| Library / Tipiṭaka / තිපිටක • Tipiṭaka / පරිවාර-අට්‌ඨකථා • Parivāra-aṭṭhakathā |
සත්‌තසමථනිදානවණ්‌ණනා
Sattasamathanidānavaṇṇanā
352. කිංනිදානොති පුච්‌ඡාවිස්‌සජ්‌ජනෙ නිදානං නිදානමස්‌සාති නිදානනිදානො. තත්‌ථ සඞ්‌ඝසම්‌මුඛතා, ධම්‌මසම්‌මුඛතා, විනයසම්‌මුඛතා, පුග්‌ගලසම්‌මුඛතාති ඉදං සම්‌මුඛාවිනයස්‌ස නිදානං. සතිවෙපුල්‌ලපත්‌තො ඛීණාසවො ලද්‌ධුපවාදො සතිවිනයස්‌ස නිදානං. උම්‌මත්‌තකො භික්‌ඛු අමූළ්‌හවිනයස්‌ස නිදානං. යො ච දෙසෙති, යස්‌ස ච දෙසෙති, උභින්‌නං සම්‌මුඛීභාවො පටිඤ්‌ඤාතකරණස්‌ස නිදානං. භණ්‌ඩනජාතානං අධිකරණං වූපසමෙතුං අසක්‌කුණෙය්‍යතා යෙභුය්‍යසිකාය නිදානං. පාපුස්‌සන්‌නො පුග්‌ගලො තස්‌සපාපියසිකාය නිදානං. භණ්‌ඩනජාතානං බහු අස්‌සාමණකඅජ්‌ඣාචාරො තිණවත්‌ථාරකස්‌ස නිදානං. හෙතුපච්‌චයවාරා වුත්‌තනයා එව.
352.Kiṃnidānoti pucchāvissajjane nidānaṃ nidānamassāti nidānanidāno. Tattha saṅghasammukhatā, dhammasammukhatā, vinayasammukhatā, puggalasammukhatāti idaṃ sammukhāvinayassa nidānaṃ. Sativepullapatto khīṇāsavo laddhupavādo sativinayassa nidānaṃ. Ummattako bhikkhu amūḷhavinayassa nidānaṃ. Yo ca deseti, yassa ca deseti, ubhinnaṃ sammukhībhāvo paṭiññātakaraṇassa nidānaṃ. Bhaṇḍanajātānaṃ adhikaraṇaṃ vūpasametuṃ asakkuṇeyyatā yebhuyyasikāya nidānaṃ. Pāpussanno puggalo tassapāpiyasikāya nidānaṃ. Bhaṇḍanajātānaṃ bahu assāmaṇakaajjhācāro tiṇavatthārakassa nidānaṃ. Hetupaccayavārā vuttanayā eva.
353. මූලපුච්‌ඡාය විස්‌සජ්‌ජනං උත්‌තානමෙව. සමුට්‌ඨානපුච්‌ඡාය කිඤ්‌චාපි ‘‘සත්‌තන්‌නං සමථානං කතමෙ ඡත්‌තිංස සමුට්‌ඨානා’’ති වුත්‌තං, සම්‌මුඛාවිනයස්‌ස පන කම්‌මසඞ්‌ගහාභාවෙන සමුට්‌ඨානාභාවතො ඡන්‌නංයෙව සමථානං ඡ සමුට්‌ඨානානි විභත්‌තානි. තත්‌ථ කම්‌මස්‌ස කිරියාති ඤත්‌ති වෙදිතබ්‌බා. කරණන්‌ති තස්‌සායෙව ඤත්‌තියා ඨපෙතබ්‌බකාලෙ ඨපනං. උපගමනන්‌ති සයං උපගමනං; අත්‌තනායෙව තස්‌ස කම්‌මස්‌ස කරණන්‌ති අත්‌ථො. අජ්‌ඣුපගමනන්‌ති අජ්‌ඣෙසනුපගමනං; අඤ්‌ඤං සද්‌ධිවිහාරිකාදිකං ‘‘ඉදං කම්‌මං කරොහී’’ති අජ්‌ඣෙසනන්‌ති අත්‌ථො. අධිවාසනාති ‘‘රුච්‌චති මෙ එතං, කරොතු සඞ්‌ඝො’’ති එවං අධිවාසනා; ඡන්‌දදානන්‌ති අත්‌ථො. අප්‌පටික්‌කොසනාති ‘‘න මෙතං ඛමති, මා එවං කරොථා’’ති අප්‌පටිසෙධනා. ඉති ඡන්‌නං ඡක්‌කානං වසෙන ඡත්‌තිංස සමුට්‌ඨානා වෙදිතබ්‌බා.
353. Mūlapucchāya vissajjanaṃ uttānameva. Samuṭṭhānapucchāya kiñcāpi ‘‘sattannaṃ samathānaṃ katame chattiṃsa samuṭṭhānā’’ti vuttaṃ, sammukhāvinayassa pana kammasaṅgahābhāvena samuṭṭhānābhāvato channaṃyeva samathānaṃ cha samuṭṭhānāni vibhattāni. Tattha kammassa kiriyāti ñatti veditabbā. Karaṇanti tassāyeva ñattiyā ṭhapetabbakāle ṭhapanaṃ. Upagamananti sayaṃ upagamanaṃ; attanāyeva tassa kammassa karaṇanti attho. Ajjhupagamananti ajjhesanupagamanaṃ; aññaṃ saddhivihārikādikaṃ ‘‘idaṃ kammaṃ karohī’’ti ajjhesananti attho. Adhivāsanāti ‘‘ruccati me etaṃ, karotu saṅgho’’ti evaṃ adhivāsanā; chandadānanti attho. Appaṭikkosanāti ‘‘na metaṃ khamati, mā evaṃ karothā’’ti appaṭisedhanā. Iti channaṃ chakkānaṃ vasena chattiṃsa samuṭṭhānā veditabbā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 9. සත්‌තසමථනිදානං • 9. Sattasamathanidānaṃ
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අධිකරණභෙදවණ්‌ණනා • Adhikaraṇabhedavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අධිකරණනිදානාදිවණ්‌ණනා • Adhikaraṇanidānādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / සත්‌තසමථනිදානවණ්‌ණනා • Sattasamathanidānavaṇṇanā
