| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
7. සත්‌තමසික්‌ඛාපදං
7. Sattamasikkhāpadaṃ
1050. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන සම්‌බහුලා භික්‌ඛුනියො ගාමකාවාසෙ වස්‌සංවුට්‌ඨා සාවත්‌ථිං අගමංසු. භික්‌ඛුනියො තා භික්‌ඛුනියො එතදවොචුං – ‘‘කත්‌ථාය්‍යායො වස්‌සංවුට්‌ඨා; කත්‌ථ 1 භික්‌ඛුසඞ්‌ඝො පවාරිතො’’ති ? ‘‘න මයං, අය්‍යෙ, භික්‌ඛුසඞ්‌ඝං පවාරෙමා’’ති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො වස්‌සංවුට්‌ඨා භික්‌ඛුසඞ්‌ඝං න පවාරෙස්‌සන්‌තී’’ති…පෙ.… සච්‌චං කිර, භික්‌ඛවෙ, භික්‌ඛුනියො වස්‌සංවුට්‌ඨා භික්‌ඛුසඞ්‌ඝං න පවාරෙන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, භික්‌ඛුනියො වස්‌සංවුට්‌ඨා භික්‌ඛුසඞ්‌ඝං න පවාරෙස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1050. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhuniyo gāmakāvāse vassaṃvuṭṭhā sāvatthiṃ agamaṃsu. Bhikkhuniyo tā bhikkhuniyo etadavocuṃ – ‘‘katthāyyāyo vassaṃvuṭṭhā; kattha 2 bhikkhusaṅgho pavārito’’ti ? ‘‘Na mayaṃ, ayye, bhikkhusaṅghaṃ pavāremā’’ti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo vassaṃvuṭṭhā bhikkhusaṅghaṃ na pavāressantī’’ti…pe… saccaṃ kira, bhikkhave, bhikkhuniyo vassaṃvuṭṭhā bhikkhusaṅghaṃ na pavārentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo vassaṃvuṭṭhā bhikkhusaṅghaṃ na pavāressanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1051. ‘‘යා පන භික්‌ඛුනී වස්‌සංවුට්‌ඨා උභතොසඞ්‌ඝෙ තීහි ඨානෙහි න පවාරෙය්‍ය දිට්‌ඨෙන වා සුතෙන වා පරිසඞ්‌කාය වා, පාචිත්‌තිය’’න්‌ති.
1051.‘‘Yāpana bhikkhunī vassaṃvuṭṭhā ubhatosaṅghe tīhi ṭhānehi na pavāreyya diṭṭhena vā sutena vā parisaṅkāya vā, pācittiya’’nti.
1052. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1052.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
වස්‌සංවුට්‌ඨා නාම පුරිමං වා තෙමාසං පච්‌ඡිමං වා තෙමාසං වුට්‌ඨා. උභතොසඞ්‌ඝෙ තීහි ඨානෙහි න පවාරෙස්‌සාමි දිට්‌ඨෙන වා සුතෙන වා පරිසඞ්‌කාය වා’’ති ධුරං නික්‌ඛිත්‌තමත්‌තෙ ආපත්‌ති පාචිත්‌තියස්‌ස.
Vassaṃvuṭṭhā nāma purimaṃ vā temāsaṃ pacchimaṃ vā temāsaṃ vuṭṭhā. Ubhatosaṅghe tīhi ṭhānehi na pavāressāmi diṭṭhena vā sutena vā parisaṅkāya vā’’ti dhuraṃ nikkhittamatte āpatti pācittiyassa.
1053. අනාපත්‌ති සති අන්‌තරායෙ, පරියෙසිත්‌වා න ලභති, ගිලානාය, ආපදාසු, උම්‌මත්‌තිකාය, ආදිකම්‌මිකායාති.
1053. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
සත්‌තමසික්‌ඛාපදං නිට්‌ඨිතං.
Sattamasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 7. සත්‌තමසික්‌ඛාපදවණ්‌ණනා • 7. Sattamasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 7-9. සත්‌තම-අට්‌ඨම-නවමසික්‌ඛාපදං • 7-9. Sattama-aṭṭhama-navamasikkhāpadaṃ
