| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
সত্তসমথনিদানৰণ্ণনা
Sattasamathanidānavaṇṇanā
৩৫২. কিংনিদানোতি পুচ্ছাৰিস্সজ্জনে নিদানং নিদানমস্সাতি নিদাননিদানো। তত্থ সঙ্ঘসম্মুখতা, ধম্মসম্মুখতা, ৰিনযসম্মুখতা, পুগ্গলসম্মুখতাতি ইদং সম্মুখাৰিনযস্স নিদানং। সতিৰেপুল্লপত্তো খীণাসৰো লদ্ধুপৰাদো সতিৰিনযস্স নিদানং। উম্মত্তকো ভিক্খু অমূল়্হৰিনযস্স নিদানং। যো চ দেসেতি, যস্স চ দেসেতি, উভিন্নং সম্মুখীভাৰো পটিঞ্ঞাতকরণস্স নিদানং। ভণ্ডনজাতানং অধিকরণং ৰূপসমেতুং অসক্কুণেয্যতা যেভুয্যসিকায নিদানং। পাপুস্সন্নো পুগ্গলো তস্সপাপিযসিকায নিদানং। ভণ্ডনজাতানং বহু অস্সামণকঅজ্ঝাচারো তিণৰত্থারকস্স নিদানং। হেতুপচ্চযৰারা ৰুত্তনযা এৰ।
352.Kiṃnidānoti pucchāvissajjane nidānaṃ nidānamassāti nidānanidāno. Tattha saṅghasammukhatā, dhammasammukhatā, vinayasammukhatā, puggalasammukhatāti idaṃ sammukhāvinayassa nidānaṃ. Sativepullapatto khīṇāsavo laddhupavādo sativinayassa nidānaṃ. Ummattako bhikkhu amūḷhavinayassa nidānaṃ. Yo ca deseti, yassa ca deseti, ubhinnaṃ sammukhībhāvo paṭiññātakaraṇassa nidānaṃ. Bhaṇḍanajātānaṃ adhikaraṇaṃ vūpasametuṃ asakkuṇeyyatā yebhuyyasikāya nidānaṃ. Pāpussanno puggalo tassapāpiyasikāya nidānaṃ. Bhaṇḍanajātānaṃ bahu assāmaṇakaajjhācāro tiṇavatthārakassa nidānaṃ. Hetupaccayavārā vuttanayā eva.
৩৫৩. মূলপুচ্ছায ৰিস্সজ্জনং উত্তানমেৰ। সমুট্ঠানপুচ্ছায কিঞ্চাপি ‘‘সত্তন্নং সমথানং কতমে ছত্তিংস সমুট্ঠানা’’তি ৰুত্তং, সম্মুখাৰিনযস্স পন কম্মসঙ্গহাভাৰেন সমুট্ঠানাভাৰতো ছন্নংযেৰ সমথানং ছ সমুট্ঠানানি ৰিভত্তানি। তত্থ কম্মস্স কিরিযাতি ঞত্তি ৰেদিতব্বা। করণন্তি তস্সাযেৰ ঞত্তিযা ঠপেতব্বকালে ঠপনং। উপগমনন্তি সযং উপগমনং; অত্তনাযেৰ তস্স কম্মস্স করণন্তি অত্থো। অজ্ঝুপগমনন্তি অজ্ঝেসনুপগমনং; অঞ্ঞং সদ্ধিৰিহারিকাদিকং ‘‘ইদং কম্মং করোহী’’তি অজ্ঝেসনন্তি অত্থো। অধিৰাসনাতি ‘‘রুচ্চতি মে এতং, করোতু সঙ্ঘো’’তি এৰং অধিৰাসনা; ছন্দদানন্তি অত্থো। অপ্পটিক্কোসনাতি ‘‘ন মেতং খমতি, মা এৰং করোথা’’তি অপ্পটিসেধনা। ইতি ছন্নং ছক্কানং ৰসেন ছত্তিংস সমুট্ঠানা ৰেদিতব্বা।
353. Mūlapucchāya vissajjanaṃ uttānameva. Samuṭṭhānapucchāya kiñcāpi ‘‘sattannaṃ samathānaṃ katame chattiṃsa samuṭṭhānā’’ti vuttaṃ, sammukhāvinayassa pana kammasaṅgahābhāvena samuṭṭhānābhāvato channaṃyeva samathānaṃ cha samuṭṭhānāni vibhattāni. Tattha kammassa kiriyāti ñatti veditabbā. Karaṇanti tassāyeva ñattiyā ṭhapetabbakāle ṭhapanaṃ. Upagamananti sayaṃ upagamanaṃ; attanāyeva tassa kammassa karaṇanti attho. Ajjhupagamananti ajjhesanupagamanaṃ; aññaṃ saddhivihārikādikaṃ ‘‘idaṃ kammaṃ karohī’’ti ajjhesananti attho. Adhivāsanāti ‘‘ruccati me etaṃ, karotu saṅgho’’ti evaṃ adhivāsanā; chandadānanti attho. Appaṭikkosanāti ‘‘na metaṃ khamati, mā evaṃ karothā’’ti appaṭisedhanā. Iti channaṃ chakkānaṃ vasena chattiṃsa samuṭṭhānā veditabbā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৯. সত্তসমথনিদানং • 9. Sattasamathanidānaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণনিদানাদিৰণ্ণনা • Adhikaraṇanidānādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / সত্তসমথনিদানৰণ্ণনা • Sattasamathanidānavaṇṇanā
