| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. සත්‌තසුත්‌තං
2. Sattasuttaṃ
161. සාවත්‌ථිනිදානං. එකමන්‌තං නිසින්‌නො ඛො ආයස්‌මා රාධො භගවන්‌තං එතදවොච – ‘‘‘සත්‌තො, සත්‌තො’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ , සත්‌තොති වුච්‌චතී’’ති? ‘‘රූපෙ ඛො, රාධ, යො ඡන්‌දො යො රාගො යා නන්‌දී යා තණ්‌හා, තත්‍ර සත්‌තො, තත්‍ර විසත්‌තො, තස්‌මා සත්‌තොති වුච්‌චති. වෙදනාය… සඤ්‌ඤාය… සඞ්‌ඛාරෙසු… විඤ්‌ඤාණෙ යො ඡන්‌දො යො රාගො යා නන්‌දී යා තණ්‌හා, තත්‍ර සත්‌තො, තත්‍ර විසත්‌තො, තස්‌මා සත්‌තොති වුච්‌චති’’.
161. Sāvatthinidānaṃ. Ekamantaṃ nisinno kho āyasmā rādho bhagavantaṃ etadavoca – ‘‘‘satto, satto’ti, bhante, vuccati. Kittāvatā nu kho, bhante , sattoti vuccatī’’ti? ‘‘Rūpe kho, rādha, yo chando yo rāgo yā nandī yā taṇhā, tatra satto, tatra visatto, tasmā sattoti vuccati. Vedanāya… saññāya… saṅkhāresu… viññāṇe yo chando yo rāgo yā nandī yā taṇhā, tatra satto, tatra visatto, tasmā sattoti vuccati’’.
‘‘සෙය්‍යථාපි, රාධ, කුමාරකා වා කුමාරිකායො වා පංස්‌වාගාරකෙහි කීළන්‌ති. යාවකීවඤ්‌ච තෙසු පංස්‌වාගාරකෙසු අවිගතරාගා හොන්‌ති අවිගතච්‌ඡන්‌දා අවිගතපෙමා අවිගතපිපාසා අවිගතපරිළාහා අවිගතතණ්‌හා, තාව තානි පංස්‌වාගාරකානි අල්‌ලීයන්‌ති කෙළායන්‌ති ධනායන්‌ති 1 මමායන්‌ති. යතො ච ඛො, රාධ, කුමාරකා වා කුමාරිකායො වා තෙසු පංස්‌වාගාරකෙසු විගතරාගා හොන්‌ති විගතච්‌ඡන්‌දා විගතපෙමා විගතපිපාසා විගතපරිළාහා විගතතණ්‌හා, අථ ඛො තානි පංස්‌වාගාරකානි හත්‌ථෙහි ච පාදෙහි ච විකිරන්‌ති විධමන්‌ති විද්‌ධංසෙන්‌ති විකීළනියං 2 කරොන්‌ති. එවමෙව ඛො, රාධ, තුම්‌හෙපි රූපං විකිරථ විධමථ විද්‌ධංසෙථ විකීළනියං කරොථ තණ්‌හාක්‌ඛයාය පටිපජ්‌ජථ. වෙදනං විකිරථ විධමථ විද්‌ධංසෙථ විකීළනියං කරොථ තණ්‌හාක්‌ඛයාය පටිපජ්‌ජථ. සඤ්‌ඤං… සඞ්‌ඛාරෙ විකිරථ විධමථ විද්‌ධංසෙථ විකීළනියං කරොථ තණ්‌හාක්‌ඛයාය පටිපජ්‌ජථ. විඤ්‌ඤාණං විකිරථ විධමථ විද්‌ධංසෙථ විකීළනියං කරොථ තණ්‌හාක්‌ඛයාය පටිපජ්‌ජථ. තණ්‌හාක්‌ඛයො හි, රාධ, නිබ්‌බාන’’න්‌ති. දුතියං.
‘‘Seyyathāpi, rādha, kumārakā vā kumārikāyo vā paṃsvāgārakehi kīḷanti. Yāvakīvañca tesu paṃsvāgārakesu avigatarāgā honti avigatacchandā avigatapemā avigatapipāsā avigatapariḷāhā avigatataṇhā, tāva tāni paṃsvāgārakāni allīyanti keḷāyanti dhanāyanti 3 mamāyanti. Yato ca kho, rādha, kumārakā vā kumārikāyo vā tesu paṃsvāgārakesu vigatarāgā honti vigatacchandā vigatapemā vigatapipāsā vigatapariḷāhā vigatataṇhā, atha kho tāni paṃsvāgārakāni hatthehi ca pādehi ca vikiranti vidhamanti viddhaṃsenti vikīḷaniyaṃ 4 karonti. Evameva kho, rādha, tumhepi rūpaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Vedanaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Saññaṃ… saṅkhāre vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Viññāṇaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Taṇhākkhayo hi, rādha, nibbāna’’nti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-10. සත්‌තසුත්‌තාදිවණ්‌ණනා • 2-10. Sattasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-10. සත්‌තසුත්‌තාදිවණ්‌ණනා • 2-10. Sattasuttādivaṇṇanā
