| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
111. සත්‌තන්‌නං අප්‌පහිතෙපි අනුජානනා
111. Sattannaṃ appahitepi anujānanā
198. තෙන ඛො පන සමයෙන අඤ්‌ඤතරස්‌ස භික්‌ඛුනො මාතා ගිලානා හොති. සා පුත්‌තස්‌ස සන්‌තිකෙ දූතං පාහෙසි – ‘‘අහඤ්‌හි ගිලානා, ආගච්‌ඡතු මෙ පුත්‌තො, ඉච්‌ඡාමි පුත්‌තස්‌ස ආගත’’න්‌ති. අථ ඛො තස්‌ස භික්‌ඛුනො එතදහොසි – ‘‘භගවතා පඤ්‌ඤත්‌තං සත්‌තන්‌නං සත්‌තාහකරණීයෙන පහිතෙ ගන්‌තුං, න ත්‌වෙව අප්‌පහිතෙ; පඤ්‌චන්‌නං සත්‌තාහකරණීයෙන අප්‌පහිතෙපි ගන්‌තුං, පගෙව පහිතෙති. අයඤ්‌ච මෙ මාතා ගිලානා, සා ච අනුපාසිකා, කථං නු ඛො මයා පටිපජ්‌ජිතබ්‌බ’’න්‌ති? භගවතො එතමත්‌ථං ආරොචෙසුං. අනුජානාමි, භික්‌ඛවෙ, සත්‌තන්‌නං සත්‌තාහකරණීයෙන අප්‌පහිතෙපි ගන්‌තුං, පගෙව පහිතෙ. භික්‌ඛුස්‌ස, භික්‌ඛුනියා, සික්‌ඛමානාය, සාමණෙරස්‌ස, සාමණෙරියා, මාතුයා ච පිතුස්‌ස ච – අනුජානාමි, භික්‌ඛවෙ, ඉමෙසං සත්‌තන්‌නං සත්‌තාහකරණීයෙන අප්‌පහිතෙපි ගන්‌තුං, පගෙව පහිතෙ. සත්‌තාහං සන්‌නිවත්‌තො කාතබ්‌බො.
198. Tena kho pana samayena aññatarassa bhikkhuno mātā gilānā hoti. Sā puttassa santike dūtaṃ pāhesi – ‘‘ahañhi gilānā, āgacchatu me putto, icchāmi puttassa āgata’’nti. Atha kho tassa bhikkhuno etadahosi – ‘‘bhagavatā paññattaṃ sattannaṃ sattāhakaraṇīyena pahite gantuṃ, na tveva appahite; pañcannaṃ sattāhakaraṇīyena appahitepi gantuṃ, pageva pahiteti. Ayañca me mātā gilānā, sā ca anupāsikā, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, sattannaṃ sattāhakaraṇīyena appahitepi gantuṃ, pageva pahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, mātuyā ca pitussa ca – anujānāmi, bhikkhave, imesaṃ sattannaṃ sattāhakaraṇīyena appahitepi gantuṃ, pageva pahite. Sattāhaṃ sannivatto kātabbo.
ඉධ පන, භික්‌ඛවෙ, භික්‌ඛුස්‌ස මාතා ගිලානා හොති. සා චෙ පුත්‌තස්‌ස සන්‌තිකෙ දූතං පහිණෙය්‍ය – ‘‘අහඤ්‌හි ගිලානා, ආගච්‌ඡතු මෙ පුත්‌තො, ඉච්‌ඡාමි පුත්‌තස්‌ස ආගත’’න්‌ති, ගන්‌තබ්‌බං, භික්‌ඛවෙ, සත්‌තාහකරණීයෙන, අප්‌පහිතෙපි, පගෙව පහිතෙ – ‘‘ගිලානභත්‌තං වා පරියෙසිස්‌සාමි, ගිලානුපට්‌ඨාකභත්‌තං වා පරියෙසිස්‌සාමි, ගිලානභෙසජ්‌ජං වා පරියෙසිස්‌සාමි, පුච්‌ඡිස්‌සාමි වා, උපට්‌ඨහිස්‌සාමි වා’’ති. සත්‌තාහං සන්‌නිවත්‌තො කාතබ්‌බො.
Idha pana, bhikkhave, bhikkhussa mātā gilānā hoti. Sā ce puttassa santike dūtaṃ pahiṇeyya – ‘‘ahañhi gilānā, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
ඉධ පන, භික්‌ඛවෙ, භික්‌ඛුස්‌ස පිතා ගිලානො හොති. සො චෙ පුත්‌තස්‌ස සන්‌තිකෙ දූතං පහිණෙය්‍ය – ‘‘අහඤ්‌හි ගිලානො, ආගච්‌ඡතු මෙ පුත්‌තො, ඉච්‌ඡාමි පුත්‌තස්‌ස ආගත’’න්‌ති, ගන්‌තබ්‌බං, භික්‌ඛවෙ, සත්‌තාහකරණීයෙන, අප්‌පහිතෙපි, පගෙව පහිතෙ – ‘‘ගිලානභත්‌තං වා පරියෙසිස්‌සාමි, ගිලානුපට්‌ඨාකභත්‌තං වා පරියෙසිස්‌සාමි, ගිලානභෙසජ්‌ජං වා පරියෙසිස්‌සාමි, පුච්‌ඡිස්‌සාමි වා, උපට්‌ඨහිස්‌සාමි වා’’ති. සත්‌තාහං සන්‌නිවත්‌තො කාතබ්‌බො.
Idha pana, bhikkhave, bhikkhussa pitā gilāno hoti. So ce puttassa santike dūtaṃ pahiṇeyya – ‘‘ahañhi gilāno, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
සත්‌තන්‌නං අප්‌පහිතෙපි අනුජානනා නිට්‌ඨිතා.
Sattannaṃ appahitepi anujānanā niṭṭhitā.
