| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༧. སཏྟམསིཀྑཱཔདཾ
7. Sattamasikkhāpadaṃ
༡༡༠༡. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷིཀྑུནིཡོ པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏཾ ཝུཊྛཱཔེནྟི། བྷིཀྑུནིཡོ ཨེཝམཱཧཾསུ – ‘‘ཨེཐ སིཀྑམཱནཱ, ཨིམཾ ཛཱནཱཐ, ཨིམཾ དེཐ, ཨིམཾ ཨཱཧརཐ, ཨིམིནཱ ཨཏྠོ, ཨིམཾ ཀཔྤིཡཾ ཀརོཐཱ’’ཏི། ཏཱ ཨེཝམཱཧཾསུ – ‘‘ན མཡཾ, ཨཡྻེ, སིཀྑམཱནཱ, བྷིཀྑུནིཡོ མཡ’’ནྟི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནིཡོ པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏཾ ཝུཊྛཱཔེསྶནྟཱི’’ཏི…པེ॰… སཙྩཾ ཀིར, བྷིཀྑཝེ, བྷིཀྑུནིཡོ པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏྟཾ ཝུཊྛཱཔེནྟཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ བྷིཀྑཝེ བྷིཀྑུནིཡོ པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏཾ ཝུཊྛཱཔེསྶནྟི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, པརིཔུཎྞདྭཱདསཝསྶཱཡ གིཧིགཏཱཡ དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ ཝུཊྛཱནསམྨུཏིཾ དཱཏུཾ། ཨེཝཉྩ པན, བྷིཀྑཝེ, དཱཏབྦཱ། ཏཱཡ པརིཔུཎྞདྭཱདསཝསྶཱཡ གིཧིགཏཱཡ དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ སངྒྷཾ ཨུཔསངྐམིཏྭཱ ཨེཀཾསཾ ཨུཏྟརཱསངྒཾ ཀརིཏྭཱ བྷིཀྑུནཱིནཾ པཱདེ ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ཨེཝམསྶ ཝཙནཱིཡོ – ཨཧཾ, ཨཡྻེ, ཨིཏྠནྣཱམཱ ཨིཏྠནྣཱམཱཡ ཨཡྻཱཡ པརིཔུཎྞདྭཱདསཝསྶཱ གིཧིགཏཱ དྭེ ཝསྶཱནི ཚསུ དྷམྨེསུ སིཀྑིཏསིཀྑཱ, སངྒྷཾ ཝུཊྛཱནསམྨུཏིཾ ཡཱཙཱམཱི’’ཏི། དུཏིཡམྤི ཡཱཙིཏབྦཱ། ཏཏིཡམྤི ཡཱཙིཏབྦཱ། བྱཏྟཱཡ བྷིཀྑུནིཡཱ པཊིབལཱཡ སངྒྷོ ཉཱཔེཏབྦོ།
1101. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpenti. Bhikkhuniyo evamāhaṃsu – ‘‘etha sikkhamānā, imaṃ jānātha, imaṃ detha, imaṃ āharatha, iminā attho, imaṃ kappiyaṃ karothā’’ti. Tā evamāhaṃsu – ‘‘na mayaṃ, ayye, sikkhamānā, bhikkhuniyo maya’’nti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpessantī’’ti…pe… saccaṃ kira, bhikkhave, bhikkhuniyo paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammattaṃ vuṭṭhāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma bhikkhave bhikkhuniyo paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpessanti! Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘anujānāmi, bhikkhave, paripuṇṇadvādasavassāya gihigatāya dve vassāni chasu dhammesu sikkhitasikkhāya vuṭṭhānasammutiṃ dātuṃ. Evañca pana, bhikkhave, dātabbā. Tāya paripuṇṇadvādasavassāya gihigatāya dve vassāni chasu dhammesu sikkhitasikkhāya saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ahaṃ, ayye, itthannāmā itthannāmāya ayyāya paripuṇṇadvādasavassā gihigatā dve vassāni chasu dhammesu sikkhitasikkhā, saṅghaṃ vuṭṭhānasammutiṃ yācāmī’’ti. Dutiyampi yācitabbā. Tatiyampi yācitabbā. Byattāya bhikkhuniyā paṭibalāya saṅgho ñāpetabbo.
༡༡༠༢. ‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ ཨིཏྠནྣཱམཱཡ ཨཡྻཱཡ པརིཔུཎྞདྭཱདསཝསྶཱ གིཧིགཏཱ དྭེ ཝསྶཱནི ཚསུ དྷམྨེསུ སིཀྑིཏསིཀྑཱ སངྒྷཾ ཝུཊྛཱནསམྨུཏིཾ ཡཱཙཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམཱཡ པརིཔུཎྞདྭཱདསཝསྶཱཡ གིཧིགཏཱཡ དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ ཝུཊྛཱནསམྨུཏིཾ དདེཡྻ། ཨེསཱ ཉཏྟི།
1102. ‘‘Suṇātu me, ayye, saṅgho. Ayaṃ itthannāmā itthannāmāya ayyāya paripuṇṇadvādasavassā gihigatā dve vassāni chasu dhammesu sikkhitasikkhā saṅghaṃ vuṭṭhānasammutiṃ yācati. Yadi saṅghassa pattakallaṃ, saṅgho itthannāmāya paripuṇṇadvādasavassāya gihigatāya dve vassāni chasu dhammesu sikkhitasikkhāya vuṭṭhānasammutiṃ dadeyya. Esā ñatti.
‘‘སུཎཱཏུ མེ, ཨཡྻེ, སངྒྷོ། ཨཡཾ ཨིཏྠནྣཱམཱ ཨིཏྠནྣཱམཱཡ ཨཡྻཱཡ པརིཔུཎྞདྭཱདསཝསྶཱ གིཧིགཏཱ དྭེ ཝསྶཱནི ཚསུ དྷམྨེསུ སིཀྑིཏསིཀྑཱ སངྒྷཾ ཝུཊྛཱནསམྨུཏིཾ ཡཱཙཏི། སངྒྷོ ཨིཏྠནྣཱམཱཡ པརིཔུཎྞདྭཱདསཝསྶཱཡ གིཧིགཏཱཡ དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ ཝུཊྛཱནསམྨུཏིཾ དེཏི། ཡསྶཱ ཨཡྻཱཡ ཁམཏི ཨིཏྠནྣཱམཱཡ པརིཔུཎྞདྭཱདསཝསྶཱཡ གིཧིགཏཱཡ དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ ཝུཊྛཱནསམྨུཏིཡཱ དཱནཾ, སཱ ཏུཎྷསྶ; ཡསྶཱ ནཀྑམཏི, སཱ བྷཱསེཡྻ།
‘‘Suṇātu me, ayye, saṅgho. Ayaṃ itthannāmā itthannāmāya ayyāya paripuṇṇadvādasavassā gihigatā dve vassāni chasu dhammesu sikkhitasikkhā saṅghaṃ vuṭṭhānasammutiṃ yācati. Saṅgho itthannāmāya paripuṇṇadvādasavassāya gihigatāya dve vassāni chasu dhammesu sikkhitasikkhāya vuṭṭhānasammutiṃ deti. Yassā ayyāya khamati itthannāmāya paripuṇṇadvādasavassāya gihigatāya dve vassāni chasu dhammesu sikkhitasikkhāya vuṭṭhānasammutiyā dānaṃ, sā tuṇhassa; yassā nakkhamati, sā bhāseyya.
‘‘དིནྣཱ སངྒྷེན ཨིཏྠནྣཱམཱཡ པརིཔུཎྞདྭཱདསཝསྶཱཡ གིཧིགཏཱཡ དྭེ ཝསྶཱནི ཚསུ དྷམྨེསུ སིཀྑིཏསིཀྑཱཡ ཝུཊྛཱནསམྨུཏི། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Dinnā saṅghena itthannāmāya paripuṇṇadvādasavassāya gihigatāya dve vassāni chasu dhammesu sikkhitasikkhāya vuṭṭhānasammuti. Khamati saṅghassa, tasmā tuṇhī, evametaṃ dhārayāmī’’ti.
ཨཐ ཁོ བྷགཝཱ ཏཱ བྷིཀྑུནིཡོ ཨནེཀཔརིཡཱཡེན ཝིགརཧིཏྭཱ དུབྦྷརཏཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
Atha kho bhagavā tā bhikkhuniyo anekapariyāyena vigarahitvā dubbharatāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༡༡༠༣. ‘‘ཡཱ པན བྷིཀྑུནཱི པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན ཨསམྨཏཾ ཝུཊྛཱཔེཡྻ, པཱཙིཏྟིཡ’’ནྟི།
1103.‘‘Yāpana bhikkhunī paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena asammataṃ vuṭṭhāpeyya, pācittiya’’nti.
༡༡༠༤. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
1104.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
པརིཔུཎྞདྭཱདསཝསྶཱ ནཱམ པཏྟདྭཱདསཝསྶཱ། གིཧིགཏཱ ནཱམ པུརིསནྟརགཏཱ ཝུཙྩཏི། དྭེ ཝསྶཱནཱིཏི དྭེ སཾཝཙྪརཱནི། སིཀྑིཏསིཀྑཱ ནཱམ ཚསུ དྷམྨེསུ སིཀྑིཏསིཀྑཱ། ཨསམྨཏཱ ནཱམ ཉཏྟིདུཏིཡེན ཀམྨེན ཝུཊྛཱནསམྨུཏི ན དིནྣཱ ཧོཏི། ཝུཊྛཱཔེཡྻཱཏི ཨུཔསམྤཱདེཡྻ།
Paripuṇṇadvādasavassā nāma pattadvādasavassā. Gihigatā nāma purisantaragatā vuccati. Dve vassānīti dve saṃvaccharāni. Sikkhitasikkhā nāma chasu dhammesu sikkhitasikkhā. Asammatā nāma ñattidutiyena kammena vuṭṭhānasammuti na dinnā hoti. Vuṭṭhāpeyyāti upasampādeyya.
‘‘ཝུཊྛཱཔེསྶཱམཱི’’ཏི གཎཾ ཝཱ ཨཱཙརིནིཾ ཝཱ པཏྟཾ ཝཱ ཙཱིཝརཾ ཝཱ པརིཡེསཏི, སཱིམཾ ཝཱ སམྨནྣཏི, ཨཱཔཏྟི དུཀྐཊསྶ། ཉཏྟིཡཱ དུཀྐཊཾ། དྭཱིཧི ཀམྨཝཱཙཱཧི དུཀྐཊཱ། ཀམྨཝཱཙཱཔརིཡོསཱནེ ཨུཔཛ྄ཛྷཱཡཱཡ ཨཱཔཏྟི པཱཙིཏྟིཡསྶ། གཎསྶ ཙ ཨཱཙརིནིཡཱ ཙ ཨཱཔཏྟི དུཀྐཊསྶ།
‘‘Vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi dukkaṭā. Kammavācāpariyosāne upajjhāyāya āpatti pācittiyassa. Gaṇassa ca ācariniyā ca āpatti dukkaṭassa.
༡༡༠༥. དྷམྨཀམྨེ དྷམྨཀམྨསཉྙཱ ཝུཊྛཱཔེཏི, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀཱ ཝུཊྛཱཔེཏི, ཨཱཔཏྟི པཱཙིཏྟིཡསྶ། དྷམྨཀམྨེ ཨདྷམྨཀམྨསཉྙཱ ཝུཊྛཱཔེཏི, ཨཱཔཏྟི པཱཙིཏྟིཡསྶ།
1105. Dhammakamme dhammakammasaññā vuṭṭhāpeti, āpatti pācittiyassa. Dhammakamme vematikā vuṭṭhāpeti, āpatti pācittiyassa. Dhammakamme adhammakammasaññā vuṭṭhāpeti, āpatti pācittiyassa.
ཨདྷམྨཀམྨེ དྷམྨཀམྨསཉྙཱ, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀཱ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱ, ཨཱཔཏྟི དུཀྐཊསྶ།
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
༡༡༠༦. ཨནཱཔཏྟི པརིཔུཎྞདྭཱདསཝསྶཾ གིཧིགཏཾ དྭེ ཝསྶཱནི ཚསུ དྷམྨེསུ སིཀྑིཏསིཀྑཾ སངྒྷེན སམྨཏཾ ཝུཊྛཱཔེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
1106. Anāpatti paripuṇṇadvādasavassaṃ gihigataṃ dve vassāni chasu dhammesu sikkhitasikkhaṃ saṅghena sammataṃ vuṭṭhāpeti, ummattikāya, ādikammikāyāti.
སཏྟམསིཀྑཱཔདཾ ནིཊྛིཏཾ།
Sattamasikkhāpadaṃ niṭṭhitaṃ.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༧. སཏྟམསིཀྑཱཔདཝཎྞནཱ • 7. Sattamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
