| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
সত্তসমথনিদানৰণ্ণনা
Sattasamathanidānavaṇṇanā
৩৫২. অস্সাতি সম্মুখাৰিনযস্স। তত্থাতি ‘‘নিদাননিদানো’’তি পাঠে। ইদন্তি সম্মুখাচতুক্কং। লদ্ধুপৰাদোতি লদ্ধো পরেসং উপৰাদো যেনাতি লদ্ধুপৰাদো, খীণাসৰো। যস্স চাতি যস্স চ সন্তিকেতি সম্বন্ধো। উভিন্নন্তি দেসকপটিগ্গাহকানং দ্ৰিন্নং।
352.Assāti sammukhāvinayassa. Tatthāti ‘‘nidānanidāno’’ti pāṭhe. Idanti sammukhācatukkaṃ. Laddhupavādoti laddho paresaṃ upavādo yenāti laddhupavādo, khīṇāsavo. Yassa cāti yassa ca santiketi sambandho. Ubhinnanti desakapaṭiggāhakānaṃ dvinnaṃ.
৩৫৩. ননু পুচ্ছাযং ‘‘সত্তন্নং সমথান’’ন্তি ৰুত্তং, কস্মা পন ৰিস্সজ্জনাযং সম্মুখাৰিনযস্স সমুট্ঠানং ন ৰুত্তন্তি আহ ‘‘কিঞ্চাপী’’তিআদি। তত্থ কিঞ্চাপি ৰুত্তন্তি যোজনা। এত্থ কিঞ্চাপিসদ্দো সম্ভাৰনত্থো, পনসদ্দো গরহত্থো। তথা ৰুত্তম্পীতি যোজনা। কম্মসঙ্গহাভাৰেনাতি কম্মে সঙ্গহস্স অভাৰেন। তত্থাতি তস্মিং ‘‘কম্মস্স কিরিযা’’তিআদিপাঠে। কম্মং করীযতি ইমাযাতি কিরিযা, ঞত্তি। তেন ৰুত্তং ‘‘কম্মস্স কিরিযাতি ঞত্তি ৰেদিতব্বা’’তি। করিযতে ঠপিযতে করণং। সযং উপগমিযতে উপগমনং। অজ্ঝেসনেন পরং উপগমাপিযতে অজ্ঝুপগমনং। অধিৰাসিযতে অধিৰাসনা। অপ্পটিক্কোসিযতে অপটিক্কোসনা। ইতি ইমমত্থং দস্সেন্তো আহ ‘‘করণন্তি তস্সাযেৰা’’তিআদি। এতন্তি কম্মং। মেতি ময্হং। খমুধাতুপযোগে সম্পদানত্থে সম্পদানৰচনং। অথ ৰা মেতি মযা। কত্ৰত্থে করণৰচনং, সামিৰচনং ৰা। খমতীতি কত্তুরূপসদিসং কম্মরূপং। রূপঞ্হি কত্তুরূপসদিসং কম্মরূপং ‘‘খমতি সঙ্ঘস্সা’’তিআদীসু (মহাৰ॰ ১২৭) ৰিয। কম্মরূপসদিসং কত্তুরূপং ‘‘উপাসকো সীলং সমাদিযতী’’তিআদীসু (পট্ঠা॰ ১.১.৪২৩) ৰিয। এত্থ কম্মত্থে পৰত্তো যপচ্চযো লোপোতি দট্ঠব্বং।
353. Nanu pucchāyaṃ ‘‘sattannaṃ samathāna’’nti vuttaṃ, kasmā pana vissajjanāyaṃ sammukhāvinayassa samuṭṭhānaṃ na vuttanti āha ‘‘kiñcāpī’’tiādi. Tattha kiñcāpi vuttanti yojanā. Ettha kiñcāpisaddo sambhāvanattho, panasaddo garahattho. Tathā vuttampīti yojanā. Kammasaṅgahābhāvenāti kamme saṅgahassa abhāvena. Tatthāti tasmiṃ ‘‘kammassa kiriyā’’tiādipāṭhe. Kammaṃ karīyati imāyāti kiriyā, ñatti. Tena vuttaṃ ‘‘kammassa kiriyāti ñatti veditabbā’’ti. Kariyate ṭhapiyate karaṇaṃ. Sayaṃ upagamiyate upagamanaṃ. Ajjhesanena paraṃ upagamāpiyate ajjhupagamanaṃ. Adhivāsiyate adhivāsanā. Appaṭikkosiyate apaṭikkosanā. Iti imamatthaṃ dassento āha ‘‘karaṇanti tassāyevā’’tiādi. Etanti kammaṃ. Meti mayhaṃ. Khamudhātupayoge sampadānatthe sampadānavacanaṃ. Atha vā meti mayā. Katvatthe karaṇavacanaṃ, sāmivacanaṃ vā. Khamatīti katturūpasadisaṃ kammarūpaṃ. Rūpañhi katturūpasadisaṃ kammarūpaṃ ‘‘khamati saṅghassā’’tiādīsu (mahāva. 127) viya. Kammarūpasadisaṃ katturūpaṃ ‘‘upāsako sīlaṃ samādiyatī’’tiādīsu (paṭṭhā. 1.1.423) viya. Ettha kammatthe pavatto yapaccayo lopoti daṭṭhabbaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৯. সত্তসমথনিদানং • 9. Sattasamathanidānaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / সত্তসমথনিদানৰণ্ণনা • Sattasamathanidānavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অধিকরণভেদৰণ্ণনা • Adhikaraṇabhedavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অধিকরণনিদানাদিৰণ্ণনা • Adhikaraṇanidānādivaṇṇanā
