| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
7. ஸத்தமஸிக்கா²பத³ங்
7. Sattamasikkhāpadaṃ
763. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன உபாஸகா பி⁴க்கு²னிஸங்க⁴ஸ்ஸ சீவரத்தா²ய ச²ந்த³கங் ஸங்க⁴ரித்வா அஞ்ஞதரஸ்ஸ பாவாரிகஸ்ஸ க⁴ரே பரிக்கா²ரங் நிக்கி²பித்வா பி⁴க்கு²னியோ உபஸங்கமித்வா ஏதத³வோசுங் – ‘‘அமுகஸ்ஸ, அய்யே, பாவாரிகஸ்ஸ க⁴ரே சீவரத்தா²ய பரிக்கா²ரோ நிக்கி²த்தோ, ததோ சீவரங் ஆஹராபெத்வா பா⁴ஜேதா²’’தி. பி⁴க்கு²னியோ தேன ச பரிக்கா²ரேன ஸயம்பி யாசித்வா பே⁴ஸஜ்ஜங் சேதாபெத்வா பரிபு⁴ஞ்ஜிங்ஸு. உபாஸகா ஜானித்வா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞங் சேதாபெஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞங் சேதாபெந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞங் சேதாபெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
763. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena upāsakā bhikkhunisaṅghassa cīvaratthāya chandakaṃ saṅgharitvā aññatarassa pāvārikassa ghare parikkhāraṃ nikkhipitvā bhikkhuniyo upasaṅkamitvā etadavocuṃ – ‘‘amukassa, ayye, pāvārikassa ghare cīvaratthāya parikkhāro nikkhitto, tato cīvaraṃ āharāpetvā bhājethā’’ti. Bhikkhuniyo tena ca parikkhārena sayampi yācitvā bhesajjaṃ cetāpetvā paribhuñjiṃsu. Upāsakā jānitvā ujjhāyanti khiyyanti vipācenti – ‘‘kathañhi nāma bhikkhuniyo aññadatthikena parikkhārena aññuddisikena saṅghikena saññācikena aññaṃ cetāpessantī’’ti…pe… saccaṃ kira, bhikkhave, bhikkhuniyo aññadatthikena parikkhārena aññuddisikena saṅghikena saññācikena aññaṃ cetāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo aññadatthikena parikkhārena aññuddisikena saṅghikena saññācikena aññaṃ cetāpessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
764. ‘‘யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞங் சேதாபெய்ய, நிஸ்ஸக்³கி³யங் பாசித்திய’’ந்தி.
764.‘‘Yā pana bhikkhunī aññadatthikena parikkhārena aññuddisikena saṅghikena saññācikena aññaṃ cetāpeyya, nissaggiyaṃ pācittiya’’nti.
765. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
765.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேனாதி அஞ்ஞஸ்ஸத்தா²ய தி³ன்னேன.
Aññadatthikenaparikkhārena aññuddisikenāti aññassatthāya dinnena.
ஸங்கி⁴கேனாதி ஸங்க⁴ஸ்ஸ, ந க³ணஸ்ஸ, ந ஏகபி⁴க்கு²னியா.
Saṅghikenāti saṅghassa, na gaṇassa, na ekabhikkhuniyā.
ஸஞ்ஞாசிகேனாதி ஸயங் யாசித்வா.
Saññācikenāti sayaṃ yācitvā.
அஞ்ஞங் சேதாபெய்யாதி யங்அத்தா²ய தி³ன்னங் தங் ட²பெத்வா அஞ்ஞங் சேதாபேதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… ‘‘இத³ங் மே, அய்யே, அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞங் சேதாபிதங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீ’’தி…பே॰… த³தெ³ய்யாதி…பே॰… த³தெ³ய்யுந்தி…பே॰… அய்யாய த³ம்மீதி.
Aññaṃ cetāpeyyāti yaṃatthāya dinnaṃ taṃ ṭhapetvā aññaṃ cetāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, aññadatthikena parikkhārena aññuddisikena saṅghikena saññācikena aññaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
766. அஞ்ஞத³த்தி²கே அஞ்ஞத³த்தி²கஸஞ்ஞா அஞ்ஞங் சேதாபேதி, நிஸ்ஸக்³கி³யங் பாசித்தியங். அஞ்ஞத³த்தி²கே வேமதிகா அஞ்ஞங் சேதாபேதி, நிஸ்ஸக்³கி³யங் பாசித்தியங். அஞ்ஞத³த்தி²கே அனஞ்ஞத³த்தி²கஸஞ்ஞா அஞ்ஞங் சேதாபேதி , நிஸ்ஸக்³கி³யங் பாசித்தியங். நிஸ்ஸட்ட²ங் படிலபி⁴த்வா யதா²தா³னே உபனேதப்³ப³ங்.
766. Aññadatthike aññadatthikasaññā aññaṃ cetāpeti, nissaggiyaṃ pācittiyaṃ. Aññadatthike vematikā aññaṃ cetāpeti, nissaggiyaṃ pācittiyaṃ. Aññadatthike anaññadatthikasaññā aññaṃ cetāpeti , nissaggiyaṃ pācittiyaṃ. Nissaṭṭhaṃ paṭilabhitvā yathādāne upanetabbaṃ.
அனஞ்ஞத³த்தி²கே அஞ்ஞத³த்தி²கஸஞ்ஞா, ஆபத்தி து³க்கடஸ்ஸ. அனஞ்ஞத³த்தி²கே வேமதிகா, ஆபத்தி து³க்கடஸ்ஸ. அனஞ்ஞத³த்தி²கே அனஞ்ஞத³த்தி²கஸஞ்ஞா, அனாபத்தி.
Anaññadatthike aññadatthikasaññā, āpatti dukkaṭassa. Anaññadatthike vematikā, āpatti dukkaṭassa. Anaññadatthike anaññadatthikasaññā, anāpatti.
767. அனாபத்தி ஸேஸகங் உபனேதி, ஸாமிகே அபலோகெத்வா உபனேதி, ஆபதா³ஸு, உம்மத்திகாய, ஆதி³கம்மிகாயாதி.
767. Anāpatti sesakaṃ upaneti, sāmike apaloketvā upaneti, āpadāsu, ummattikāya, ādikammikāyāti.
ஸத்தமஸிக்கா²பத³ங் நிட்டி²தங்.
Sattamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / ஸத்தமனிஸ்ஸக்³கி³யபாசித்தியஸிக்கா²பத³வண்ணனா • Sattamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா) • 3. Nissaggiyakaṇḍaṃ (bhikkhunīvibhaṅgavaṇṇanā)
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. ஸத்தமனிஸ்ஸக்³கி³யபாசித்தியஸிக்கா²பத³வண்ணனா • 7. Sattamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. ஸத்தமனிஸ்ஸக்³கி³யபாசித்தியஸிக்கா²பத³ங் • 7. Sattamanissaggiyapācittiyasikkhāpadaṃ
