| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১১১. সত্তন্নং অপ্পহিতেপি অনুজাননা
111. Sattannaṃ appahitepi anujānanā
১৯৮. তেন খো পন সমযেন অঞ্ঞতরস্স ভিক্খুনো মাতা গিলানা হোতি। সা পুত্তস্স সন্তিকে দূতং পাহেসি – ‘‘অহঞ্হি গিলানা, আগচ্ছতু মে পুত্তো, ইচ্ছামি পুত্তস্স আগত’’ন্তি। অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং সত্তন্নং সত্তাহকরণীযেন পহিতে গন্তুং, ন ত্ৰেৰ অপ্পহিতে; পঞ্চন্নং সত্তাহকরণীযেন অপ্পহিতেপি গন্তুং, পগেৰ পহিতেতি। অযঞ্চ মে মাতা গিলানা, সা চ অনুপাসিকা, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং। অনুজানামি, ভিক্খৰে, সত্তন্নং সত্তাহকরণীযেন অপ্পহিতেপি গন্তুং, পগেৰ পহিতে। ভিক্খুস্স, ভিক্খুনিযা, সিক্খমানায, সামণেরস্স, সামণেরিযা, মাতুযা চ পিতুস্স চ – অনুজানামি, ভিক্খৰে, ইমেসং সত্তন্নং সত্তাহকরণীযেন অপ্পহিতেপি গন্তুং, পগেৰ পহিতে। সত্তাহং সন্নিৰত্তো কাতব্বো।
198. Tena kho pana samayena aññatarassa bhikkhuno mātā gilānā hoti. Sā puttassa santike dūtaṃ pāhesi – ‘‘ahañhi gilānā, āgacchatu me putto, icchāmi puttassa āgata’’nti. Atha kho tassa bhikkhuno etadahosi – ‘‘bhagavatā paññattaṃ sattannaṃ sattāhakaraṇīyena pahite gantuṃ, na tveva appahite; pañcannaṃ sattāhakaraṇīyena appahitepi gantuṃ, pageva pahiteti. Ayañca me mātā gilānā, sā ca anupāsikā, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, sattannaṃ sattāhakaraṇīyena appahitepi gantuṃ, pageva pahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, mātuyā ca pitussa ca – anujānāmi, bhikkhave, imesaṃ sattannaṃ sattāhakaraṇīyena appahitepi gantuṃ, pageva pahite. Sattāhaṃ sannivatto kātabbo.
ইধ পন, ভিক্খৰে, ভিক্খুস্স মাতা গিলানা হোতি। সা চে পুত্তস্স সন্তিকে দূতং পহিণেয্য – ‘‘অহঞ্হি গিলানা, আগচ্ছতু মে পুত্তো, ইচ্ছামি পুত্তস্স আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো।
Idha pana, bhikkhave, bhikkhussa mātā gilānā hoti. Sā ce puttassa santike dūtaṃ pahiṇeyya – ‘‘ahañhi gilānā, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
ইধ পন, ভিক্খৰে, ভিক্খুস্স পিতা গিলানো হোতি। সো চে পুত্তস্স সন্তিকে দূতং পহিণেয্য – ‘‘অহঞ্হি গিলানো, আগচ্ছতু মে পুত্তো, ইচ্ছামি পুত্তস্স আগত’’ন্তি, গন্তব্বং, ভিক্খৰে, সত্তাহকরণীযেন, অপ্পহিতেপি, পগেৰ পহিতে – ‘‘গিলানভত্তং ৰা পরিযেসিস্সামি, গিলানুপট্ঠাকভত্তং ৰা পরিযেসিস্সামি, গিলানভেসজ্জং ৰা পরিযেসিস্সামি, পুচ্ছিস্সামি ৰা, উপট্ঠহিস্সামি ৰা’’তি। সত্তাহং সন্নিৰত্তো কাতব্বো।
Idha pana, bhikkhave, bhikkhussa pitā gilāno hoti. So ce puttassa santike dūtaṃ pahiṇeyya – ‘‘ahañhi gilāno, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
সত্তন্নং অপ্পহিতেপি অনুজাননা নিট্ঠিতা।
Sattannaṃ appahitepi anujānanā niṭṭhitā.
