| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
7. සත්‌තමසික්‌ඛාපදං
7. Sattamasikkhāpadaṃ
864. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන සම්‌බහුලා භික්‌ඛුනියො කොසලෙසු ජනපදෙ සාවත්‌ථිං ගච්‌ඡන්‌තියො සායං අඤ්‌ඤතරං ගාමං උපගන්‌ත්‌වා අඤ්‌ඤතරං බ්‍රාහ්‌මණකුලං උපසඞ්‌කමිත්‌වා ඔකාසං යාචිංසු. අථ ඛො සා බ්‍රාහ්‌මණී තා භික්‌ඛුනියො එතදවොච – ‘‘ආගමෙථ, අය්‍යෙ, යාව බ්‍රාහ්‌මණො ආගච්‌ඡතී’’ති. භික්‌ඛුනියො – ‘‘යාව බ්‍රාහ්‌මණො ආගච්‌ඡතී’’ති සෙය්‍යං සන්‌ථරිත්‌වා එකච්‌චා නිසීදිංසු එකච්‌චා නිපජ්‌ජිංසු. අථ ඛො සො බ්‍රාහ්‌මණො රත්‌තිං ආගන්‌ත්‌වා තං බ්‍රාහ්‌මණිං එතදවොච – ‘‘කා ඉමා’’ති? ‘‘භික්‌ඛුනියො, අය්‍යා’’ති. ‘‘නික්‌කඩ්‌ඪථ ඉමා මුණ්‌ඩා බන්‌ධකිනියො’’ති, ඝරතො නික්‌කඩ්‌ඪාපෙසි. අථ ඛො තා භික්‌ඛුනියො සාවත්‌ථිං ගන්‌ත්‌වා භික්‌ඛුනීනං එතමත්‌ථං ආරොචෙසුං. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො විකාලෙ කුලානි උපසඞ්‌කමිත්‌වා සාමිකෙ අනාපුච්‌ඡා සෙය්‍යං සන්‌ථරිත්‌වා අභිනිසීදිස්‌සන්‌තිපි අභිනිපජ්‌ජිස්‌සන්‌තිපී’’ති…පෙ.… සච්‌චං කිර, භික්‌ඛවෙ, භික්‌ඛුනියො විකාලෙ කුලානි උපසඞ්‌කමිත්‌වා සාමිකෙ අනාපුච්‌ඡා සෙය්‍යං සන්‌ථරිත්‌වා අභිනිසීදන්‌තිපි අභිනිපජ්‌ජන්‌තිපීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, භික්‌ඛුනියො විකාලෙ කුලානි උපසඞ්‌කමිත්‌වා සාමිකෙ අනාපුච්‌ඡා සෙය්‍යං සන්‌ථරිත්‌වා අභිනිසීදිස්‌සන්‌තිපි අභිනිපජ්‌ජිස්‌සන්‌තිපි! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
864. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhuniyo kosalesu janapade sāvatthiṃ gacchantiyo sāyaṃ aññataraṃ gāmaṃ upagantvā aññataraṃ brāhmaṇakulaṃ upasaṅkamitvā okāsaṃ yāciṃsu. Atha kho sā brāhmaṇī tā bhikkhuniyo etadavoca – ‘‘āgametha, ayye, yāva brāhmaṇo āgacchatī’’ti. Bhikkhuniyo – ‘‘yāva brāhmaṇo āgacchatī’’ti seyyaṃ santharitvā ekaccā nisīdiṃsu ekaccā nipajjiṃsu. Atha kho so brāhmaṇo rattiṃ āgantvā taṃ brāhmaṇiṃ etadavoca – ‘‘kā imā’’ti? ‘‘Bhikkhuniyo, ayyā’’ti. ‘‘Nikkaḍḍhatha imā muṇḍā bandhakiniyo’’ti, gharato nikkaḍḍhāpesi. Atha kho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdissantipi abhinipajjissantipī’’ti…pe… saccaṃ kira, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdantipi abhinipajjantipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdissantipi abhinipajjissantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
865. ‘‘යා පන භික්‌ඛුනී විකාලෙ කුලානි උපසඞ්‌කමිත්‌වා සාමිකෙ අනාපුච්‌ඡා සෙය්‍යං සන්‌ථරිත්‌වා වා සන්‌ථරාපෙත්‌වා වා අභිනිසීදෙය්‍ය වා අභිනිපජ්‌ජෙය්‍ය වා, පාචිත්‌තිය’’න්‌ති.
865.‘‘Yāpana bhikkhunī vikāle kulāni upasaṅkamitvā sāmike anāpucchā seyyaṃ santharitvā vā santharāpetvā vā abhinisīdeyya vā abhinipajjeyya vā, pācittiya’’nti.
866. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
866.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
විකාලො නාම අත්‌ථඞ්‌ගතෙ සූරියෙ යාව අරුණුග්‌ගමනා.
Vikālo nāma atthaṅgate sūriye yāva aruṇuggamanā.
කුලං නාම චත්‌තාරි කුලානි – ඛත්‌තියකුලං, බ්‍රාහ්‌මණකුලං, වෙස්‌සකුලං සුද්‌දකුලං. උපසඞ්‌කමිත්‌වාති තත්‌ථ ගන්‌ත්‌වා.
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ suddakulaṃ. Upasaṅkamitvāti tattha gantvā.
සාමිකෙ අනාපුච්‌ඡාති යො තස්‌මිං කුලෙ මනුස්‌සො සාමිකො දාතුං, තං අනාපුච්‌ඡා.
Sāmike anāpucchāti yo tasmiṃ kule manusso sāmiko dātuṃ, taṃ anāpucchā.
සෙය්‍යං නාම අන්‌තමසො පණ්‌ණසන්‌ථාරොපි. සන්‌ථරිත්‌වාති සයං සන්‌ථරිත්‌වා. සන්‌ථරාපෙත්‌වාති අඤ්‌ඤං සන්‌ථරාපෙත්‌වා. අභිනිසීදෙය්‍යාති තස්‌මිං අභිනිසීදති, ආපත්‌ති පාචිත්‌තියස්‌ස. අභිනිපජ්‌ජෙය්‍යාති තස්‌මිං අභිනිපජ්‌ජති, ආපත්‌ති පාචිත්‌තියස්‌ස.
Seyyaṃ nāma antamaso paṇṇasanthāropi. Santharitvāti sayaṃ santharitvā. Santharāpetvāti aññaṃ santharāpetvā. Abhinisīdeyyāti tasmiṃ abhinisīdati, āpatti pācittiyassa. Abhinipajjeyyāti tasmiṃ abhinipajjati, āpatti pācittiyassa.
867. අනාපුච්‌ඡිතෙ අනාපුච්‌ඡිතසඤ්‌ඤා සෙය්‍යං සන්‌ථරිත්‌වා වා සන්‌ථරාපෙත්‌වා වා අභිනිසීදති වා අභිනිපජ්‌ජති වා, ආපත්‌ති පාචිත්‌තියස්‌ස. අනාපුච්‌ඡිතෙ වෙමතිකා සෙය්‍යං සන්‌ථරිත්‌වා වා සන්‌ථරාපෙත්‌වා වා අභිනිසීදති වා අභිනිපජ්‌ජති වා, ආපත්‌ති පාචිත්‌තියස්‌ස. අනාපුච්‌ඡිතෙ ආපුච්‌ඡිතසඤ්‌ඤා සෙය්‍යං සන්‌ථරිත්‌වා වා සන්‌ථරාපෙත්‌වා වා අභිනිසීදති වා අභිනිපජ්‌ජති වා, ආපත්‌ති පාචිත්‌තියස්‌ස.
867. Anāpucchite anāpucchitasaññā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite vematikā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite āpucchitasaññā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa.
ආපුච්‌ඡිතෙ අනාපුච්‌ඡිතසඤ්‌ඤා, ආපත්‌ති දුක්‌කටස්‌ස. ආපුච්‌ඡිතෙ වෙමතිකා, ආපත්‌ති දුක්‌කටස්‌ස. ආපුච්‌ඡිතෙ ආපුච්‌ඡිතසඤ්‌ඤා, අනාපත්‌ති.
Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti.
868. අනාපත්‌ති ආපුච්‌ඡා සෙය්‍යං සන්‌ථරිත්‌වා වා සන්‌ථරාපෙත්‌වා වා අභිනිසීදති වා අභිනිපජ්‌ජති වා, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
868. Anāpatti āpucchā seyyaṃ santharitvā vā santharāpetvā vā abhinisīdati vā abhinipajjati vā, gilānāya, āpadāsu, ummattikāya, ādikammikāyāti.
සත්‌තමසික්‌ඛාපදං නිට්‌ඨිතං.
Sattamasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 7. සත්‌තමසික්‌ඛාපදවණ්‌ණනා • 7. Sattamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 2. අන්‌ධකාරවග්‌ගවණ්‌ණනා • 2. Andhakāravaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 7. සත්‌තමසික්‌ඛාපදවණ්‌ණනා • 7. Sattamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. සත්‌තමසික්‌ඛාපදං • 7. Sattamasikkhāpadaṃ
