| Library / Tipiṭaka / তিপিটক • Tipiṭaka / ভিক্খুনীৰিভঙ্গ • Bhikkhunīvibhaṅga |
৭. সত্তমসিক্খাপদং
7. Sattamasikkhāpadaṃ
৮২০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ভিক্খুনিযো সস্সকালে আমকধঞ্ঞং ৰিঞ্ঞাপেত্ৰা নগরং অতিহরন্তি দ্ৰারট্ঠানে – ‘‘দেথায্যে, ভাগ’’ন্তি। পলিবুন্ধেত্ৰা মুঞ্চিংসু। অথ খো তা ভিক্খুনিযো উপস্সযং গন্ত্ৰা ভিক্খুনীনং এতমত্থং আরোচেসুং। যা তা ভিক্খুনিযো অপ্পিচ্ছা…পে॰… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো আমকধঞ্ঞং ৰিঞ্ঞাপেস্সন্তী’’তি…পে॰… সচ্চং কির, ভিক্খৰে, ভিক্খুনিযো আমকধঞ্ঞং ৰিঞ্ঞাপেন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম, ভিক্খৰে, ভিক্খুনিযো আমকধঞ্ঞং ৰিঞ্ঞাপেস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –
820. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo sassakāle āmakadhaññaṃ viññāpetvā nagaraṃ atiharanti dvāraṭṭhāne – ‘‘dethāyye, bhāga’’nti. Palibundhetvā muñciṃsu. Atha kho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo āmakadhaññaṃ viññāpessantī’’ti…pe… saccaṃ kira, bhikkhave, bhikkhuniyo āmakadhaññaṃ viññāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo āmakadhaññaṃ viññāpessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
৮২১. ‘‘যা পন ভিক্খুনী আমকধঞ্ঞং ৰিঞ্ঞত্ৰা ৰা ৰিঞ্ঞাপেত্ৰা ৰা ভজ্জিত্ৰা ৰা ভজ্জাপেত্ৰা ৰা কোট্টেত্ৰা ৰা কোট্টাপেত্ৰা ৰা পচিত্ৰা ৰা পচাপেত্ৰা ৰা ভুঞ্জেয্য, পাচিত্তিয’’ন্তি।
821.‘‘Yā pana bhikkhunī āmakadhaññaṃ viññatvā vā viññāpetvā vā bhajjitvā vā bhajjāpetvā vā koṭṭetvā vā koṭṭāpetvā vā pacitvā vā pacāpetvā vā bhuñjeyya, pācittiya’’nti.
৮২২. যা পনাতি যা যাদিসা…পে॰… ভিক্খুনীতি…পে॰… অযং ইমস্মিং অত্থে অধিপ্পেতা ভিক্খুনীতি।
822.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
আমকধঞ্ঞং নাম সালি ৰীহি যৰো গোধুমো কঙ্গু ৰরকো কুদ্রুসকো।
Āmakadhaññaṃ nāma sāli vīhi yavo godhumo kaṅgu varako kudrusako.
ৰিঞ্ঞত্ৰাতি সযং ৰিঞ্ঞত্ৰা। ৰিঞ্ঞাপেত্ৰাতি অঞ্ঞং ৰিঞ্ঞাপেত্ৰা।
Viññatvāti sayaṃ viññatvā. Viññāpetvāti aññaṃ viññāpetvā.
ভজ্জিত্ৰাতি সযং ভজ্জিত্ৰা। ভজ্জাপেত্ৰাতি অঞ্ঞং ভজ্জাপেত্ৰা।
Bhajjitvāti sayaṃ bhajjitvā. Bhajjāpetvāti aññaṃ bhajjāpetvā.
কোট্টেত্ৰাতি সযং কোট্টেত্ৰা। কোট্টাপেত্ৰাতি অঞ্ঞং কোট্টাপেত্ৰা।
Koṭṭetvāti sayaṃ koṭṭetvā. Koṭṭāpetvāti aññaṃ koṭṭāpetvā.
পচিত্ৰাতি সযং পচিত্ৰা। পচাপেত্ৰাতি অঞ্ঞং পচাপেত্ৰা।
Pacitvāti sayaṃ pacitvā. Pacāpetvāti aññaṃ pacāpetvā.
‘‘ভুঞ্জিস্সামী’’তি পটিগ্গণ্হাতি , আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
‘‘Bhuñjissāmī’’ti paṭiggaṇhāti , āpatti dukkaṭassa. Ajjhohāre ajjhohāre āpatti pācittiyassa.
৮২৩. অনাপত্তি আবাধপচ্চযা, অপরণ্ণং ৰিঞ্ঞাপেতি, উম্মত্তিকায, আদিকম্মিকাযাতি।
823. Anāpatti ābādhapaccayā, aparaṇṇaṃ viññāpeti, ummattikāya, ādikammikāyāti.
সত্তমসিক্খাপদং নিট্ঠিতং।
Sattamasikkhāpadaṃ niṭṭhitaṃ.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / ভিক্খুনীৰিভঙ্গ-অট্ঠকথা • Bhikkhunīvibhaṅga-aṭṭhakathā / ৭. সত্তমসিক্খাপদৰণ্ণনা • 7. Sattamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১. লসুণৰগ্গৰণ্ণনা • 1. Lasuṇavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৭. সত্তমসিক্খাপদৰণ্ণনা • 7. Sattamasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমলসুণাদিসিক্খাপদৰণ্ণনা • 1. Paṭhamalasuṇādisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. সত্তমসিক্খাপদং • 7. Sattamasikkhāpadaṃ
