| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
7. ஸத்தமஸிக்கா²பத³ங்
7. Sattamasikkhāpadaṃ
1003. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ ஆவஸத²சீவரங் அனிஸ்ஸஜ்ஜித்வா பரிபு⁴ஞ்ஜதி. அஞ்ஞா உதுனியோ பி⁴க்கு²னியோ ந லப⁴ந்தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ ஆவஸத²சீவரங் அனிஸ்ஸஜ்ஜித்வா பரிபு⁴ஞ்ஜிஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ஆவஸத²சீவரங் அனிஸ்ஸஜ்ஜித்வா பரிபு⁴ஞ்ஜதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ஆவஸத²சீவரங் அனிஸ்ஸஜ்ஜித்வா பரிபு⁴ஞ்ஜிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1003. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī āvasathacīvaraṃ anissajjitvā paribhuñjati. Aññā utuniyo bhikkhuniyo na labhanti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā āvasathacīvaraṃ anissajjitvā paribhuñjissatī’’ti…pe… saccaṃ kira, bhikkhave, thullanandā bhikkhunī āvasathacīvaraṃ anissajjitvā paribhuñjatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī āvasathacīvaraṃ anissajjitvā paribhuñjissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1004. ‘‘யா பன பி⁴க்கு²னீ ஆவஸத²சீவரங் அனிஸ்ஸஜ்ஜித்வா பரிபு⁴ஞ்ஜெய்ய, பாசித்திய’’ந்தி.
1004.‘‘Yā pana bhikkhunī āvasathacīvaraṃ anissajjitvā paribhuñjeyya, pācittiya’’nti.
1005. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1005.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஆவஸத²சீவரங் நாம ‘‘உதுனியோ பி⁴க்கு²னியோ பரிபு⁴ஞ்ஜந்தூ’’தி தி³ன்னங் ஹோதி.
Āvasathacīvaraṃ nāma ‘‘utuniyo bhikkhuniyo paribhuñjantū’’ti dinnaṃ hoti.
அனிஸ்ஸஜ்ஜித்வா பரிபு⁴ஞ்ஜெய்யாதி த்³வேதிஸ்ஸோ ரத்தியோ பரிபு⁴ஞ்ஜித்வா சதுத்த²தி³வஸே தோ⁴வித்வா பி⁴க்கு²னியா வா ஸிக்க²மானாய வா ஸாமணேரியா வா அனிஸ்ஸஜ்ஜித்வா பரிபு⁴ஞ்ஜதி , ஆபத்தி பாசித்தியஸ்ஸ.
Anissajjitvā paribhuñjeyyāti dvetisso rattiyo paribhuñjitvā catutthadivase dhovitvā bhikkhuniyā vā sikkhamānāya vā sāmaṇeriyā vā anissajjitvā paribhuñjati , āpatti pācittiyassa.
1006. அனிஸ்ஸஜ்ஜிதே அனிஸ்ஸஜ்ஜிதஸஞ்ஞா பரிபு⁴ஞ்ஜதி, ஆபத்தி பாசித்தியஸ்ஸ. அனிஸ்ஸஜ்ஜிதே வேமதிகா பரிபு⁴ஞ்ஜதி, ஆபத்தி பாசித்தியஸ்ஸ. அனிஸ்ஸஜ்ஜிதே நிஸ்ஸஜ்ஜிதஸஞ்ஞா பரிபு⁴ஞ்ஜதி, ஆபத்தி பாசித்தியஸ்ஸ.
1006. Anissajjite anissajjitasaññā paribhuñjati, āpatti pācittiyassa. Anissajjite vematikā paribhuñjati, āpatti pācittiyassa. Anissajjite nissajjitasaññā paribhuñjati, āpatti pācittiyassa.
நிஸ்ஸஜ்ஜிதே அனிஸ்ஸஜ்ஜிதஸஞ்ஞா, ஆபத்தி து³க்கடஸ்ஸ. நிஸ்ஸஜ்ஜிதே வேமதிகா, ஆபத்தி து³க்கடஸ்ஸ. நிஸ்ஸஜ்ஜிதே நிஸ்ஸஜ்ஜிதஸஞ்ஞா அனாபத்தி.
Nissajjite anissajjitasaññā, āpatti dukkaṭassa. Nissajjite vematikā, āpatti dukkaṭassa. Nissajjite nissajjitasaññā anāpatti.
1007. அனாபத்தி நிஸ்ஸஜ்ஜித்வா பரிபு⁴ஞ்ஜதி, புன பரியாயேன பரிபு⁴ஞ்ஜதி, அஞ்ஞா உதுனியோ பி⁴க்கு²னியோ ந ஹொந்தி, அச்சி²ன்னசீவரிகாய, நட்ட²சீவரிகாய, ஆபதா³ஸு, உம்மத்திகாய, ஆதி³கம்மிகாயாதி.
1007. Anāpatti nissajjitvā paribhuñjati, puna pariyāyena paribhuñjati, aññā utuniyo bhikkhuniyo na honti, acchinnacīvarikāya, naṭṭhacīvarikāya, āpadāsu, ummattikāya, ādikammikāyāti.
ஸத்தமஸிக்கா²பத³ங் நிட்டி²தங்.
Sattamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 7. ஸத்தமஸிக்கா²பத³வண்ணனா • 7. Sattamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. ச²ட்ட²ஸிக்கா²பத³வண்ணனா • 6. Chaṭṭhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. ஸத்தமஸிக்கா²பத³ங் • 7. Sattamasikkhāpadaṃ
