| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
ஸத்தஸமத²னிதா³னவண்ணனா
Sattasamathanidānavaṇṇanā
352. கிங்னிதா³னோதி புச்சா²விஸ்ஸஜ்ஜனே நிதா³னங் நிதா³னமஸ்ஸாதி நிதா³னநிதா³னோ. தத்த² ஸங்க⁴ஸம்முக²தா, த⁴ம்மஸம்முக²தா, வினயஸம்முக²தா, புக்³க³லஸம்முக²தாதி இத³ங் ஸம்முகா²வினயஸ்ஸ நிதா³னங். ஸதிவேபுல்லபத்தோ கீ²ணாஸவோ லத்³து⁴பவாதோ³ ஸதிவினயஸ்ஸ நிதா³னங். உம்மத்தகோ பி⁴க்கு² அமூள்ஹவினயஸ்ஸ நிதா³னங். யோ ச தே³ஸேதி, யஸ்ஸ ச தே³ஸேதி, உபி⁴ன்னங் ஸம்முகீ²பா⁴வோ படிஞ்ஞாதகரணஸ்ஸ நிதா³னங். ப⁴ண்ட³னஜாதானங் அதி⁴கரணங் வூபஸமேதுங் அஸக்குணெய்யதா யேபு⁴ய்யஸிகாய நிதா³னங். பாபுஸ்ஸன்னோ புக்³க³லோ தஸ்ஸபாபியஸிகாய நிதா³னங். ப⁴ண்ட³னஜாதானங் ப³ஹு அஸ்ஸாமணகஅஜ்ஜா²சாரோ திணவத்தா²ரகஸ்ஸ நிதா³னங். ஹேதுபச்சயவாரா வுத்தனயா ஏவ.
352.Kiṃnidānoti pucchāvissajjane nidānaṃ nidānamassāti nidānanidāno. Tattha saṅghasammukhatā, dhammasammukhatā, vinayasammukhatā, puggalasammukhatāti idaṃ sammukhāvinayassa nidānaṃ. Sativepullapatto khīṇāsavo laddhupavādo sativinayassa nidānaṃ. Ummattako bhikkhu amūḷhavinayassa nidānaṃ. Yo ca deseti, yassa ca deseti, ubhinnaṃ sammukhībhāvo paṭiññātakaraṇassa nidānaṃ. Bhaṇḍanajātānaṃ adhikaraṇaṃ vūpasametuṃ asakkuṇeyyatā yebhuyyasikāya nidānaṃ. Pāpussanno puggalo tassapāpiyasikāya nidānaṃ. Bhaṇḍanajātānaṃ bahu assāmaṇakaajjhācāro tiṇavatthārakassa nidānaṃ. Hetupaccayavārā vuttanayā eva.
353. மூலபுச்சா²ய விஸ்ஸஜ்ஜனங் உத்தானமேவ. ஸமுட்டா²னபுச்சா²ய கிஞ்சாபி ‘‘ஸத்தன்னங் ஸமதா²னங் கதமே ச²த்திங்ஸ ஸமுட்டா²னா’’தி வுத்தங், ஸம்முகா²வினயஸ்ஸ பன கம்மஸங்க³ஹாபா⁴வேன ஸமுட்டா²னாபா⁴வதோ ச²ன்னங்யேவ ஸமதா²னங் ச² ஸமுட்டா²னானி விப⁴த்தானி. தத்த² கம்மஸ்ஸ கிரியாதி ஞத்தி வேதி³தப்³பா³. கரணந்தி தஸ்ஸாயேவ ஞத்தியா ட²பேதப்³ப³காலே ட²பனங். உபக³மனந்தி ஸயங் உபக³மனங்; அத்தனாயேவ தஸ்ஸ கம்மஸ்ஸ கரணந்தி அத்தோ². அஜ்ஜு²பக³மனந்தி அஜ்ஜே²ஸனுபக³மனங்; அஞ்ஞங் ஸத்³தி⁴விஹாரிகாதி³கங் ‘‘இத³ங் கம்மங் கரோஹீ’’தி அஜ்ஜே²ஸனந்தி அத்தோ². அதி⁴வாஸனாதி ‘‘ருச்சதி மே ஏதங், கரோது ஸங்கோ⁴’’தி ஏவங் அதி⁴வாஸனா; ச²ந்த³தா³னந்தி அத்தோ². அப்படிக்கோஸனாதி ‘‘ந மேதங் க²மதி, மா ஏவங் கரோதா²’’தி அப்படிஸேத⁴னா. இதி ச²ன்னங் ச²க்கானங் வஸேன ச²த்திங்ஸ ஸமுட்டா²னா வேதி³தப்³பா³.
353. Mūlapucchāya vissajjanaṃ uttānameva. Samuṭṭhānapucchāya kiñcāpi ‘‘sattannaṃ samathānaṃ katame chattiṃsa samuṭṭhānā’’ti vuttaṃ, sammukhāvinayassa pana kammasaṅgahābhāvena samuṭṭhānābhāvato channaṃyeva samathānaṃ cha samuṭṭhānāni vibhattāni. Tattha kammassa kiriyāti ñatti veditabbā. Karaṇanti tassāyeva ñattiyā ṭhapetabbakāle ṭhapanaṃ. Upagamananti sayaṃ upagamanaṃ; attanāyeva tassa kammassa karaṇanti attho. Ajjhupagamananti ajjhesanupagamanaṃ; aññaṃ saddhivihārikādikaṃ ‘‘idaṃ kammaṃ karohī’’ti ajjhesananti attho. Adhivāsanāti ‘‘ruccati me etaṃ, karotu saṅgho’’ti evaṃ adhivāsanā; chandadānanti attho. Appaṭikkosanāti ‘‘na metaṃ khamati, mā evaṃ karothā’’ti appaṭisedhanā. Iti channaṃ chakkānaṃ vasena chattiṃsa samuṭṭhānā veditabbā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 9. ஸத்தஸமத²னிதா³னங் • 9. Sattasamathanidānaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அதி⁴கரணபே⁴த³வண்ணனா • Adhikaraṇabhedavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அதி⁴கரணனிதா³னாதி³வண்ணனா • Adhikaraṇanidānādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஸத்தஸமத²னிதா³னவண்ணனா • Sattasamathanidānavaṇṇanā
