| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
7. ஸத்தமஸிக்கா²பத³ங்
7. Sattamasikkhāpadaṃ
864. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலா பி⁴க்கு²னியோ கோஸலேஸு ஜனபதே³ ஸாவத்தி²ங் க³ச்ச²ந்தியோ ஸாயங் அஞ்ஞதரங் கா³மங் உபக³ந்த்வா அஞ்ஞதரங் ப்³ராஹ்மணகுலங் உபஸங்கமித்வா ஓகாஸங் யாசிங்ஸு. அத² கோ² ஸா ப்³ராஹ்மணீ தா பி⁴க்கு²னியோ ஏதத³வோச – ‘‘ஆக³மேத², அய்யே, யாவ ப்³ராஹ்மணோ ஆக³ச்ச²தீ’’தி. பி⁴க்கு²னியோ – ‘‘யாவ ப்³ராஹ்மணோ ஆக³ச்ச²தீ’’தி ஸெய்யங் ஸந்த²ரித்வா ஏகச்சா நிஸீதி³ங்ஸு ஏகச்சா நிபஜ்ஜிங்ஸு. அத² கோ² ஸோ ப்³ராஹ்மணோ ரத்திங் ஆக³ந்த்வா தங் ப்³ராஹ்மணிங் ஏதத³வோச – ‘‘கா இமா’’தி? ‘‘பி⁴க்கு²னியோ, அய்யா’’தி. ‘‘நிக்கட்³ட⁴த² இமா முண்டா³ ப³ந்த⁴கினியோ’’தி, க⁴ரதோ நிக்கட்³டா⁴பேஸி. அத² கோ² தா பி⁴க்கு²னியோ ஸாவத்தி²ங் க³ந்த்வா பி⁴க்கு²னீனங் ஏதமத்த²ங் ஆரோசேஸுங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ விகாலே குலானி உபஸங்கமித்வா ஸாமிகே அனாபுச்சா² ஸெய்யங் ஸந்த²ரித்வா அபி⁴னிஸீதி³ஸ்ஸந்திபி அபி⁴னிபஜ்ஜிஸ்ஸந்திபீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ விகாலே குலானி உபஸங்கமித்வா ஸாமிகே அனாபுச்சா² ஸெய்யங் ஸந்த²ரித்வா அபி⁴னிஸீத³ந்திபி அபி⁴னிபஜ்ஜந்திபீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ விகாலே குலானி உபஸங்கமித்வா ஸாமிகே அனாபுச்சா² ஸெய்யங் ஸந்த²ரித்வா அபி⁴னிஸீதி³ஸ்ஸந்திபி அபி⁴னிபஜ்ஜிஸ்ஸந்திபி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
864. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhuniyo kosalesu janapade sāvatthiṃ gacchantiyo sāyaṃ aññataraṃ gāmaṃ upagantvā aññataraṃ brāhmaṇakulaṃ upasaṅkamitvā okāsaṃ yāciṃsu. Atha kho sā brāhmaṇī tā bhikkhuniyo etadavoca – ‘‘āgametha, ayye, yāva brāhmaṇo āgacchatī’’ti. Bhikkhuniyo – ‘‘yāva brāhmaṇo āgacchatī’’ti seyyaṃ santharitvā ekaccā nisīdiṃsu ekaccā nipajjiṃsu. Atha kho so brāhmaṇo rattiṃ āgantvā taṃ brāhmaṇiṃ etadavoca – ‘‘kā imā’’ti? ‘‘Bhikkhuniyo, ayyā’’ti. ‘‘Nikkaḍḍhatha imā muṇḍā bandhakiniyo’’ti, gharato nikkaḍḍhāpesi. Atha kho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdissantipi abhinipajjissantipī’’ti…pe… saccaṃ kira, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdantipi abhinipajjantipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdissantipi abhinipajjissantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
865. ‘‘யா பன பி⁴க்கு²னீ விகாலே குலானி உபஸங்கமித்வா ஸாமிகே அனாபுச்சா² ஸெய்யங் ஸந்த²ரித்வா வா ஸந்த²ராபெத்வா வா அபி⁴னிஸீதெ³ய்ய வா அபி⁴னிபஜ்ஜெய்ய வா, பாசித்திய’’ந்தி.
865.‘‘Yāpana bhikkhunī vikāle kulāni upasaṅkamitvā sāmike anāpucchā seyyaṃ santharitvā vā santharāpetvā vā abhinisīdeyya vā abhinipajjeyya vā, pācittiya’’nti.
866. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
866.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
விகாலோ நாம அத்த²ங்க³தே ஸூரியே யாவ அருணுக்³க³மனா.
Vikālo nāma atthaṅgate sūriye yāva aruṇuggamanā.
குலங் நாம சத்தாரி குலானி – க²த்தியகுலங், ப்³ராஹ்மணகுலங், வெஸ்ஸகுலங் ஸுத்³த³குலங். உபஸங்கமித்வாதி தத்த² க³ந்த்வா.
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ suddakulaṃ. Upasaṅkamitvāti tattha gantvā.
ஸாமிகே அனாபுச்சா²தி யோ தஸ்மிங் குலே மனுஸ்ஸோ ஸாமிகோ தா³துங், தங் அனாபுச்சா².
Sāmike anāpucchāti yo tasmiṃ kule manusso sāmiko dātuṃ, taṃ anāpucchā.
ஸெய்யங் நாம அந்தமஸோ பண்ணஸந்தா²ரோபி. ஸந்த²ரித்வாதி ஸயங் ஸந்த²ரித்வா. ஸந்த²ராபெத்வாதி அஞ்ஞங் ஸந்த²ராபெத்வா. அபி⁴னிஸீதெ³ய்யாதி தஸ்மிங் அபி⁴னிஸீத³தி, ஆபத்தி பாசித்தியஸ்ஸ. அபி⁴னிபஜ்ஜெய்யாதி தஸ்மிங் அபி⁴னிபஜ்ஜதி, ஆபத்தி பாசித்தியஸ்ஸ.
Seyyaṃ nāma antamaso paṇṇasanthāropi. Santharitvāti sayaṃ santharitvā. Santharāpetvāti aññaṃ santharāpetvā. Abhinisīdeyyāti tasmiṃ abhinisīdati, āpatti pācittiyassa. Abhinipajjeyyāti tasmiṃ abhinipajjati, āpatti pācittiyassa.
867. அனாபுச்சி²தே அனாபுச்சி²தஸஞ்ஞா ஸெய்யங் ஸந்த²ரித்வா வா ஸந்த²ராபெத்வா வா அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ. அனாபுச்சி²தே வேமதிகா ஸெய்யங் ஸந்த²ரித்வா வா ஸந்த²ராபெத்வா வா அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ. அனாபுச்சி²தே ஆபுச்சி²தஸஞ்ஞா ஸெய்யங் ஸந்த²ரித்வா வா ஸந்த²ராபெத்வா வா அபி⁴னிஸீத³தி வா அபி⁴னிபஜ்ஜதி வா, ஆபத்தி பாசித்தியஸ்ஸ.
867. Anāpucchite anāpucchitasaññā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite vematikā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite āpucchitasaññā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa.
ஆபுச்சி²தே அனாபுச்சி²தஸஞ்ஞா, ஆபத்தி து³க்கடஸ்ஸ. ஆபுச்சி²தே வேமதிகா, ஆபத்தி து³க்கடஸ்ஸ. ஆபுச்சி²தே ஆபுச்சி²தஸஞ்ஞா, அனாபத்தி.
Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti.
868. அனாபத்தி ஆபுச்சா² ஸெய்யங் ஸந்த²ரித்வா வா ஸந்த²ராபெத்வா வா அபி⁴னிஸீத³தி வா அபி⁴னிபஜ்ஜதி வா, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
868. Anāpatti āpucchā seyyaṃ santharitvā vā santharāpetvā vā abhinisīdati vā abhinipajjati vā, gilānāya, āpadāsu, ummattikāya, ādikammikāyāti.
ஸத்தமஸிக்கா²பத³ங் நிட்டி²தங்.
Sattamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 7. ஸத்தமஸிக்கா²பத³வண்ணனா • 7. Sattamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. அந்த⁴காரவக்³க³வண்ணனா • 2. Andhakāravaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. ஸத்தமஸிக்கா²பத³வண்ணனா • 7. Sattamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. ஸத்தமஸிக்கா²பத³ங் • 7. Sattamasikkhāpadaṃ
