| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ஸத்தஸூரியஸுத்தவண்ணனா
2. Sattasūriyasuttavaṇṇanā
66. து³தியே யஸ்மா அயங் ஸத்தஸூரியதே³ஸனா தேஜோஸங்வட்டத³ஸ்ஸனவஸேன பவத்தா, தஸ்மா தயோ ஸங்வட்டா, திஸ்ஸோ ஸங்வட்டஸீமா, தீணி ஸங்வட்டமூலானீ, தீணி கோலாஹலானீதி அயங் தாவ ஆதி³தோவ இமஸ்ஸ ஸுத்தஸ்ஸ புரேசாரிககதா² வேதி³தப்³பா³. ஸா விஸுத்³தி⁴மக்³கே³ (விஸுத்³தி⁴॰ 2.403) புப்³பே³னிவாஸானுஸ்ஸதினித்³தே³ஸே வித்தா²ரிதாவ. ஏதத³வோசாதி அனிச்சகம்மட்டா²னிகானங் பஞ்சன்னங் பி⁴க்கு²ஸதானங் அஜ்ஜா²ஸயேன உபாதி³ன்னகானங் அனுபாதி³ன்னகானங் ஸங்கா²ரானங் விபத்தித³ஸ்ஸனத்த²ங் ஏதங் ‘‘அனிச்சா, பி⁴க்க²வே, ஸங்கா²ரா’’திஆதி³ஸத்தஸூரியோபமஸுத்தந்தங் அவோச. தத்த² அனிச்சாதி ஹுத்வா அபா⁴வட்டே²ன அனிச்சா. ஸங்கா²ராதி உபாதி³ன்னகஅனுபாதி³ன்னகா ஸங்கா²ரத⁴ம்மா. அத்³து⁴வாதி ஏவங் அசிரட்டே²ன ந து⁴வா. அனஸ்ஸாஸிகாதி அஸஸ்ஸதபா⁴வேன அஸ்ஸாஸரஹிதா. அலமேவாதி யுத்தமேவ.
66. Dutiye yasmā ayaṃ sattasūriyadesanā tejosaṃvaṭṭadassanavasena pavattā, tasmā tayo saṃvaṭṭā, tisso saṃvaṭṭasīmā, tīṇi saṃvaṭṭamūlānī, tīṇi kolāhalānīti ayaṃ tāva āditova imassa suttassa purecārikakathā veditabbā. Sā visuddhimagge (visuddhi. 2.403) pubbenivāsānussatiniddese vitthāritāva. Etadavocāti aniccakammaṭṭhānikānaṃ pañcannaṃ bhikkhusatānaṃ ajjhāsayena upādinnakānaṃ anupādinnakānaṃ saṅkhārānaṃ vipattidassanatthaṃ etaṃ ‘‘aniccā, bhikkhave, saṅkhārā’’tiādisattasūriyopamasuttantaṃ avoca. Tattha aniccāti hutvā abhāvaṭṭhena aniccā. Saṅkhārāti upādinnakaanupādinnakā saṅkhāradhammā. Addhuvāti evaṃ aciraṭṭhena na dhuvā. Anassāsikāti asassatabhāvena assāsarahitā. Alamevāti yuttameva.
அஜ்ஜோ²கா³ள்ஹோதி உத³கே அனுபவிட்டோ². அச்சுக்³க³தோதி உத³கபிட்டி²தோ உக்³க³தோ. தே³வோ ந வஸ்ஸதீதி பட²மங் தாவ உபகப்பனமேகோ⁴ நாம கோடிஸதஸஹஸ்ஸசக்கவாளே ஏகமேகோ⁴ ஹுத்வா வஸ்ஸதி, ததா³ நிக்க²ந்தபீ³ஜங் ந புன கே³ஹங் பவிஸதி. ததோ பட்டா²ய த⁴மகரணே நிருத்³த⁴ங் விய உத³கங் ஹோதி, புன ஏகபி³ந்து³ம்பி தே³வோ ந வஸ்ஸதீதி உபமானத⁴ம்மகதா²வ பமாணங். வினஸ்ஸந்தே பன லோகே பட²மங் அவீசிதோ பட்டா²ய துச்சோ² ஹோதி, ததோ உட்ட²ஹித்வா ஸத்தா மனுஸ்ஸலோகே ச திரச்சா²னேஸு ச நிப்³ப³த்தந்தி. திரச்சா²னேஸு நிப்³ப³த்தாபி புத்தபா⁴திகேஸு மெத்தங் படிலபி⁴த்வா காலகதா தே³வமனுஸ்ஸேஸு நிப்³ப³த்தந்தி. தே³வதா ஆகாஸேன சரந்தியோ ஆரோசெந்தி – ‘‘ந இத³ங் டா²னங் ஸஸ்ஸதங் ந நிப³த்³த⁴ங், மெத்தங் பா⁴வேத², கருணங், முதி³தங், உபெக்க²ங் பா⁴வேதா²’’தி. தே மெத்தாத³யோ பா⁴வெத்வா ததோ சுதா ப்³ரஹ்மலோகே நிப்³ப³த்தந்தி.
Ajjhogāḷhoti udake anupaviṭṭho. Accuggatoti udakapiṭṭhito uggato. Devo na vassatīti paṭhamaṃ tāva upakappanamegho nāma koṭisatasahassacakkavāḷe ekamegho hutvā vassati, tadā nikkhantabījaṃ na puna gehaṃ pavisati. Tato paṭṭhāya dhamakaraṇe niruddhaṃ viya udakaṃ hoti, puna ekabindumpi devo na vassatīti upamānadhammakathāva pamāṇaṃ. Vinassante pana loke paṭhamaṃ avīcito paṭṭhāya tuccho hoti, tato uṭṭhahitvā sattā manussaloke ca tiracchānesu ca nibbattanti. Tiracchānesu nibbattāpi puttabhātikesu mettaṃ paṭilabhitvā kālakatā devamanussesu nibbattanti. Devatā ākāsena carantiyo ārocenti – ‘‘na idaṃ ṭhānaṃ sassataṃ na nibaddhaṃ, mettaṃ bhāvetha, karuṇaṃ, muditaṃ, upekkhaṃ bhāvethā’’ti. Te mettādayo bhāvetvā tato cutā brahmaloke nibbattanti.
பீ³ஜகா³மாதி எத்த² பீ³ஜகா³மோ நாம பஞ்ச பீ³ஜஜாதானி. பூ⁴தகா³மோ நாம யங்கிஞ்சி நிக்க²ந்தமூலபண்ணங் ஹரிதகங். ஓஸதி⁴திணவனப்பதயோதி எத்த² ஓஸதீ⁴தி ஓஸத⁴ருக்கா². திணாதி ப³ஹிஸாரா தாலனாளிகேராத³யோ. வனப்பதயோதி வனஜெட்ட²கருக்கா². குன்னதி³யோதி ட²பெத்வா பஞ்ச மஹானதி³யோ அவஸேஸா நின்னகா³. குஸொப்³பா⁴தி ட²பெத்வா ஸத்த மஹாஸரே அவஸேஸா ரஹதா³த³யோ. து³தியோ ஸூரியோதிஆதீ³ஸு து³தியஸூரியகாலே ஏகோ உதே³தி, ஏகோ அத்த²ங்க³மேதி. ததியகாலே ஏகோ உதே³தி, ஏகோ அத்த²ங்க³மேதி, ஏகோ மஜ்ஜே² ஹோதி. சதுத்த²காலே சதுகுலிகே கா³மே சத்தாரோ பிண்ட³சாரிகா த்³வாரபடிபாடியா டி²தா விய ஹொந்தி. பஞ்சமாதி³காலேபி ஏஸேவ நயோ. பலுஜ்ஜந்தீதி சி²ஜ்ஜித்வா சி²ஜ்ஜித்வா பதந்தி. நேவ சா²ரிகா பஞ்ஞாயதி ந மஸீதி சக்கவாளமஹாபத²வீ ஸினேருபப்³ப³தராஜா ஹிமவா சக்கவாளபப்³ப³தோ ச² காமஸக்³கா³ பட²மஜ்ஜா²னிகப்³ரஹ்மலோகாதி எத்தகே டா²னே த³ட்³டே⁴ அச்ச²ராய க³ஹேதப்³ப³மத்தாபி சா²ரிகா வா அங்கா³ரோ வா ந பஞ்ஞாயதி. கோ மந்தா கோ ஸத்³தா⁴தாதி கோ தஸ்ஸ ஸத்³தா⁴பனத்தா²ய ஸமத்தோ², கோ வா தஸ்ஸ ஸத்³தா⁴தா. அஞ்ஞத்ர தி³ட்ட²பதே³ஹீதி தி³ட்ட²பதே³ ஸோதாபன்னே அரியஸாவகே ட²பெத்வா கோ அஞ்ஞோ ஸத்³த³ஹிஸ்ஸதீதி அத்தோ².
Bījagāmāti ettha bījagāmo nāma pañca bījajātāni. Bhūtagāmo nāma yaṃkiñci nikkhantamūlapaṇṇaṃ haritakaṃ. Osadhitiṇavanappatayoti ettha osadhīti osadharukkhā. Tiṇāti bahisārā tālanāḷikerādayo. Vanappatayoti vanajeṭṭhakarukkhā. Kunnadiyoti ṭhapetvā pañca mahānadiyo avasesā ninnagā. Kusobbhāti ṭhapetvā satta mahāsare avasesā rahadādayo. Dutiyo sūriyotiādīsu dutiyasūriyakāle eko udeti, eko atthaṅgameti. Tatiyakāle eko udeti, eko atthaṅgameti, eko majjhe hoti. Catutthakāle catukulike gāme cattāro piṇḍacārikā dvārapaṭipāṭiyā ṭhitā viya honti. Pañcamādikālepi eseva nayo. Palujjantīti chijjitvā chijjitvā patanti. Neva chārikā paññāyati na masīti cakkavāḷamahāpathavī sinerupabbatarājā himavā cakkavāḷapabbato cha kāmasaggā paṭhamajjhānikabrahmalokāti ettake ṭhāne daḍḍhe accharāya gahetabbamattāpi chārikā vā aṅgāro vā na paññāyati. Ko mantā ko saddhātāti ko tassa saddhāpanatthāya samattho, ko vā tassa saddhātā. Aññatra diṭṭhapadehīti diṭṭhapade sotāpanne ariyasāvake ṭhapetvā ko añño saddahissatīti attho.
வீதராகோ³தி விக்க²ம்ப⁴னவஸேன வீதராகோ³. ஸாஸனங் ஆஜானிங்ஸூதி அனுஸிட்டி²ங் ஜானிங்ஸு, ப்³ரஹ்மலோகஸஹப்³யதாய மக்³க³ங் படிபஜ்ஜிங்ஸு. ஸமஸமக³தியோதி து³தியத்தபா⁴வே ஸப்³பா³காரேன ஸமக³திகோ ஏகக³திகோ. உத்தரி மெத்தங் பா⁴வெய்யந்தி பட²மஜ்ஜா²னதோ உத்தரி யாவ திகசதுக்கஜ்ஜா²னா பணீதங் கத்வா மெத்தங் பா⁴வெய்யங். சக்கு²மாதி பஞ்சஹி சக்கூ²ஹி சக்கு²மா. பரினிப்³பு³தோதி போ³தி⁴பல்லங்கேயேவ கிலேஸபரினிப்³பா³னேன பரினிப்³பு³தோ. ஏவங் அனிச்சலக்க²ணங் தீ³பெத்வா ஸத்த²ரி தே³ஸனங் வினிவட்டெந்தே பஞ்சஸதாபி தே அனிச்சகம்மட்டா²னிகா பி⁴க்கூ² தே³ஸனானுஸாரேன ஞாணங் பேஸெத்வா நிஸின்னாஸனேஸுயேவ அரஹத்தங் பாபுணிங்ஸூதி.
Vītarāgoti vikkhambhanavasena vītarāgo. Sāsanaṃ ājāniṃsūti anusiṭṭhiṃ jāniṃsu, brahmalokasahabyatāya maggaṃ paṭipajjiṃsu. Samasamagatiyoti dutiyattabhāve sabbākārena samagatiko ekagatiko. Uttari mettaṃ bhāveyyanti paṭhamajjhānato uttari yāva tikacatukkajjhānā paṇītaṃ katvā mettaṃ bhāveyyaṃ. Cakkhumāti pañcahi cakkhūhi cakkhumā. Parinibbutoti bodhipallaṅkeyeva kilesaparinibbānena parinibbuto. Evaṃ aniccalakkhaṇaṃ dīpetvā satthari desanaṃ vinivaṭṭente pañcasatāpi te aniccakammaṭṭhānikā bhikkhū desanānusārena ñāṇaṃ pesetvā nisinnāsanesuyeva arahattaṃ pāpuṇiṃsūti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஸத்தஸூரியஸுத்தங் • 2. Sattasūriyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-2. ஹிரிஒத்தப்பஸுத்தாதி³வண்ணனா • 1-2. Hiriottappasuttādivaṇṇanā
