| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༧. སཏྟམསིཀྑཱཔདཾ
7. Sattamasikkhāpadaṃ
༨༦༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སམྦཧུལཱ བྷིཀྑུནིཡོ ཀོསལེསུ ཛནཔདེ སཱཝཏྠིཾ གཙྪནྟིཡོ སཱཡཾ ཨཉྙཏརཾ གཱམཾ ཨུཔགནྟྭཱ ཨཉྙཏརཾ བྲཱཧྨཎཀུལཾ ཨུཔསངྐམིཏྭཱ ཨོཀཱསཾ ཡཱཙིཾསུ། ཨཐ ཁོ སཱ བྲཱཧྨཎཱི ཏཱ བྷིཀྑུནིཡོ ཨེཏདཝོཙ – ‘‘ཨཱགམེཐ, ཨཡྻེ, ཡཱཝ བྲཱཧྨཎོ ཨཱགཙྪཏཱི’’ཏི། བྷིཀྑུནིཡོ – ‘‘ཡཱཝ བྲཱཧྨཎོ ཨཱགཙྪཏཱི’’ཏི སེཡྻཾ སནྠརིཏྭཱ ཨེཀཙྩཱ ནིསཱིདིཾསུ ཨེཀཙྩཱ ནིཔཛྫིཾསུ། ཨཐ ཁོ སོ བྲཱཧྨཎོ རཏྟིཾ ཨཱགནྟྭཱ ཏཾ བྲཱཧྨཎིཾ ཨེཏདཝོཙ – ‘‘ཀཱ ཨིམཱ’’ཏི? ‘‘བྷིཀྑུནིཡོ, ཨཡྻཱ’’ཏི། ‘‘ནིཀྐཌྜྷཐ ཨིམཱ མུཎྜཱ བནྡྷཀིནིཡོ’’ཏི, གྷརཏོ ནིཀྐཌྜྷཱཔེསི། ཨཐ ཁོ ཏཱ བྷིཀྑུནིཡོ སཱཝཏྠིཾ གནྟྭཱ བྷིཀྑུནཱིནཾ ཨེཏམཏྠཾ ཨཱརོཙེསུཾ། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནིཡོ ཝིཀཱལེ ཀུལཱནི ཨུཔསངྐམིཏྭཱ སཱམིཀེ ཨནཱཔུཙྪཱ སེཡྻཾ སནྠརིཏྭཱ ཨབྷིནིསཱིདིསྶནྟིཔི ཨབྷིནིཔཛྫིསྶནྟིཔཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནིཡོ ཝིཀཱལེ ཀུལཱནི ཨུཔསངྐམིཏྭཱ སཱམིཀེ ཨནཱཔུཙྪཱ སེཡྻཾ སནྠརིཏྭཱ ཨབྷིནིསཱིདནྟིཔི ཨབྷིནིཔཛྫནྟིཔཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནིཡོ ཝིཀཱལེ ཀུལཱནི ཨུཔསངྐམིཏྭཱ སཱམིཀེ ཨནཱཔུཙྪཱ སེཡྻཾ སནྠརིཏྭཱ ཨབྷིནིསཱིདིསྶནྟིཔི ཨབྷིནིཔཛྫིསྶནྟིཔི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
864. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā bhikkhuniyo kosalesu janapade sāvatthiṃ gacchantiyo sāyaṃ aññataraṃ gāmaṃ upagantvā aññataraṃ brāhmaṇakulaṃ upasaṅkamitvā okāsaṃ yāciṃsu. Atha kho sā brāhmaṇī tā bhikkhuniyo etadavoca – ‘‘āgametha, ayye, yāva brāhmaṇo āgacchatī’’ti. Bhikkhuniyo – ‘‘yāva brāhmaṇo āgacchatī’’ti seyyaṃ santharitvā ekaccā nisīdiṃsu ekaccā nipajjiṃsu. Atha kho so brāhmaṇo rattiṃ āgantvā taṃ brāhmaṇiṃ etadavoca – ‘‘kā imā’’ti? ‘‘Bhikkhuniyo, ayyā’’ti. ‘‘Nikkaḍḍhatha imā muṇḍā bandhakiniyo’’ti, gharato nikkaḍḍhāpesi. Atha kho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdissantipi abhinipajjissantipī’’ti…pe… saccaṃ kira, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdantipi abhinipajjantipīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo vikāle kulāni upasaṅkamitvā sāmike anāpucchā seyyaṃ santharitvā abhinisīdissantipi abhinipajjissantipi! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༦༥. ‘‘ཡཱ པན བྷིཀྑུནཱི ཝིཀཱལེ ཀུལཱནི ཨུཔསངྐམིཏྭཱ སཱམིཀེ ཨནཱཔུཙྪཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདེཡྻ ཝཱ ཨབྷིནིཔཛྫེཡྻ ཝཱ, པཱཙིཏྟིཡ’’ནྟི།
865.‘‘Yāpana bhikkhunī vikāle kulāni upasaṅkamitvā sāmike anāpucchā seyyaṃ santharitvā vā santharāpetvā vā abhinisīdeyya vā abhinipajjeyya vā, pācittiya’’nti.
༨༦༦. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
866.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཝིཀཱལོ ནཱམ ཨཏྠངྒཏེ སཱུརིཡེ ཡཱཝ ཨརུཎུགྒམནཱ།
Vikālo nāma atthaṅgate sūriye yāva aruṇuggamanā.
ཀུལཾ ནཱམ ཙཏྟཱརི ཀུལཱནི – ཁཏྟིཡཀུལཾ, བྲཱཧྨཎཀུལཾ, ཝེསྶཀུལཾ སུདྡཀུལཾ། ཨུཔསངྐམིཏྭཱཏི ཏཏྠ གནྟྭཱ།
Kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ suddakulaṃ. Upasaṅkamitvāti tattha gantvā.
སཱམིཀེ ཨནཱཔུཙྪཱཏི ཡོ ཏསྨིཾ ཀུལེ མནུསྶོ སཱམིཀོ དཱཏུཾ, ཏཾ ཨནཱཔུཙྪཱ།
Sāmike anāpucchāti yo tasmiṃ kule manusso sāmiko dātuṃ, taṃ anāpucchā.
སེཡྻཾ ནཱམ ཨནྟམསོ པཎྞསནྠཱརོཔི། སནྠརིཏྭཱཏི སཡཾ སནྠརིཏྭཱ། སནྠརཱཔེཏྭཱཏི ཨཉྙཾ སནྠརཱཔེཏྭཱ། ཨབྷིནིསཱིདེཡྻཱཏི ཏསྨིཾ ཨབྷིནིསཱིདཏི, ཨཱཔཏྟི པཱཙིཏྟིཡསྶ། ཨབྷིནིཔཛྫེཡྻཱཏི ཏསྨིཾ ཨབྷིནིཔཛྫཏི, ཨཱཔཏྟི པཱཙིཏྟིཡསྶ།
Seyyaṃ nāma antamaso paṇṇasanthāropi. Santharitvāti sayaṃ santharitvā. Santharāpetvāti aññaṃ santharāpetvā. Abhinisīdeyyāti tasmiṃ abhinisīdati, āpatti pācittiyassa. Abhinipajjeyyāti tasmiṃ abhinipajjati, āpatti pācittiyassa.
༨༦༧. ཨནཱཔུཙྪིཏེ ཨནཱཔུཙྪིཏསཉྙཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི པཱཙིཏྟིཡསྶ། ཨནཱཔུཙྪིཏེ ཝེམཏིཀཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི པཱཙིཏྟིཡསྶ། ཨནཱཔུཙྪིཏེ ཨཱཔུཙྪིཏསཉྙཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི པཱཙིཏྟིཡསྶ།
867. Anāpucchite anāpucchitasaññā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite vematikā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa. Anāpucchite āpucchitasaññā seyyaṃ santharitvā vā santharāpetvā vā abhinisīdati vā abhinipajjati vā, āpatti pācittiyassa.
ཨཱཔུཙྪིཏེ ཨནཱཔུཙྪིཏསཉྙཱ, ཨཱཔཏྟི དུཀྐཊསྶ། ཨཱཔུཙྪིཏེ ཝེམཏིཀཱ, ཨཱཔཏྟི དུཀྐཊསྶ། ཨཱཔུཙྪིཏེ ཨཱཔུཙྪིཏསཉྙཱ, ཨནཱཔཏྟི།
Āpucchite anāpucchitasaññā, āpatti dukkaṭassa. Āpucchite vematikā, āpatti dukkaṭassa. Āpucchite āpucchitasaññā, anāpatti.
༨༦༨. ཨནཱཔཏྟི ཨཱཔུཙྪཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, གིལཱནཱཡ, ཨཱཔདཱསུ, ཨུམྨཏྟིཀཱཡ, ཨཱདིཀམྨིཀཱཡཱཏི།
868. Anāpatti āpucchā seyyaṃ santharitvā vā santharāpetvā vā abhinisīdati vā abhinipajjati vā, gilānāya, āpadāsu, ummattikāya, ādikammikāyāti.
སཏྟམསིཀྑཱཔདཾ ནིཊྛིཏཾ།
Sattamasikkhāpadaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༧. སཏྟམསིཀྑཱཔདཝཎྞནཱ • 7. Sattamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཨནྡྷཀཱརཝགྒཝཎྞནཱ • 2. Andhakāravaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༧. སཏྟམསིཀྑཱཔདཝཎྞནཱ • 7. Sattamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༧. སཏྟམསིཀྑཱཔདཾ • 7. Sattamasikkhāpadaṃ
