| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
7. සත්‌තමසික්‌ඛාපදං
7. Sattamasikkhāpadaṃ
911. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භික්‌ඛුනිසඞ්‌ඝස්‌ස අකාලචීවරං උප්‌පන්‌නං හොති. අථ ඛො භික්‌ඛුනිසඞ්‌ඝො තං චීවරං භාජෙතුකාමො සන්‌නිපති. තෙන ඛො පන සමයෙන ථුල්‌ලනන්‌දාය භික්‌ඛුනියා අන්‌තෙවාසිනියො භික්‌ඛුනියො පක්‌කන්‌තා හොන්‌ති. ථුල්‌ලනන්‌දා භික්‌ඛුනී තා භික්‌ඛුනියො එතදවොච – ‘‘අය්‍යෙ, භික්‌ඛුනියො පක්‌කන්‌තා, න තාව චීවරං භාජීයිස්‌සතී’’ති. චීවරවිභඞ්‌ගං පටිබාහි. භික්‌ඛුනියො න තාව චීවරං භාජීයිස්‌සතීති පක්‌කමිංසු 1. ථුල්‌ලනන්‌දා භික්‌ඛුනී අන්‌තෙවාසිනීසු භික්‌ඛුනීසු ආගතාසු තං චීවරං භාජාපෙසි. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා ධම්‌මිකං චීවරවිභඞ්‌ගං පටිබාහිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී ධම්‌මිකං චීවරවිභඞ්‌ගං පටිබාහතීති 2? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී ධම්‌මිකං චීවරවිභඞ්‌ගං පටිබාහිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
911. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhunisaṅghassa akālacīvaraṃ uppannaṃ hoti. Atha kho bhikkhunisaṅgho taṃ cīvaraṃ bhājetukāmo sannipati. Tena kho pana samayena thullanandāya bhikkhuniyā antevāsiniyo bhikkhuniyo pakkantā honti. Thullanandā bhikkhunī tā bhikkhuniyo etadavoca – ‘‘ayye, bhikkhuniyo pakkantā, na tāva cīvaraṃ bhājīyissatī’’ti. Cīvaravibhaṅgaṃ paṭibāhi. Bhikkhuniyo na tāva cīvaraṃ bhājīyissatīti pakkamiṃsu 3. Thullanandā bhikkhunī antevāsinīsu bhikkhunīsu āgatāsu taṃ cīvaraṃ bhājāpesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā dhammikaṃ cīvaravibhaṅgaṃ paṭibāhissatī’’ti…pe… saccaṃ kira, bhikkhave, thullanandā bhikkhunī dhammikaṃ cīvaravibhaṅgaṃ paṭibāhatīti 4? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī dhammikaṃ cīvaravibhaṅgaṃ paṭibāhissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
912. ‘‘යා පන භික්‌ඛුනී ධම්‌මිකං චීවරවිභඞ්‌ගං පටිබාහෙය්‍ය, පාචිත්‌තිය’’න්‌ති.
912.‘‘Yā pana bhikkhunī dhammikaṃ cīvaravibhaṅgaṃpaṭibāheyya, pācittiya’’nti.
913. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
913.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ධම්‌මිකොනාම චීවරවිභඞ්‌ගො සමග්‌ගො භික්‌ඛුනිසඞ්‌ඝො සන්‌නිපතිත්‌වා භාජෙති.
Dhammikonāma cīvaravibhaṅgo samaggo bhikkhunisaṅgho sannipatitvā bhājeti.
පටිබාහෙය්‍යාති කථං ඉමං චීවරං න භාජෙය්‍යාති 5 පටිබාහති, ආපත්‌ති පාචිත්‌තියස්‌ස.
Paṭibāheyyāti kathaṃ imaṃ cīvaraṃ na bhājeyyāti 6 paṭibāhati, āpatti pācittiyassa.
914. ධම්‌මිකෙ ධම්‌මිකසඤ්‌ඤා පටිබාහති, ආපත්‌ති පාචිත්‌තියස්‌ස. ධම්‌මිකෙ වෙමතිකා පටිබාහති, ආපත්‌ති දුක්‌කටස්‌ස. ධම්‌මිකෙ අධම්‌මිකසඤ්‌ඤා පටිබාහති, අනාපත්‌ති. අධම්‌මිකෙ ධම්‌මිකසඤ්‌ඤා, ආපත්‌ති දුක්‌කටස්‌ස. අධම්‌මිකෙ වෙමතිකා, ආපත්‌ති දුක්‌කටස්‌ස. අධම්‌මිකෙ අධම්‌මිකසඤ්‌ඤා, අනාපත්‌ති.
914. Dhammike dhammikasaññā paṭibāhati, āpatti pācittiyassa. Dhammike vematikā paṭibāhati, āpatti dukkaṭassa. Dhammike adhammikasaññā paṭibāhati, anāpatti. Adhammike dhammikasaññā, āpatti dukkaṭassa. Adhammike vematikā, āpatti dukkaṭassa. Adhammike adhammikasaññā, anāpatti.
915. අනාපත්‌ති ආනිසංසං දස්‌සෙත්‌වා පටිබාහති, උම්‌මත්‌තිකාය, ආදිකම්‌මිකායාති.
915. Anāpatti ānisaṃsaṃ dassetvā paṭibāhati, ummattikāya, ādikammikāyāti.
සත්‌තමසික්‌ඛාපදං නිට්‌ඨිතං.
Sattamasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 7. සත්‌තමසික්‌ඛාපදවණ්‌ණනා • 7. Sattamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නග්‌ගවග්‌ගවණ්‌ණනා • 3. Naggavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 5. පඤ්‌චමසික්‌ඛාපදවණ්‌ණනා • 5. Pañcamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. සත්‌තමසික්‌ඛාපදං • 7. Sattamasikkhāpadaṃ
