| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ஸத்தஸுத்தங்
2. Sattasuttaṃ
161. ஸாவத்தி²னிதா³னங். ஏகமந்தங் நிஸின்னோ கோ² ஆயஸ்மா ராதோ⁴ ப⁴க³வந்தங் ஏதத³வோச – ‘‘‘ஸத்தோ, ஸத்தோ’தி, ப⁴ந்தே, வுச்சதி. கித்தாவதா நு கோ², ப⁴ந்தே , ஸத்தோதி வுச்சதீ’’தி? ‘‘ரூபே கோ², ராத⁴, யோ ச²ந்தோ³ யோ ராகோ³ யா நந்தீ³ யா தண்ஹா, தத்ர ஸத்தோ, தத்ர விஸத்தோ, தஸ்மா ஸத்தோதி வுச்சதி. வேத³னாய… ஸஞ்ஞாய… ஸங்கா²ரேஸு… விஞ்ஞாணே யோ ச²ந்தோ³ யோ ராகோ³ யா நந்தீ³ யா தண்ஹா, தத்ர ஸத்தோ, தத்ர விஸத்தோ, தஸ்மா ஸத்தோதி வுச்சதி’’.
161. Sāvatthinidānaṃ. Ekamantaṃ nisinno kho āyasmā rādho bhagavantaṃ etadavoca – ‘‘‘satto, satto’ti, bhante, vuccati. Kittāvatā nu kho, bhante , sattoti vuccatī’’ti? ‘‘Rūpe kho, rādha, yo chando yo rāgo yā nandī yā taṇhā, tatra satto, tatra visatto, tasmā sattoti vuccati. Vedanāya… saññāya… saṅkhāresu… viññāṇe yo chando yo rāgo yā nandī yā taṇhā, tatra satto, tatra visatto, tasmā sattoti vuccati’’.
‘‘ஸெய்யதா²பி, ராத⁴, குமாரகா வா குமாரிகாயோ வா பங்ஸ்வாகா³ரகேஹி கீளந்தி. யாவகீவஞ்ச தேஸு பங்ஸ்வாகா³ரகேஸு அவிக³தராகா³ ஹொந்தி அவிக³தச்ச²ந்தா³ அவிக³தபேமா அவிக³தபிபாஸா அவிக³தபரிளாஹா அவிக³ததண்ஹா, தாவ தானி பங்ஸ்வாகா³ரகானி அல்லீயந்தி கேளாயந்தி த⁴னாயந்தி 1 மமாயந்தி. யதோ ச கோ², ராத⁴, குமாரகா வா குமாரிகாயோ வா தேஸு பங்ஸ்வாகா³ரகேஸு விக³தராகா³ ஹொந்தி விக³தச்ச²ந்தா³ விக³தபேமா விக³தபிபாஸா விக³தபரிளாஹா விக³ததண்ஹா, அத² கோ² தானி பங்ஸ்வாகா³ரகானி ஹத்தே²ஹி ச பாதே³ஹி ச விகிரந்தி வித⁴மந்தி வித்³த⁴ங்ஸெந்தி விகீளனியங் 2 கரொந்தி. ஏவமேவ கோ², ராத⁴, தும்ஹேபி ரூபங் விகிரத² வித⁴மத² வித்³த⁴ங்ஸேத² விகீளனியங் கரோத² தண்ஹாக்க²யாய படிபஜ்ஜத². வேத³னங் விகிரத² வித⁴மத² வித்³த⁴ங்ஸேத² விகீளனியங் கரோத² தண்ஹாக்க²யாய படிபஜ்ஜத². ஸஞ்ஞங்… ஸங்கா²ரே விகிரத² வித⁴மத² வித்³த⁴ங்ஸேத² விகீளனியங் கரோத² தண்ஹாக்க²யாய படிபஜ்ஜத². விஞ்ஞாணங் விகிரத² வித⁴மத² வித்³த⁴ங்ஸேத² விகீளனியங் கரோத² தண்ஹாக்க²யாய படிபஜ்ஜத². தண்ஹாக்க²யோ ஹி, ராத⁴, நிப்³பா³ன’’ந்தி. து³தியங்.
‘‘Seyyathāpi, rādha, kumārakā vā kumārikāyo vā paṃsvāgārakehi kīḷanti. Yāvakīvañca tesu paṃsvāgārakesu avigatarāgā honti avigatacchandā avigatapemā avigatapipāsā avigatapariḷāhā avigatataṇhā, tāva tāni paṃsvāgārakāni allīyanti keḷāyanti dhanāyanti 3 mamāyanti. Yato ca kho, rādha, kumārakā vā kumārikāyo vā tesu paṃsvāgārakesu vigatarāgā honti vigatacchandā vigatapemā vigatapipāsā vigatapariḷāhā vigatataṇhā, atha kho tāni paṃsvāgārakāni hatthehi ca pādehi ca vikiranti vidhamanti viddhaṃsenti vikīḷaniyaṃ 4 karonti. Evameva kho, rādha, tumhepi rūpaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Vedanaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Saññaṃ… saṅkhāre vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Viññāṇaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Taṇhākkhayo hi, rādha, nibbāna’’nti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-10. ஸத்தஸுத்தாதி³வண்ணனா • 2-10. Sattasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-10. ஸத்தஸுத்தாதி³வண்ணனா • 2-10. Sattasuttādivaṇṇanā
