| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. সত্তসুত্তং
2. Sattasuttaṃ
১৬১. সাৰত্থিনিদানং। একমন্তং নিসিন্নো খো আযস্মা রাধো ভগৰন্তং এতদৰোচ – ‘‘‘সত্তো, সত্তো’তি, ভন্তে, ৰুচ্চতি। কিত্তাৰতা নু খো, ভন্তে , সত্তোতি ৰুচ্চতী’’তি? ‘‘রূপে খো, রাধ, যো ছন্দো যো রাগো যা নন্দী যা তণ্হা, তত্র সত্তো, তত্র ৰিসত্তো, তস্মা সত্তোতি ৰুচ্চতি। ৰেদনায… সঞ্ঞায… সঙ্খারেসু… ৰিঞ্ঞাণে যো ছন্দো যো রাগো যা নন্দী যা তণ্হা, তত্র সত্তো, তত্র ৰিসত্তো, তস্মা সত্তোতি ৰুচ্চতি’’।
161. Sāvatthinidānaṃ. Ekamantaṃ nisinno kho āyasmā rādho bhagavantaṃ etadavoca – ‘‘‘satto, satto’ti, bhante, vuccati. Kittāvatā nu kho, bhante , sattoti vuccatī’’ti? ‘‘Rūpe kho, rādha, yo chando yo rāgo yā nandī yā taṇhā, tatra satto, tatra visatto, tasmā sattoti vuccati. Vedanāya… saññāya… saṅkhāresu… viññāṇe yo chando yo rāgo yā nandī yā taṇhā, tatra satto, tatra visatto, tasmā sattoti vuccati’’.
‘‘সেয্যথাপি, রাধ, কুমারকা ৰা কুমারিকাযো ৰা পংস্ৰাগারকেহি কীল়ন্তি। যাৰকীৰঞ্চ তেসু পংস্ৰাগারকেসু অৰিগতরাগা হোন্তি অৰিগতচ্ছন্দা অৰিগতপেমা অৰিগতপিপাসা অৰিগতপরিল়াহা অৰিগততণ্হা, তাৰ তানি পংস্ৰাগারকানি অল্লীযন্তি কেল়াযন্তি ধনাযন্তি 1 মমাযন্তি। যতো চ খো, রাধ, কুমারকা ৰা কুমারিকাযো ৰা তেসু পংস্ৰাগারকেসু ৰিগতরাগা হোন্তি ৰিগতচ্ছন্দা ৰিগতপেমা ৰিগতপিপাসা ৰিগতপরিল়াহা ৰিগততণ্হা, অথ খো তানি পংস্ৰাগারকানি হত্থেহি চ পাদেহি চ ৰিকিরন্তি ৰিধমন্তি ৰিদ্ধংসেন্তি ৰিকীল়নিযং 2 করোন্তি। এৰমেৰ খো, রাধ, তুম্হেপি রূপং ৰিকিরথ ৰিধমথ ৰিদ্ধংসেথ ৰিকীল়নিযং করোথ তণ্হাক্খযায পটিপজ্জথ। ৰেদনং ৰিকিরথ ৰিধমথ ৰিদ্ধংসেথ ৰিকীল়নিযং করোথ তণ্হাক্খযায পটিপজ্জথ। সঞ্ঞং… সঙ্খারে ৰিকিরথ ৰিধমথ ৰিদ্ধংসেথ ৰিকীল়নিযং করোথ তণ্হাক্খযায পটিপজ্জথ। ৰিঞ্ঞাণং ৰিকিরথ ৰিধমথ ৰিদ্ধংসেথ ৰিকীল়নিযং করোথ তণ্হাক্খযায পটিপজ্জথ। তণ্হাক্খযো হি, রাধ, নিব্বান’’ন্তি। দুতিযং।
‘‘Seyyathāpi, rādha, kumārakā vā kumārikāyo vā paṃsvāgārakehi kīḷanti. Yāvakīvañca tesu paṃsvāgārakesu avigatarāgā honti avigatacchandā avigatapemā avigatapipāsā avigatapariḷāhā avigatataṇhā, tāva tāni paṃsvāgārakāni allīyanti keḷāyanti dhanāyanti 3 mamāyanti. Yato ca kho, rādha, kumārakā vā kumārikāyo vā tesu paṃsvāgārakesu vigatarāgā honti vigatacchandā vigatapemā vigatapipāsā vigatapariḷāhā vigatataṇhā, atha kho tāni paṃsvāgārakāni hatthehi ca pādehi ca vikiranti vidhamanti viddhaṃsenti vikīḷaniyaṃ 4 karonti. Evameva kho, rādha, tumhepi rūpaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Vedanaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Saññaṃ… saṅkhāre vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Viññāṇaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Taṇhākkhayo hi, rādha, nibbāna’’nti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-১০. সত্তসুত্তাদিৰণ্ণনা • 2-10. Sattasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-১০. সত্তসুত্তাদিৰণ্ণনা • 2-10. Sattasuttādivaṇṇanā
