| Library / Tipiṭaka / ਤਿਪਿਟਕ • Tipiṭaka / ਮਹਾવਗ੍ਗਪਾਲ਼ਿ • Mahāvaggapāḷi |
੧੧੧. ਸਤ੍ਤਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਾ
111. Sattannaṃ appahitepi anujānanā
੧੯੮. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਮਾਤਾ ਗਿਲਾਨਾ ਹੋਤਿ। ਸਾ ਪੁਤ੍ਤਸ੍ਸ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਤੁ ਮੇ ਪੁਤ੍ਤੋ, ਇਚ੍ਛਾਮਿ ਪੁਤ੍ਤਸ੍ਸ ਆਗਤ’’ਨ੍ਤਿ। ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗવਤਾ ਪਞ੍ਞਤ੍ਤਂ ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਪਹਿਤੇ ਗਨ੍ਤੁਂ, ਨ ਤ੍વੇવ ਅਪ੍ਪਹਿਤੇ; ਪਞ੍ਚਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇવ ਪਹਿਤੇਤਿ। ਅਯਞ੍ਚ ਮੇ ਮਾਤਾ ਗਿਲਾਨਾ, ਸਾ ਚ ਅਨੁਪਾਸਿਕਾ, ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਨੁਜਾਨਾਮਿ, ਭਿਕ੍ਖવੇ, ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇવ ਪਹਿਤੇ। ਭਿਕ੍ਖੁਸ੍ਸ, ਭਿਕ੍ਖੁਨਿਯਾ, ਸਿਕ੍ਖਮਾਨਾਯ, ਸਾਮਣੇਰਸ੍ਸ, ਸਾਮਣੇਰਿਯਾ, ਮਾਤੁਯਾ ਚ ਪਿਤੁਸ੍ਸ ਚ – ਅਨੁਜਾਨਾਮਿ, ਭਿਕ੍ਖવੇ, ਇਮੇਸਂ ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪ੍ਪਹਿਤੇਪਿ ਗਨ੍ਤੁਂ, ਪਗੇવ ਪਹਿਤੇ। ਸਤ੍ਤਾਹਂ ਸਨ੍ਨਿવਤ੍ਤੋ ਕਾਤਬ੍ਬੋ।
198. Tena kho pana samayena aññatarassa bhikkhuno mātā gilānā hoti. Sā puttassa santike dūtaṃ pāhesi – ‘‘ahañhi gilānā, āgacchatu me putto, icchāmi puttassa āgata’’nti. Atha kho tassa bhikkhuno etadahosi – ‘‘bhagavatā paññattaṃ sattannaṃ sattāhakaraṇīyena pahite gantuṃ, na tveva appahite; pañcannaṃ sattāhakaraṇīyena appahitepi gantuṃ, pageva pahiteti. Ayañca me mātā gilānā, sā ca anupāsikā, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, sattannaṃ sattāhakaraṇīyena appahitepi gantuṃ, pageva pahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, mātuyā ca pitussa ca – anujānāmi, bhikkhave, imesaṃ sattannaṃ sattāhakaraṇīyena appahitepi gantuṃ, pageva pahite. Sattāhaṃ sannivatto kātabbo.
ਇਧ ਪਨ, ਭਿਕ੍ਖવੇ, ਭਿਕ੍ਖੁਸ੍ਸ ਮਾਤਾ ਗਿਲਾਨਾ ਹੋਤਿ। ਸਾ ਚੇ ਪੁਤ੍ਤਸ੍ਸ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨਾ, ਆਗਚ੍ਛਤੁ ਮੇ ਪੁਤ੍ਤੋ, ਇਚ੍ਛਾਮਿ ਪੁਤ੍ਤਸ੍ਸ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖવੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇવ ਪਹਿਤੇ – ‘‘ਗਿਲਾਨਭਤ੍ਤਂ વਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ વਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ વਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ વਾ, ਉਪਟ੍ਠਹਿਸ੍ਸਾਮਿ વਾ’’ਤਿ। ਸਤ੍ਤਾਹਂ ਸਨ੍ਨਿવਤ੍ਤੋ ਕਾਤਬ੍ਬੋ।
Idha pana, bhikkhave, bhikkhussa mātā gilānā hoti. Sā ce puttassa santike dūtaṃ pahiṇeyya – ‘‘ahañhi gilānā, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
ਇਧ ਪਨ, ਭਿਕ੍ਖવੇ, ਭਿਕ੍ਖੁਸ੍ਸ ਪਿਤਾ ਗਿਲਾਨੋ ਹੋਤਿ। ਸੋ ਚੇ ਪੁਤ੍ਤਸ੍ਸ ਸਨ੍ਤਿਕੇ ਦੂਤਂ ਪਹਿਣੇਯ੍ਯ – ‘‘ਅਹਞ੍ਹਿ ਗਿਲਾਨੋ, ਆਗਚ੍ਛਤੁ ਮੇ ਪੁਤ੍ਤੋ, ਇਚ੍ਛਾਮਿ ਪੁਤ੍ਤਸ੍ਸ ਆਗਤ’’ਨ੍ਤਿ, ਗਨ੍ਤਬ੍ਬਂ, ਭਿਕ੍ਖવੇ, ਸਤ੍ਤਾਹਕਰਣੀਯੇਨ, ਅਪ੍ਪਹਿਤੇਪਿ, ਪਗੇવ ਪਹਿਤੇ – ‘‘ਗਿਲਾਨਭਤ੍ਤਂ વਾ ਪਰਿਯੇਸਿਸ੍ਸਾਮਿ, ਗਿਲਾਨੁਪਟ੍ਠਾਕਭਤ੍ਤਂ વਾ ਪਰਿਯੇਸਿਸ੍ਸਾਮਿ, ਗਿਲਾਨਭੇਸਜ੍ਜਂ વਾ ਪਰਿਯੇਸਿਸ੍ਸਾਮਿ, ਪੁਚ੍ਛਿਸ੍ਸਾਮਿ વਾ, ਉਪਟ੍ਠਹਿਸ੍ਸਾਮਿ વਾ’’ਤਿ। ਸਤ੍ਤਾਹਂ ਸਨ੍ਨਿવਤ੍ਤੋ ਕਾਤਬ੍ਬੋ।
Idha pana, bhikkhave, bhikkhussa pitā gilāno hoti. So ce puttassa santike dūtaṃ pahiṇeyya – ‘‘ahañhi gilāno, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
ਸਤ੍ਤਨ੍ਨਂ ਅਪ੍ਪਹਿਤੇਪਿ ਅਨੁਜਾਨਨਾ ਨਿਟ੍ਠਿਤਾ।
Sattannaṃ appahitepi anujānanā niṭṭhitā.
