| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
7. සත්‌තමසික්‌ඛාපදං
7. Sattamasikkhāpadaṃ
961. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භික්‌ඛුනියො අන්‌තොරට්‌ඨෙ සාසඞ්‌කසම්‌මතෙ සප්‌පටිභයෙ අසත්‌ථිකා චාරිකං චරන්‌ති. ධුත්‌තා දූසෙන්‌ති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො අන්‌තොරට්‌ඨෙ සාසඞ්‌කසම්‌මතෙ සප්‌පටිභයෙ අසත්‌ථිකා චාරිකං චරිස්‌සන්‌තී’’ති…පෙ.… සච්‌චං කිර, භික්‌ඛවෙ, භික්‌ඛුනියො අන්‌තොරට්‌ඨෙ සාසඞ්‌කසම්‌මතෙ සප්‌පටිභයෙ අසත්‌ථිකා චාරිකං චරන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, භික්‌ඛුනියො අන්‌තොරට්‌ඨෙ සාසඞ්‌කසම්‌මතෙ සප්‌පටිභයෙ අසත්‌ථිකා චාරිකං චරිස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
961. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo antoraṭṭhe sāsaṅkasammate sappaṭibhaye asatthikā cārikaṃ caranti. Dhuttā dūsenti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo antoraṭṭhe sāsaṅkasammate sappaṭibhaye asatthikā cārikaṃ carissantī’’ti…pe… saccaṃ kira, bhikkhave, bhikkhuniyo antoraṭṭhe sāsaṅkasammate sappaṭibhaye asatthikā cārikaṃ carantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo antoraṭṭhe sāsaṅkasammate sappaṭibhaye asatthikā cārikaṃ carissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
962. ‘‘යා පන භික්‌ඛුනී අන්‌තොරට්‌ඨෙ සාසඞ්‌කසම්‌මතෙ සප්‌පටිභයෙ අසත්‌ථිකා චාරිකං චරෙය්‍ය, පාචිත්‌තිය’’න්‌ති.
962.‘‘Yā pana bhikkhunī antoraṭṭhe sāsaṅkasammate sappaṭibhaye asatthikā cārikaṃ careyya, pācittiya’’nti.
963. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
963.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අන්‌තොරට්‌ඨෙති යස්‌ස විජිතෙ විහරති, තස්‌ස රට්‌ඨෙ.
Antoraṭṭheti yassa vijite viharati, tassa raṭṭhe.
සාසඞ්‌කං නාම තස්‌මිං මග්‌ගෙ චොරානං නිවිට්‌ඨොකාසො දිස්‌සති, භුත්‌තොකාසො දිස්‌සති, ඨිතොකාසො දිස්‌සති, නිසින්‌නොකාසො දිස්‌සති, නිපන්‌නොකාසො දිස්‌සති.
Sāsaṅkaṃ nāma tasmiṃ magge corānaṃ niviṭṭhokāso dissati, bhuttokāso dissati, ṭhitokāso dissati, nisinnokāso dissati, nipannokāso dissati.
සප්‌පටිභයං නාම තස්‌මිං මග්‌ගෙ චොරෙහි මනුස්‌සා හතා දිස්‌සන්‌ති, විලුත්‌තා දිස්‌සන්‌ති, ආකොටිතා දිස්‌සන්‌ති.
Sappaṭibhayaṃ nāma tasmiṃ magge corehi manussā hatā dissanti, viluttā dissanti, ākoṭitā dissanti.
අසත්‌ථිකා නාම විනා සත්‌ථෙන.
Asatthikā nāma vinā satthena.
චාරිකං චරෙය්‍යාති කුක්‌කුටසම්‌පාතෙ ගාමෙ ගාමන්‌තරෙ ගාමන්‌තරෙ ආපත්‌ති පාචිත්‌තියස්‌ස. අගාමකෙ අරඤ්‌ඤෙ අද්‌ධයොජනෙ අද්‌ධයොජනෙ ආපත්‌ති පාචිත්‌තියස්‌ස.
Cārikaṃ careyyāti kukkuṭasampāte gāme gāmantare gāmantare āpatti pācittiyassa. Agāmake araññe addhayojane addhayojane āpatti pācittiyassa.
964. අනාපත්‌ති සත්‌ථෙන සහ ගච්‌ඡති, ඛෙමෙ අප්‌පටිභයෙ ගච්‌ඡති, ආපදාසු, උම්‌මත්‌තිකාය, ආදිකම්‌මිකායාති.
964. Anāpatti satthena saha gacchati, kheme appaṭibhaye gacchati, āpadāsu, ummattikāya, ādikammikāyāti.
සත්‌තමසික්‌ඛාපදං නිට්‌ඨිතං.
Sattamasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 7-8-9. සත්‌තමඅට්‌ඨමනවමසික්‌ඛාපදවණ්‌ණනා • 7-8-9. Sattamaaṭṭhamanavamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
