| Library / Tipiṭaka / තිපිටක • Tipiṭaka / වජිරබුද්‌ධි-ටීකා • Vajirabuddhi-ṭīkā |
පඨමගාථාසඞ්‌ගණිකවණ්‌ණනා
Paṭhamagāthāsaṅgaṇikavaṇṇanā
සත්‌තනගරෙසු පඤ්‌ඤත්‌තසික්‌ඛාපදවණ්‌ණනා
Sattanagaresu paññattasikkhāpadavaṇṇanā
335. වචනසම්‌පටිච්‌ඡනත්‌ථෙ වා නිපාතොති අත්‌ථො. අඩ්‌ඪුඩ්‌ඪසතානීති තීණි සතානි, පඤ්‌ඤාසානි ච. විග්‌ගහන්‌ති මනුස්‌සවිග්‌ගහං. අතිරෙකං වාති දසාහපරමං අතිරෙකචීවරං. කාළකන්‌ති ‘‘සුද්‌ධකාළකාන’’න්‌ති (පාරා. 552-554) වුත්‌තකාළකං. භූතන්‌ති භූතාරොචනං. පරම්‌පරභත්‌තන්‌ති පරම්‌පරභොජනං. භික්‌ඛුනීසු ච අක්‌කොසොති යා පන භික්‌ඛුනී භික්‌ඛුං අක්‌කොසෙය්‍ය වා පරිභාසෙය්‍ය වා (පාචි. 1029). අන්‌තරවාසකන්‌ති අඤ්‌ඤාතිකාය භික්‌ඛුනියා චීවරපටිග්‌ගහණං. රූපියන්‌ති රූපියසබ්‌බොහාරං. සුත්‌තන්‌ති සාමං සුත්‌තං විඤ්‌ඤාපෙත්‌වා තන්‌තවායෙහි. උජ්‌ඣාපනකෙති උජ්‌ඣාපනකෙ ඛීයනකෙ. පාචිතපිණ්‌ඩන්‌ති භික්‌ඛුනීපඅපාචිතපිණ්‌ඩපාතං. චාරිත්‌තන්‌ති නිමන්‌තිතො සභත්‌තො සමානො සන්‌තං. චීවරං දත්‌වාති සමග්‌ගෙන සඞ්‌ඝෙන චීවරං දත්‌වා. වොසාසන්‌තීති භික්‌ඛූ පනෙව කුලෙසු නිමන්‌තිතා භුඤ්‌ජන්‌ති (පාචි. 558), තත්‌ථ චෙසා. ගිරග්‌ගචරියාති ‘‘යා පන භික්‌ඛුනී නච්‌චං වා ගීතං වා’’ති (පාචි. 834) ච, ‘‘අන්‌තොවස්‌සං චාරිකං චරෙය්‍යා’’ති (පාචි. 970) ච වුත්‌තද්‌වයං. ඡන්‌දදානෙනාති පාරිවාසිකඡන්‌දදානෙන සික්‌ඛමානං වුට්‌ඨාපෙය්‍ය (පාචි. 1167). පාරාජිකානි චත්‌තාරි, භික්‌ඛුනීනං සඤ්‌ඤාචිකකුටිඤ්‌ච කොසියමිස්‌සසන්‌ථතඤ්‌ච සෙය්‍යා ච අනුපසම්‌පන්‌නෙන සහ පථවීඛණනං. ගච්‌ඡ දෙවතෙති භූතගාමපාතබ්‍යතා සප්‌පාණකඋදකසිඤ්‌චනන්‌ති අත්‌ථො. මහාවිහාරොති මහල්‌ලකවිහාරො. අඤ්‌ඤන්‌ති අඤ්‌ඤවාදකං. ද්‌වාරන්‌ති යාවද්‌වාරකොසා. ‘‘අනාදරියපාචිත්‌තීති ච සහධම්‌මිකං වුච්‌චමානො’’ති පාඨො. පයොපානන්‌ති සුරුසුරුකාරකං. එළකලොමානි පත්‌තො චාති එළකලොමධොවාපනඤ්‌ච ඌනපඤ්‌චබන්‌ධනපත්‌තො ච. ඔවාදො චෙව භෙසජ්‌ජන්‌ති භික්‌ඛුනුපස්‌සයං උපසඞ්‌කමිත්‌වා ඔවාදො තදුත්‌තරිභෙසජ්‌ජවිඤ්‌ඤාපනඤ්‌ච. සූචි අරඤ්‌ඤකොති ‘‘අට්‌ඨිමයං වා දන්‌තමයං වා විසාණමයං වා සූචිඝර’’න්‌ති (පාචි. 517) ච ‘‘යානි ඛො පන තානි ආරඤ්‌ඤකානි සෙනාසනානි සාසඞ්‌ක…පෙ.… පටිදෙසෙතබ්‌බ’’න්‌ති (පාචි. 570) ච. ඔවාදොති යා පන භික්‌ඛුනී ඔවාදාය වා සංවාසාය වා න ගච්‌ඡෙය්‍ය (පාචි. 1055). පාරාජිකානි චත්‌තාරීතිආදි ද්‌වීසු නගරෙසු පඤ්‌ඤත්‌තසම්‌පිණ්‌ඩනං.
335. Vacanasampaṭicchanatthe vā nipātoti attho. Aḍḍhuḍḍhasatānīti tīṇi satāni, paññāsāni ca. Viggahanti manussaviggahaṃ. Atirekaṃ vāti dasāhaparamaṃ atirekacīvaraṃ. Kāḷakanti ‘‘suddhakāḷakāna’’nti (pārā. 552-554) vuttakāḷakaṃ. Bhūtanti bhūtārocanaṃ. Paramparabhattanti paramparabhojanaṃ. Bhikkhunīsu ca akkosoti yā pana bhikkhunī bhikkhuṃ akkoseyya vā paribhāseyya vā (pāci. 1029). Antaravāsakanti aññātikāya bhikkhuniyā cīvarapaṭiggahaṇaṃ. Rūpiyanti rūpiyasabbohāraṃ. Suttanti sāmaṃ suttaṃ viññāpetvā tantavāyehi. Ujjhāpanaketi ujjhāpanake khīyanake. Pācitapiṇḍanti bhikkhunīpaapācitapiṇḍapātaṃ. Cārittanti nimantito sabhatto samāno santaṃ. Cīvaraṃ datvāti samaggena saṅghena cīvaraṃ datvā. Vosāsantīti bhikkhū paneva kulesu nimantitā bhuñjanti (pāci. 558), tattha cesā. Giraggacariyāti ‘‘yā pana bhikkhunī naccaṃ vā gītaṃ vā’’ti (pāci. 834) ca, ‘‘antovassaṃ cārikaṃ careyyā’’ti (pāci. 970) ca vuttadvayaṃ. Chandadānenāti pārivāsikachandadānena sikkhamānaṃ vuṭṭhāpeyya (pāci. 1167). Pārājikāni cattāri, bhikkhunīnaṃ saññācikakuṭiñca kosiyamissasanthatañca seyyā ca anupasampannena saha pathavīkhaṇanaṃ. Gaccha devateti bhūtagāmapātabyatā sappāṇakaudakasiñcananti attho. Mahāvihāroti mahallakavihāro. Aññanti aññavādakaṃ. Dvāranti yāvadvārakosā. ‘‘Anādariyapācittīti ca sahadhammikaṃ vuccamāno’’ti pāṭho. Payopānanti surusurukārakaṃ. Eḷakalomāni patto cāti eḷakalomadhovāpanañca ūnapañcabandhanapatto ca. Ovādo ceva bhesajjanti bhikkhunupassayaṃ upasaṅkamitvā ovādo taduttaribhesajjaviññāpanañca. Sūci araññakoti ‘‘aṭṭhimayaṃ vā dantamayaṃ vā visāṇamayaṃ vā sūcighara’’nti (pāci. 517) ca ‘‘yāni kho pana tāni āraññakāni senāsanāni sāsaṅka…pe… paṭidesetabba’’nti (pāci. 570) ca. Ovādoti yā pana bhikkhunī ovādāya vā saṃvāsāya vā na gaccheyya (pāci. 1055). Pārājikāni cattārītiādi dvīsu nagaresu paññattasampiṇḍanaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 1. සත්‌තනගරෙසු පඤ්‌ඤත්‌තසික්‌ඛාපදං • 1. Sattanagaresu paññattasikkhāpadaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / සත්‌තනගරෙසු පඤ්‌ඤත්‌තසික්‌ඛාපදවණ්‌ණනා • Sattanagaresu paññattasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සත්‌තනගරෙසු පඤ්‌ඤත්‌තසික්‌ඛාපදවණ්‌ණනා • Sattanagaresu paññattasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සත්‌තනගරෙසු පඤ්‌ඤත්‌තසික්‌ඛාපදවණ්‌ණනා • Sattanagaresu paññattasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / සත්‌තනගරෙසු පඤ්‌ඤත්‌තසික්‌ඛාපදවණ්‌ණනා • Sattanagaresu paññattasikkhāpadavaṇṇanā
