဓံ ပစ္စာစိက္ခာမိ, ဓမ္မံ ပစ္စာစိက္ခာမိ, သင္ဃံ ပစ္စာစိက္ခာမိ, သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’တိ, သာ ဘိက္ခုနီ ဘိက္ခုနီဟိ ဧဝမသ္သ ဝစနီယာ – ‘မာယ္ယေ, ကုပိတာ အနတ္တမနာ ဧဝံ အဝစ – ဗုဒ္ဓံ ပစ္စာစိက္ခာမိ, ဓမ္မံ ပစ္စာစိက္ခာမိ, သင္ဃံ ပစ္စာစိက္ခာမိ, သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီတိ, အဘိရမာယ္ယေ, သ္ဝာက္ခာတော ဓမ္မော; စရ ဗ္ရဟ္မစရိယံ သမ္မာ ဒုက္ခသ္သ အန္တကိရိယာယာ’တိ။ ဧဝဉ္စ သာ ဘိက္ခုနီ ဘိက္ခုနီဟိ ဝုစ္စမာနာ တထေဝ ပဂ္ဂဏ္ဟေယ္ယ, သာ ဘိက္ခုနီ ဘိက္ခုနီဟိ ယာဝတတိယံ သမနုဘာသိတဗ္ဗာ တသ္သ ပဋိနိသ္သဂ္ဂာယ။ ယာဝတတိယဉ္စေ သမနုဘာသီယမာနာ တံ ပဋိနိသ္သဇ္ဇေယ္ယ ဣစ္စေတံ ကုသလံ; နော စေ ပဋိနိသ္သဇ္ဇေယ္ယ , အယမ္ပိ ဘိက္ခုနီ ယာဝတတိယကံ ဓမ္မံ အာပန္နာ နိသ္သာရဏီယံ သင္ဃာဒိသေသ’’န္တိ။
710.‘‘Yā pana bhikkhunī kupitā anattamanā evaṃ vadeyya – ‘buddhaṃ paccācikkhāmi, dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi. Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’ti, sā bhikkhunī bhikkhunīhi evamassa vacanīyā – ‘māyye, kupitā anattamanā evaṃ avaca – buddhaṃ paccācikkhāmi, dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi. Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmīti, abhiramāyye, svākkhāto dhammo; cara brahmacariyaṃ sammā dukkhassa antakiriyāyā’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsīyamānā taṃ paṭinissajjeyya iccetaṃ kusalaṃ; no ce paṭinissajjeyya , ayampi bhikkhunī yāvatatiyakaṃ dhammaṃ āpannā nissāraṇīyaṃ saṅghādisesa’’nti.
၇၁၁. ယာ ပနာတိ ယာ ယာဒိသာ။ပေ.။ ဘိက္ခုနီတိ။ပေ.။ အယံ ဣမသ္မိံ အတ္ထေ အဓိပ္ပေတာ ဘိက္ခုနီတိ။
711.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ကုပိတာ အနတ္တမနာတိ အနဘိရဒ္ဓာ အာဟတစိတ္တာ ခိလဇာတာ။
Kupitā anattamanāti anabhiraddhā āhatacittā khilajātā.
ဧဝံ ဝဒေယ္ယာတိ – ‘‘ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’’တိ။
Evaṃ vadeyyāti – ‘‘buddhaṃ paccācikkhāmi…pe… sikkhaṃ paccācikkhāmi. Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’’ti.
သာ ဘိက္ခုနီတိ ယာ သာ ဧဝံဝာဒိနီ ဘိက္ခုနီ။ ဘိက္ခုနီဟီတိ အညာဟိ ဘိက္ခုနီဟိ။
Sābhikkhunīti yā sā evaṃvādinī bhikkhunī. Bhikkhunīhīti aññāhi bhikkhunīhi.
ယာ ပသ္သန္တိ ယာ သုဏန္တိ တာဟိ ဝတ္တဗ္ဗာ – ‘‘မာယ္ယေ, ကုပိတာ အနတ္တမနာ ဧဝံ အဝစ – ‘ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’တိ။ အဘိရမာယ္ယေ, သ္ဝာက္ခာတော ဓမ္မော; စရ ဗ္ရဟ္မစရိယံ သမ္မာ ဒုက္ခသ္သ အန္တကိရိယာယာ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိသ္သဇ္ဇတိ ဣစ္စေတံ ကုသလံ, နော စေ ပဋိနိသ္သဇ္ဇတိ အာပတ္တိ ဒုက္ကဋသ္သ။ သုတ္ဝာ န ဝဒန္တိ, အာပတ္တိ ဒုက္ကဋသ္သ။ သာ ဘိက္ခုနီ သင္ဃမဇ္ဈမ္ပိ အာကဍ္ဎိတ္ဝာ ဝတ္တဗ္ဗာ – ‘‘မာယ္ယေ, ကုပိတာ အနတ္တမနာ ဧဝံ အဝစ – ‘ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’တိ။ အဘိရမာယ္ယေ, သ္ဝာက္ခာတော ဓမ္မော; စရ ဗ္ရဟ္မစရိယံ သမ္မာ ဒုက္ခသ္သ အန္တကိရိယာယာ’’တိ။ ဒုတိယမ္ပိ ဝတ္တဗ္ဗာ။ တတိယမ္ပိ ဝတ္တဗ္ဗာ။ သစေ ပဋိနိသ္သဇ္ဇတိ ဣစ္စေတံ ကုသလံ, နော စေ ပဋိနိသ္သဇ္ဇတိ အာပတ္တိ ဒုက္ကဋသ္သ။ သာ ဘိက္ခုနီ သမနုဘာသိတဗ္ဗာ။ ဧဝဉ္စ ပန, ဘိက္ခဝေ, သမနုဘာသိတဗ္ဗာ။ ဗ္ယတ္တာယ ဘိက္ခုနိယာ ပဋိဗလာယ သင္ဃော ဉာပေတဗ္ဗော –
Yā passanti yā suṇanti tāhi vattabbā – ‘‘māyye, kupitā anattamanā evaṃ avaca – ‘buddhaṃ paccācikkhāmi…pe… sikkhaṃ paccācikkhāmi. Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’ti. Abhiramāyye, svākkhāto dhammo; cara brahmacariyaṃ sammā dukkhassa antakiriyāyā’’ti. Dutiyampi vattabbā. Tatiyampi vattabbā. Sace paṭinissajjati iccetaṃ kusalaṃ, no ce paṭinissajjati āpatti dukkaṭassa. Sutvā na vadanti, āpatti dukkaṭassa. Sā bhikkhunī saṅghamajjhampi ākaḍḍhitvā vattabbā – ‘‘māyye, kupitā anattamanā evaṃ avaca – ‘buddhaṃ paccācikkhāmi…pe… sikkhaṃ paccācikkhāmi . Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’ti. Abhiramāyye, svākkhāto dhammo; cara brahmacariyaṃ sammā dukkhassa antakiriyāyā’’ti. Dutiyampi vattabbā. Tatiyampi vattabbā. Sace paṭinissajjati iccetaṃ kusalaṃ, no ce paṭinissajjati āpatti dukkaṭassa. Sā bhikkhunī samanubhāsitabbā. Evañca pana, bhikkhave, samanubhāsitabbā. Byattāya bhikkhuniyā paṭibalāya saṅgho ñāpetabbo –
၇၁၂. ‘‘သုဏာတု မေ, အယ္ယေ, သင္ဃော။ အယံ ဣတ္ထန္နာမာ ဘိက္ခုနီ ကုပိတာ အနတ္တမနာ ဧဝံ ဝဒေတိ – ‘ဗုဒ္ဓံ ပစ္စာစိက္ခာမိ, ဓမ္မံ ပစ္စာစိက္ခာမိ, သင္ဃံ ပစ္စာစိက္ခာမိ, သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ တာသာဟံ သန္တိကေ ဗ္ရဟ္မစရိယံ စရိသ္သာမီ’တိ။ သာ တံ ဝတ္ထုံ န ပဋိနိသ္သဇ္ဇတိ။ ယဒိ သင္ဃသ္သ ပတ္တကလ္လံ, သင္ဃော ဣတ္ထန္နာမံ ဘိက္ခုနိံ သမနုဘာသေယ္ယ တသ္သ ဝတ္ထုသ္သ ပဋိနိသ္သဂ္ဂာယ။ ဧသာ ဉတ္တိ။
712. ‘‘Suṇātu me, ayye, saṅgho. Ayaṃ itthannāmā bhikkhunī kupitā anattamanā evaṃ vadeti – ‘buddhaṃ paccācikkhāmi, dhammaṃ paccācikkhāmi, saṅghaṃ paccācikkhāmi, sikkhaṃ paccācikkhāmi. Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā tāsāhaṃ santike brahmacariyaṃ carissāmī’ti. Sā taṃ vatthuṃ na paṭinissajjati. Yadi saṅghassa pattakallaṃ, saṅgho itthannāmaṃ bhikkhuniṃ samanubhāseyya tassa vatthussa paṭinissaggāya. Esā ñatti.
‘‘သုဏာတု မေ, အယ္ယေ, သင္ဃော။ အယံ ဣတ္ထန္နာမာ ဘိက္ခုနီ ကုပိတာ အနတ္တမနာ ဧဝံ ဝဒေတိ – ‘ဗုဒ္ဓံ ပစ္စာစိက္ခာမိ။ပေ.။ သိက္ခံ ပစ္စာစိက္ခာမိ။ ကိန္နုမာဝ သမဏိယော ယာ သမဏိယော သက္ယဓီတရော! သန္တညာပိ သမဏိယော လဇ္ဇိနိယော ကုက္ကုစ္စိကာ သိက္ခာကာမာ, တာသာဟံ သန္တိကေ ဗ္ရဟ္မစရိယံ စရိသ္သာမီ’တိ ။ သာ တံ ဝတ္ထုံ န ပဋိနိသ္သဇ္ဇတိ။ သင္ဃော ဣတ္ထန္နာမံ ဘိက္ခုနိံ သမနုဘာသတိ တသ္သ ဝတ္ထုသ္သ ပဋိနိသ္သဂ္ဂာယ။ ယသ္သာ အယ္ယာယ ခမတိ ဣတ္ထန္နာမာယ ဘိက္ခုနိယာ သမနုဘာသနာ တသ္သ ဝတ္ထုသ္သ ပဋိနိသ္သဂ္ဂာယ, သာ တုဏ္ဟသ္သ; ယသ္သာ နက္ခမတိ သာ, ဘာသေယ္ယ။
‘‘Suṇātu me, ayye, saṅgho. Ayaṃ itthannāmā bhikkhunī kupitā anattamanā evaṃ vadeti – ‘buddhaṃ paccācikkhāmi…pe… sikkhaṃ paccācikkhāmi. Kinnumāva samaṇiyo yā samaṇiyo sakyadhītaro! Santaññāpi samaṇiyo lajjiniyo kukkuccikā sikkhākāmā, tāsāhaṃ santike brahmacariyaṃ carissāmī’ti . Sā taṃ vatthuṃ na paṭinissajjati. Saṅgho itthannāmaṃ bhikkhuniṃ samanubhāsati tassa vatthussa paṭinissaggāya. Yassā ayyāya khamati itthannāmāya bhikkhuniyā samanubhāsanā tassa vatthussa paṭinissaggāya, sā tuṇhassa; yassā nakkhamati sā, bhāseyya.
‘‘ဒုတိယမ္ပိ ဧတမတ္ထံ ဝဒာမိ။ပေ.။ တတိယမ္ပိ ဧတမတ္ထံ ဝဒာမိ။ပေ.။။
‘‘Dutiyampi etamatthaṃ vadāmi…pe… tatiyampi etamatthaṃ vadāmi…pe….
‘‘သမနုဘဋ္ဌာ သင္ဃေန ဣတ္ထန္နာမာ ဘိက္ခုနီ တသ္သ ဝတ္ထုသ္သ ပဋိနိသ္သဂ္ဂာယ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Samanubhaṭṭhā saṅghena itthannāmā bhikkhunī tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
ဉတ္တိယာ ဒုက္ကဋံ။ ဒ္ဝီဟိ ကမ္မဝာစာဟိ ထုလ္လစ္စယာ။ ကမ္မဝာစာပရိယောသာနေ အာပတ္တိ သင္ဃာဒိသေသသ္သ။ သင္ဃာဒိသေသံ အဇ္ဈာပဇ္ဇန္တိယာ ဉတ္တိယာ ဒုက္ကဋံ, ဒ္ဝီဟိ ကမ္မဝာစာဟိ ထုလ္လစ္စယာ ပဋိပ္ပသ္သမ္ဘန္တိ။
Ñattiyā dukkaṭaṃ. Dvīhi kammavācāhi thullaccayā. Kammavācāpariyosāne āpatti saṅghādisesassa. Saṅghādisesaṃ ajjhāpajjantiyā ñattiyā dukkaṭaṃ, dvīhi kammavācāhi thullaccayā paṭippassambhanti.
အယမ္ပီတိ ပုရိမာယော ဥပာဒာယ ဝုစ္စတိ။
Ayampīti purimāyo upādāya vuccati.
ယာဝတတိယကန္တိ ယာဝတတိယံ သမနုဘာသနာယ အာပဇ္ဇတိ, န သဟ ဝတ္ထုဇ္ဈာစာရာ။
Yāvatatiyakanti yāvatatiyaṃ samanubhāsanāya āpajjati, na saha vatthujjhācārā.
နိသ္သာရဏီယန္တိ သင္ဃမ္ဟာ နိသ္သာရီယတိ။
Nissāraṇīyanti saṅghamhā nissārīyati.
သင္ဃာဒိသေသောတိ။ပေ.။ တေနပိ ဝုစ္စတိ သင္ဃာဒိသေသောတိ။
Saṅghādisesoti…pe… tenapi vuccati saṅghādisesoti.
၇၁၃. ဓမ္မကမ္မေ ဓမ္မကမ္မသညာ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။ ဓမ္မကမ္မေ ဝေမတိကာ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။ ဓမ္မကမ္မေ အဓမ္မကမ္မသညာ န ပဋိနိသ္သဇ္ဇတိ, အာပတ္တိ သင္ဃာဒိသေသသ္သ။
713. Dhammakamme dhammakammasaññā na paṭinissajjati, āpatti saṅghādisesassa. Dhammakamme vematikā na paṭinissajjati, āpatti saṅghādisesassa. Dhammakamme adhammakammasaññā na paṭinissajjati, āpatti saṅghādisesassa.
အဓမ္မကမ္မေ ဓမ္မကမ္မသညာ, အာပတ္တိ ဒုက္ကဋသ္သ ။ အဓမ္မကမ္မေ ဝေမတိကာ, အာပတ္တိ ဒုက္ကဋသ္သ။ အဓမ္မကမ္မေ အဓမ္မကမ္မသညာ, အာပတ္တိ ဒုက္ကဋသ္သ။
Adhammakamme dhammakammasaññā, āpatti dukkaṭassa . Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
၇၁၄. အနာပတ္တိ အသမနုဘာသန္တိယာ, ပဋိနိသ္သဇ္ဇန္တိယာ, ဥမ္မတ္တိကာယ, အာဒိကမ္မိကာယာတိ။
714. Anāpatti asamanubhāsantiyā, paṭinissajjantiyā, ummattikāya, ādikammikāyāti.
သတ္တမသင္ဃာဒိသေသသိက္ခာပဒံ နိဋ္ဌိတံ။
Sattamasaṅghādisesasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ဘိက္ခုနီဝိဘင္ဂ-အဋ္ဌကထာ • Bhikkhunīvibhaṅga-aṭṭhakathā / ၇. သတ္တမသင္ဃာဒိသေသသိက္ခာပဒဝဏ္ဏနာ • 7. Sattamasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၇. သတ္တမသင္ဃာဒိသေသသိက္ခာပဒဝဏ္ဏနာ • 7. Sattamasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၇. သတ္တမသင္ဃာဒိသေသသိက္ခာပဒဝဏ္ဏနာ • 7. Sattamasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၆. ဆဋ္ဌသင္ဃာဒိသေသသိက္ခာပဒဝဏ္ဏနာ • 6. Chaṭṭhasaṅghādisesasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇. သတ္တမသင္ဃာဒိသေသသိက္ခာပဒံ • 7. Sattamasaṅghādisesasikkhāpadaṃ
