பட²மகா³தா²ஸங்க³ணிகங்

ஸத்தனக³ரேஸு பஞ்ஞத்தஸிக்கா²பத³வண்ணனா

335. ஏகங்ஸங் சீவரங் கத்வாதி ஏகஸ்மிங் அங்ஸகூடே சீவரங் கத்வா; ஸாது⁴கங் உத்தராஸங்க³ங் கத்வாதி அத்தோ². பக்³க³ண்ஹித்வான அஞ்ஜலிந்தி த³ஸனக²ஸமோதா⁴னஸமுஜ்ஜலங் அஞ்ஜலிங் உக்கி²பித்வா. ஆஸீஸமானரூபோ வாதி பச்சாஸீஸமானரூபோ விய. கிஸ்ஸ த்வங் இத⁴ மாக³தோதி கேன காரணேன கிமத்த²ங் பத்த²யமானோ த்வங் இத⁴ ஆக³தோ. கோ ஏவமாஹ? ஸம்மாஸம்பு³த்³தோ⁴. கங் ஏவமாஹ? ஆயஸ்மந்தங் உபாலிங். இதி ஆயஸ்மா உபாலி ப⁴க³வந்தங் உபஸங்கமித்வா ‘‘த்³வீஸு வினயேஸூ’’தி இமங் கா³த²ங் புச்சி². அத²ஸ்ஸ ப⁴க³வா ‘‘ப⁴த்³த³கோ தே உம்மங்கோ³’’திஆதீ³னி வத்வா தங் விஸ்ஸஜ்ஜேஸி. ஏஸ நயோ ஸப்³ப³த்த². இதி இமே ஸப்³ப³பஞ்ஹே பு³த்³த⁴காலே உபாலித்தே²ரோ புச்சி². ப⁴க³வா ப்³யாகாஸி. ஸங்கீ³திகாலே பன மஹாகஸ்ஸபத்தே²ரோ புச்சி². உபாலித்தே²ரோ ப்³யாகாஸி.

தத்த² ப⁴த்³த³கோ தே உம்மங்கோ³தி ப⁴த்³த³கா தே பஞ்ஹா; பஞ்ஹா ஹி அவிஜ்ஜந்த⁴காரதோ உம்முஜ்ஜித்வா டி²தத்தா ‘‘உம்மங்கோ³’’தி வுச்சதி. தக்³கா⁴தி காரணத்தே² நிபாதோ. யஸ்மா மங் புச்ச²ஸி, தஸ்மா தே அஹமக்கி²ஸ்ஸந்தி அத்தோ². ஸம்படிச்ச²னத்தே² வா, ‘‘தக்³கா⁴’’தி ஹி இமினா வசனங் ஸம்படிச்சி²த்வா அக்கி²ஸ்ஸந்தி ஆஹ. ‘‘ஸமாத³ஹித்வா விஸிப்³பெ³ந்தி, ஸாமிஸேன, ஸஸித்த²க’’ந்தி இமானி தீணியேவ ஸிக்கா²பதா³னி ப⁴க்³கே³ஸு பஞ்ஞத்தானி.