| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
7. සත්‌තමසික්‌ඛාපදං
7. Sattamasikkhāpadaṃ
1003. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ථුල්‌ලනන්‌දා භික්‌ඛුනී ආවසථචීවරං අනිස්‌සජ්‌ජිත්‌වා පරිභුඤ්‌ජති. අඤ්‌ඤා උතුනියො භික්‌ඛුනියො න ලභන්‌ති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා ථුල්‌ලනන්‌දා ආවසථචීවරං අනිස්‌සජ්‌ජිත්‌වා පරිභුඤ්‌ජිස්‌සතී’’ති…පෙ.… සච්‌චං කිර, භික්‌ඛවෙ, ථුල්‌ලනන්‌දා භික්‌ඛුනී ආවසථචීවරං අනිස්‌සජ්‌ජිත්‌වා පරිභුඤ්‌ජතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ථුල්‌ලනන්‌දා භික්‌ඛුනී ආවසථචීවරං අනිස්‌සජ්‌ජිත්‌වා පරිභුඤ්‌ජිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1003. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī āvasathacīvaraṃ anissajjitvā paribhuñjati. Aññā utuniyo bhikkhuniyo na labhanti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā āvasathacīvaraṃ anissajjitvā paribhuñjissatī’’ti…pe… saccaṃ kira, bhikkhave, thullanandā bhikkhunī āvasathacīvaraṃ anissajjitvā paribhuñjatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī āvasathacīvaraṃ anissajjitvā paribhuñjissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1004. ‘‘යා පන භික්‌ඛුනී ආවසථචීවරං අනිස්‌සජ්‌ජිත්‌වා පරිභුඤ්‌ජෙය්‍ය, පාචිත්‌තිය’’න්‌ති.
1004.‘‘Yā pana bhikkhunī āvasathacīvaraṃ anissajjitvā paribhuñjeyya, pācittiya’’nti.
1005. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1005.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ආවසථචීවරං නාම ‘‘උතුනියො භික්‌ඛුනියො පරිභුඤ්‌ජන්‌තූ’’ති දින්‌නං හොති.
Āvasathacīvaraṃ nāma ‘‘utuniyo bhikkhuniyo paribhuñjantū’’ti dinnaṃ hoti.
අනිස්‌සජ්‌ජිත්‌වා පරිභුඤ්‌ජෙය්‍යාති ද්‌වෙතිස්‌සො රත්‌තියො පරිභුඤ්‌ජිත්‌වා චතුත්‌ථදිවසෙ ධොවිත්‌වා භික්‌ඛුනියා වා සික්‌ඛමානාය වා සාමණෙරියා වා අනිස්‌සජ්‌ජිත්‌වා පරිභුඤ්‌ජති , ආපත්‌ති පාචිත්‌තියස්‌ස.
Anissajjitvā paribhuñjeyyāti dvetisso rattiyo paribhuñjitvā catutthadivase dhovitvā bhikkhuniyā vā sikkhamānāya vā sāmaṇeriyā vā anissajjitvā paribhuñjati , āpatti pācittiyassa.
1006. අනිස්‌සජ්‌ජිතෙ අනිස්‌සජ්‌ජිතසඤ්‌ඤා පරිභුඤ්‌ජති, ආපත්‌ති පාචිත්‌තියස්‌ස. අනිස්‌සජ්‌ජිතෙ වෙමතිකා පරිභුඤ්‌ජති, ආපත්‌ති පාචිත්‌තියස්‌ස. අනිස්‌සජ්‌ජිතෙ නිස්‌සජ්‌ජිතසඤ්‌ඤා පරිභුඤ්‌ජති, ආපත්‌ති පාචිත්‌තියස්‌ස.
1006. Anissajjite anissajjitasaññā paribhuñjati, āpatti pācittiyassa. Anissajjite vematikā paribhuñjati, āpatti pācittiyassa. Anissajjite nissajjitasaññā paribhuñjati, āpatti pācittiyassa.
නිස්‌සජ්‌ජිතෙ අනිස්‌සජ්‌ජිතසඤ්‌ඤා, ආපත්‌ති දුක්‌කටස්‌ස. නිස්‌සජ්‌ජිතෙ වෙමතිකා, ආපත්‌ති දුක්‌කටස්‌ස. නිස්‌සජ්‌ජිතෙ නිස්‌සජ්‌ජිතසඤ්‌ඤා අනාපත්‌ති.
Nissajjite anissajjitasaññā, āpatti dukkaṭassa. Nissajjite vematikā, āpatti dukkaṭassa. Nissajjite nissajjitasaññā anāpatti.
1007. අනාපත්‌ති නිස්‌සජ්‌ජිත්‌වා පරිභුඤ්‌ජති, පුන පරියායෙන පරිභුඤ්‌ජති, අඤ්‌ඤා උතුනියො භික්‌ඛුනියො න හොන්‌ති, අච්‌ඡින්‌නචීවරිකාය, නට්‌ඨචීවරිකාය, ආපදාසු, උම්‌මත්‌තිකාය, ආදිකම්‌මිකායාති.
1007. Anāpatti nissajjitvā paribhuñjati, puna pariyāyena paribhuñjati, aññā utuniyo bhikkhuniyo na honti, acchinnacīvarikāya, naṭṭhacīvarikāya, āpadāsu, ummattikāya, ādikammikāyāti.
සත්‌තමසික්‌ඛාපදං නිට්‌ඨිතං.
Sattamasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 7. සත්‌තමසික්‌ඛාපදවණ්‌ණනා • 7. Sattamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 6. ඡට්‌ඨසික්‌ඛාපදවණ්‌ණනා • 6. Chaṭṭhasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7. සත්‌තමසික්‌ඛාපදං • 7. Sattamasikkhāpadaṃ
