| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
སཏྟསམཐནིདཱནཝཎྞནཱ
Sattasamathanidānavaṇṇanā
༣༥༢. ཨསྶཱཏི སམྨུཁཱཝིནཡསྶ། ཏཏྠཱཏི ‘‘ནིདཱནནིདཱནོ’’ཏི པཱཋེ། ཨིདནྟི སམྨུཁཱཙཏུཀྐཾ། ལདྡྷུཔཝཱདོཏི ལདྡྷོ པརེསཾ ཨུཔཝཱདོ ཡེནཱཏི ལདྡྷུཔཝཱདོ, ཁཱིཎཱསཝོ། ཡསྶ ཙཱཏི ཡསྶ ཙ སནྟིཀེཏི སམྦནྡྷོ། ཨུབྷིནྣནྟི དེསཀཔཊིགྒཱཧཀཱནཾ དྭིནྣཾ།
352.Assāti sammukhāvinayassa. Tatthāti ‘‘nidānanidāno’’ti pāṭhe. Idanti sammukhācatukkaṃ. Laddhupavādoti laddho paresaṃ upavādo yenāti laddhupavādo, khīṇāsavo. Yassa cāti yassa ca santiketi sambandho. Ubhinnanti desakapaṭiggāhakānaṃ dvinnaṃ.
༣༥༣. ནནུ པུཙྪཱཡཾ ‘‘སཏྟནྣཾ སམཐཱན’’ནྟི ཝུཏྟཾ, ཀསྨཱ པན ཝིསྶཛྫནཱཡཾ སམྨུཁཱཝིནཡསྶ སམུཊྛཱནཾ ན ཝུཏྟནྟི ཨཱཧ ‘‘ཀིཉྩཱཔཱི’’ཏིཨཱདི། ཏཏྠ ཀིཉྩཱཔི ཝུཏྟནྟི ཡོཛནཱ། ཨེཏྠ ཀིཉྩཱཔིསདྡོ སམྦྷཱཝནཏྠོ, པནསདྡོ གརཧཏྠོ། ཏཐཱ ཝུཏྟམྤཱིཏི ཡོཛནཱ། ཀམྨསངྒཧཱབྷཱཝེནཱཏི ཀམྨེ སངྒཧསྶ ཨབྷཱཝེན། ཏཏྠཱཏི ཏསྨིཾ ‘‘ཀམྨསྶ ཀིརིཡཱ’’ཏིཨཱདིཔཱཋེ། ཀམྨཾ ཀརཱིཡཏི ཨིམཱཡཱཏི ཀིརིཡཱ, ཉཏྟི། ཏེན ཝུཏྟཾ ‘‘ཀམྨསྶ ཀིརིཡཱཏི ཉཏྟི ཝེདིཏབྦཱ’’ཏི། ཀརིཡཏེ ཋཔིཡཏེ ཀརཎཾ། སཡཾ ཨུཔགམིཡཏེ ཨུཔགམནཾ། ཨཛ྄ཛྷེསནེན པརཾ ཨུཔགམཱཔིཡཏེ ཨཛ྄ཛྷུཔགམནཾ། ཨདྷིཝཱསིཡཏེ ཨདྷིཝཱསནཱ། ཨཔྤཊིཀྐོསིཡཏེ ཨཔཊིཀྐོསནཱ། ཨིཏི ཨིམམཏྠཾ དསྶེནྟོ ཨཱཧ ‘‘ཀརཎནྟི ཏསྶཱཡེཝཱ’’ཏིཨཱདི། ཨེཏནྟི ཀམྨཾ། མེཏི མཡ྄ཧཾ། ཁམུདྷཱཏུཔཡོགེ སམྤདཱནཏྠེ སམྤདཱནཝཙནཾ། ཨཐ ཝཱ མེཏི མཡཱ། ཀཏྭཏྠེ ཀརཎཝཙནཾ, སཱམིཝཙནཾ ཝཱ། ཁམཏཱིཏི ཀཏྟུརཱུཔསདིསཾ ཀམྨརཱུཔཾ། རཱུཔཉྷི ཀཏྟུརཱུཔསདིསཾ ཀམྨརཱུཔཾ ‘‘ཁམཏི སངྒྷསྶཱ’’ཏིཨཱདཱིསུ (མཧཱཝ॰ ༡༢༧) ཝིཡ། ཀམྨརཱུཔསདིསཾ ཀཏྟུརཱུཔཾ ‘‘ཨུཔཱསཀོ སཱིལཾ སམཱདིཡཏཱི’’ཏིཨཱདཱིསུ (པཊྛཱ॰ ༡.༡.༤༢༣) ཝིཡ། ཨེཏྠ ཀམྨཏྠེ པཝཏྟོ ཡཔཙྩཡོ ལོཔོཏི དཊྛབྦཾ།
353. Nanu pucchāyaṃ ‘‘sattannaṃ samathāna’’nti vuttaṃ, kasmā pana vissajjanāyaṃ sammukhāvinayassa samuṭṭhānaṃ na vuttanti āha ‘‘kiñcāpī’’tiādi. Tattha kiñcāpi vuttanti yojanā. Ettha kiñcāpisaddo sambhāvanattho, panasaddo garahattho. Tathā vuttampīti yojanā. Kammasaṅgahābhāvenāti kamme saṅgahassa abhāvena. Tatthāti tasmiṃ ‘‘kammassa kiriyā’’tiādipāṭhe. Kammaṃ karīyati imāyāti kiriyā, ñatti. Tena vuttaṃ ‘‘kammassa kiriyāti ñatti veditabbā’’ti. Kariyate ṭhapiyate karaṇaṃ. Sayaṃ upagamiyate upagamanaṃ. Ajjhesanena paraṃ upagamāpiyate ajjhupagamanaṃ. Adhivāsiyate adhivāsanā. Appaṭikkosiyate apaṭikkosanā. Iti imamatthaṃ dassento āha ‘‘karaṇanti tassāyevā’’tiādi. Etanti kammaṃ. Meti mayhaṃ. Khamudhātupayoge sampadānatthe sampadānavacanaṃ. Atha vā meti mayā. Katvatthe karaṇavacanaṃ, sāmivacanaṃ vā. Khamatīti katturūpasadisaṃ kammarūpaṃ. Rūpañhi katturūpasadisaṃ kammarūpaṃ ‘‘khamati saṅghassā’’tiādīsu (mahāva. 127) viya. Kammarūpasadisaṃ katturūpaṃ ‘‘upāsako sīlaṃ samādiyatī’’tiādīsu (paṭṭhā. 1.1.423) viya. Ettha kammatthe pavatto yapaccayo lopoti daṭṭhabbaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / པརིཝཱརཔཱལི༹ • Parivārapāḷi / ༩. སཏྟསམཐནིདཱནཾ • 9. Sattasamathanidānaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / པརིཝཱར-ཨཊྛཀཐཱ • Parivāra-aṭṭhakathā / སཏྟསམཐནིདཱནཝཎྞནཱ • Sattasamathanidānavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨདྷིཀརཎབྷེདཝཎྞནཱ • Adhikaraṇabhedavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨདྷིཀརཎནིདཱནཱདིཝཎྞནཱ • Adhikaraṇanidānādivaṇṇanā
