| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
បញ្ញត្តិវគ្គោ
Paññattivaggo
បឋមគាថាសង្គណិកំ
Paṭhamagāthāsaṅgaṇikaṃ
សត្តនគរេសុ បញ្ញត្តសិក្ខាបទវណ្ណនា
Sattanagaresu paññattasikkhāpadavaṇṇanā
៣៣៥. អឌ្ឍុឌ្ឍសតានីតិ បញ្ញាសាធិកានិ តីណិ សតានិ។ វិគ្គហបទេន មនុស្សវិគ្គហំ វុត្តំ។
335.Aḍḍhuḍḍhasatānīti paññāsādhikāni tīṇi satāni. Viggahapadena manussaviggahaṃ vuttaṃ.
អតិរេកន្តិ បឋមកថិនំ។ កាឡកន្តិ សុទ្ធកាឡកំ។ ភូតន្តិ ភូតារោចនំ។ ភិក្ខុនីសុ ច អក្កោសោតិ ‘‘យា បន ភិក្ខុនី ភិក្ខុំ អក្កោសេយ្យា’’តិ (បាចិ. ១០២៩) វុត្តំ សិក្ខាបទំ។
Atirekanti paṭhamakathinaṃ. Kāḷakanti suddhakāḷakaṃ. Bhūtanti bhūtārocanaṃ. Bhikkhunīsu ca akkosoti ‘‘yā pana bhikkhunī bhikkhuṃ akkoseyyā’’ti (pāci. 1029) vuttaṃ sikkhāpadaṃ.
ទ្វេបិ ច ភេទាតិ ទ្វេ សង្ឃភេទសិក្ខាបទានិ។ អន្តរវាសកនាមេន អញ្ញាតិកាយ ភិក្ខុនិយា ហត្ថតោ ចីវរបដិគ្គហណំ វុត្តំ។ សុត្តន្តិ សុត្តំ វិញ្ញាបេត្វា វាយាបនំ។ វិកាលេតិ វិកាលភោជនំ។ ចារិត្តន្តិ បុរេភត្តំ បច្ឆាភត្តំ ចារិត្តំ។ នហានន្តិ ឱរេនទ្ធមាសនហានំ។
Dvepi ca bhedāti dve saṅghabhedasikkhāpadāni. Antaravāsakanāmena aññātikāya bhikkhuniyā hatthato cīvarapaṭiggahaṇaṃ vuttaṃ. Suttanti suttaṃ viññāpetvā vāyāpanaṃ. Vikāleti vikālabhojanaṃ. Cārittanti purebhattaṃ pacchābhattaṃ cārittaṃ. Nahānanti orenaddhamāsanahānaṃ.
ចីវរំ ទត្វាតិ សមគ្គេន សង្ឃេន ចីវរំ ទត្វា ខិយ្យនំ។ គិរគ្គន្តិ នច្ចគីតំ។ ចរិយាតិ អន្តោវស្សំ ចារិកចរណំ។ តត្ថេវាតិ វស្សំវុត្ថាយ ចារិកំ អបក្កមិត្វា តត្ថេវ និវាសនំ បដិច្ច បញ្ញត្តសិក្ខាបទំ។ ឆន្ទទានេនាតិ បារិវាសិកេន ឆន្ទទានេន។
Cīvaraṃ datvāti samaggena saṅghena cīvaraṃ datvā khiyyanaṃ. Giragganti naccagītaṃ. Cariyāti antovassaṃ cārikacaraṇaṃ. Tatthevāti vassaṃvutthāya cārikaṃ apakkamitvā tattheva nivāsanaṃ paṭicca paññattasikkhāpadaṃ. Chandadānenāti pārivāsikena chandadānena.
បារាជិកានិ ចត្តារីតិ ភិក្ខុនីនំ អសាធារណានិ។ សោឡសាតិ អាទិតោ បញ្ច សិក្ខាបទានិ, កុលទូសនញ្ចាតិ ឆ, ភិក្ខុនីនំ អសាធារណានិ ទស និស្សគ្គិយានិ។
Pārājikāni cattārīti bhikkhunīnaṃ asādhāraṇāni. Soḷasāti ādito pañca sikkhāpadāni, kuladūsanañcāti cha, bhikkhunīnaṃ asādhāraṇāni dasa nissaggiyāni.
ចតុត្តិំសាតិ បឋមកថិនសុទ្ធកាឡកចីវរបដិគ្គហណរូបិយចីវរវាយាបនកោសេយ្យមិស្សកឯឡកលោមធោវាបនទុតិយបត្តវជ្ជិតានិ ភិក្ខុវិភង្គេ ទ្វាវីសតិ, ភិក្ខុនីនំ អសាធារណានិ ទ្វាទស ចាតិ ចតុត្តិំស។ ឆបញ្ញាសសតន្តិ វេសាលិយាទីសុ បញ្ញត្តានិ ទ្វត្តិំសសិក្ខាបទានិ ឋបេត្វា សេសា ឆបញ្ញាសសតំ។
Catuttiṃsāti paṭhamakathinasuddhakāḷakacīvarapaṭiggahaṇarūpiyacīvaravāyāpanakoseyyamissakaeḷakalomadhovāpanadutiyapattavajjitāni bhikkhuvibhaṅge dvāvīsati, bhikkhunīnaṃ asādhāraṇāni dvādasa cāti catuttiṃsa. Chapaññāsasatanti vesāliyādīsu paññattāni dvattiṃsasikkhāpadāni ṭhapetvā sesā chapaññāsasataṃ.
ទស គារយ្ហាតិ វោសាសអប្បដិសំ វិទិតសិក្ខាបទទ្វយញ្ច ឋបេត្វា សេសានិ ទស បាដិទេសនីយានិ។ ទ្វេ សត្តតិ សេខិយានិ សុរុសុរុការកសាមិសេនហត្ថេនបានីយថាលកបដិគ្គហណសសិត្ថកបត្តធោវនានិ តីណិ ឋបេត្វា សេសានិ សេខិយានិ។
Dasagārayhāti vosāsaappaṭisaṃ viditasikkhāpadadvayañca ṭhapetvā sesāni dasa pāṭidesanīyāni. Dve sattati sekhiyāni surusurukārakasāmisenahatthenapānīyathālakapaṭiggahaṇasasitthakapattadhovanāni tīṇi ṭhapetvā sesāni sekhiyāni.
សេយ្យាតិ អនុបសម្បន្នេន សហសេយ្យសិក្ខាបទំ។ ខណនេតិ បថវីខណនំ។ គច្ឆ ទេវតេតិ ភូតគាមសិក្ខាបទំ វុត្តំ។ សប្បាណកំ សិញ្ចន្តិ សប្បាណោទកសិញ្ចនំ។ មហាវិហារោតិ មហល្លកវិហារោ។
Seyyāti anupasampannena sahaseyyasikkhāpadaṃ. Khaṇaneti pathavīkhaṇanaṃ. Gaccha devateti bhūtagāmasikkhāpadaṃ vuttaṃ. Sappāṇakaṃ siñcanti sappāṇodakasiñcanaṃ. Mahāvihāroti mahallakavihāro.
អញ្ញន្តិ អញ្ញវាទកំ។ ទ្វារន្តិ យាវ ទ្វារកោសា អគ្គឡដ្ឋបនំ។ សហធម្មោតិ សហធម្មិកំ វុច្ចមានោ។ បយោបានន្តិ សុរុសុរុការកសិក្ខាបទំ។
Aññanti aññavādakaṃ. Dvāranti yāva dvārakosā aggaḷaṭṭhapanaṃ. Sahadhammoti sahadhammikaṃ vuccamāno. Payopānanti surusurukārakasikkhāpadaṃ.
ឯឡកលោមោតិ ឯឡកលោមធោវាបនំ។ បត្តោ ចាតិ ទុតិយបត្តោ។ ឱវាទោតិ ភិក្ខុនុបស្សយំ ឧបសង្កមិត្វា ឱវាទោ។ ភេសជ្ជន្តិ ចតុមាសបច្ចយបវារណាសិក្ខាបទំ។ អារញ្ញិកោតិ ចតុត្ថបាដិទេសនីយំ។ ឱវាទោតិ ឱវាទាយ វា សំវាសាយ វា អគមនំ។
Eḷakalomoti eḷakalomadhovāpanaṃ. Patto cāti dutiyapatto. Ovādoti bhikkhunupassayaṃ upasaṅkamitvā ovādo. Bhesajjanti catumāsapaccayapavāraṇāsikkhāpadaṃ. Āraññikoti catutthapāṭidesanīyaṃ. Ovādoti ovādāya vā saṃvāsāya vā agamanaṃ.
៣៣៧. ‘‘យេ ច យាវតតិយកា’’តិ បញ្ហស្ស ‘‘ឥមេ ខោ យាវតតិយកា’’តិ វិស្សជ្ជនំ វត្វា តទនន្តរំ ‘‘សាធារណំ អសាធារណ’’ន្តិអាទិបញ្ហានំ វិស្សជ្ជនេ វត្តព្ពេ យស្មា តំ អវត្វា ‘‘កតិ ឆេទនកានី’’តិអាទិកេ អដ្ឋ បញ្ហេ អន្តរា វិស្សជ្ជេត្វា តេសំ អនន្តរា ‘‘វីសំ ទ្វេ សតានិ ភិក្ខូនំ…បេ.… ឆចត្តារីសា ភិក្ខូនំ, ភិក្ខុនីហិ អសាធារណា’’តិអាទិនា ឧក្កមេនេវ សាធារណាទិបញ្ហា វិស្សជ្ជិតា, តស្មា តំ ឧក្កមវិស្សជ្ជនការណំ ទស្សេតុំ ‘‘យស្មា បន យេ ច យាវតតិយកាតិ អយំ បញ្ហោ’’តិអាទិមាហ។
337. ‘‘Ye ca yāvatatiyakā’’ti pañhassa ‘‘ime kho yāvatatiyakā’’ti vissajjanaṃ vatvā tadanantaraṃ ‘‘sādhāraṇaṃ asādhāraṇa’’ntiādipañhānaṃ vissajjane vattabbe yasmā taṃ avatvā ‘‘kati chedanakānī’’tiādike aṭṭha pañhe antarā vissajjetvā tesaṃ anantarā ‘‘vīsaṃ dve satāni bhikkhūnaṃ…pe… chacattārīsā bhikkhūnaṃ, bhikkhunīhi asādhāraṇā’’tiādinā ukkameneva sādhāraṇādipañhā vissajjitā, tasmā taṃ ukkamavissajjanakāraṇaṃ dassetuṃ ‘‘yasmā pana ye ca yāvatatiyakāti ayaṃ pañho’’tiādimāha.
៣៣៨. ធោវនញ្ច បដិគ្គហោតិអាទិគាថា អដ្ឋកថាចរិយានំ គាថាវ។ ឆព្ពស្សានិ និសីទនន្តិ ទ្វេ សិក្ខាបទានិ។ ទ្វេ លោមាតិ តិយោជនាតិក្កមធោវាបនវសេន ទ្វេ ឯឡកលោមសិក្ខាបទានិ។ វស្សិកា អារញ្ញកេន ចាតិ វស្សិកសាដិកា បរិយេសនអរញ្ញកេសុ សេនាសនេសុ វិហរណសិក្ខាបទេន សហ។
338.Dhovanañca paṭiggahotiādigāthā aṭṭhakathācariyānaṃ gāthāva. Chabbassāni nisīdananti dve sikkhāpadāni. Dve lomāti tiyojanātikkamadhovāpanavasena dve eḷakalomasikkhāpadāni. Vassikā āraññakena cāti vassikasāṭikā pariyesanaaraññakesu senāsanesu viharaṇasikkhāpadena saha.
បណីតន្តិ បណីតភោជនវិញ្ញាបនំ។ ឩនន្តិ ឩនវីសតិវស្សូបសម្បាទនំ។ មាតុគាមេន សទ្ធិន្តិ សំវិធាយ គមនំ វុត្តំ។ យា សិក្ខាតិ យំ សិក្ខាបទំ។ និសីទនេ ច យា សិក្ខាតិ បមាណាតិក្កន្តនិសីទនការាបនេ យំ សិក្ខាបទំ។ តថា វស្សិកា យា ច សាដិកាតិ ឯត្ថាបិ។
Paṇītanti paṇītabhojanaviññāpanaṃ. Ūnanti ūnavīsativassūpasampādanaṃ. Mātugāmena saddhinti saṃvidhāya gamanaṃ vuttaṃ. Yā sikkhāti yaṃ sikkhāpadaṃ. Nisīdaneca yā sikkhāti pamāṇātikkantanisīdanakārāpane yaṃ sikkhāpadaṃ. Tathā vassikā yā ca sāṭikāti etthāpi.
បាឡិយំ សតំ សត្តតិ ឆច្ចេវិមេ ហោន្តិ ឧភិន្នំ អសាធារណាតិ ភិក្ខូនំ ភិក្ខុនីហិ អសាធារណា ឆចត្តារីស, ភិក្ខុនីនំ ភិក្ខូហិ អសាធារណា តិំសាធិកំ សតញ្ចាតិ ឯវំ ឧភិន្នំ អសាធារណា ច ឆសត្តតិអធិកំ សតំ សិក្ខាបទានីតិ អត្ថោ។ សតំ សត្តតិ ចត្តារីតិ ឧភិន្នំ សាធារណសិក្ខានំ គណនា ចតុសត្តតិអធិកំ សតំ សិក្ខាបទានីតិ អត្ថោ។
Pāḷiyaṃ sataṃ sattati chaccevime honti ubhinnaṃ asādhāraṇāti bhikkhūnaṃ bhikkhunīhi asādhāraṇā chacattārīsa, bhikkhunīnaṃ bhikkhūhi asādhāraṇā tiṃsādhikaṃ satañcāti evaṃ ubhinnaṃ asādhāraṇā ca chasattatiadhikaṃ sataṃ sikkhāpadānīti attho. Sataṃ sattati cattārīti ubhinnaṃ sādhāraṇasikkhānaṃ gaṇanā catusattatiadhikaṃ sataṃ sikkhāpadānīti attho.
វិភត្តិយោតិ អាបត្តិក្ខន្ធា ចេវ ឧបោសថបវារណាទយោ ច អធិប្បេតា។ តេ ហិ បារាជិកាទិភេទេន, ភិក្ខុឧបោសថាទិភេទេន ច វិភជីយន្តិ។ តេនាហ ‘‘វិភត្តិយោ’’តិអាទិ។ តេសន្តិ អដ្ឋន្នំ បារាជិកាទីនំ។ ទ្វីហីតិអាទិ វិវាទាធិករណាទីនំ សមថេហិ វូបសមទស្សនំ។
Vibhattiyoti āpattikkhandhā ceva uposathapavāraṇādayo ca adhippetā. Te hi pārājikādibhedena, bhikkhuuposathādibhedena ca vibhajīyanti. Tenāha ‘‘vibhattiyo’’tiādi. Tesanti aṭṭhannaṃ pārājikādīnaṃ. Dvīhītiādi vivādādhikaraṇādīnaṃ samathehi vūpasamadassanaṃ.
សត្តនគរេសុ បញ្ញត្តសិក្ខាបទវណ្ណនា និដ្ឋិតា។
Sattanagaresu paññattasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi
១. សត្តនគរេសុ បញ្ញត្តសិក្ខាបទំ • 1. Sattanagaresu paññattasikkhāpadaṃ
៣. ឆេទនកាទិ • 3. Chedanakādi
៤. អសាធារណាទិ • 4. Asādhāraṇādi
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā
សត្តនគរេសុ បញ្ញត្តសិក្ខាបទវណ្ណនា • Sattanagaresu paññattasikkhāpadavaṇṇanā
ឆេទនកាទិវណ្ណនា • Chedanakādivaṇṇanā
អសាធារណាទិវណ្ណនា • Asādhāraṇādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā
សត្តនគរេសុ បញ្ញត្តសិក្ខាបទវណ្ណនា • Sattanagaresu paññattasikkhāpadavaṇṇanā
អសាធារណាទិវណ្ណនា • Asādhāraṇādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā
សត្តនគរេសុ បញ្ញត្តសិក្ខាបទវណ្ណនា • Sattanagaresu paññattasikkhāpadavaṇṇanā
ឆេទនកាទិវណ្ណនា • Chedanakādivaṇṇanā
អសាធារណាទិវណ្ណនា • Asādhāraṇādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi
សត្តនគរេសុ បញ្ញត្តសិក្ខាបទវណ្ណនា • Sattanagaresu paññattasikkhāpadavaṇṇanā
ឆេទនកាទិវណ្ណនា • Chedanakādivaṇṇanā
អសាធារណាទិវណ្ណនា • Asādhāraṇādivaṇṇanā
