| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. སཏྟསུཏྟཾ
2. Sattasuttaṃ
༡༦༡. སཱཝཏྠིནིདཱནཾ། ཨེཀམནྟཾ ནིསིནྣོ ཁོ ཨཱཡསྨཱ རཱདྷོ བྷགཝནྟཾ ཨེཏདཝོཙ – ‘‘‘སཏྟོ, སཏྟོ’ཏི, བྷནྟེ, ཝུཙྩཏི། ཀིཏྟཱཝཏཱ ནུ ཁོ, བྷནྟེ , སཏྟོཏི ཝུཙྩཏཱི’’ཏི? ‘‘རཱུཔེ ཁོ, རཱདྷ, ཡོ ཚནྡོ ཡོ རཱགོ ཡཱ ནནྡཱི ཡཱ ཏཎྷཱ, ཏཏྲ སཏྟོ, ཏཏྲ ཝིསཏྟོ, ཏསྨཱ སཏྟོཏི ཝུཙྩཏི། ཝེདནཱཡ… སཉྙཱཡ… སངྑཱརེསུ… ཝིཉྙཱཎེ ཡོ ཚནྡོ ཡོ རཱགོ ཡཱ ནནྡཱི ཡཱ ཏཎྷཱ, ཏཏྲ སཏྟོ, ཏཏྲ ཝིསཏྟོ, ཏསྨཱ སཏྟོཏི ཝུཙྩཏི’’།
161. Sāvatthinidānaṃ. Ekamantaṃ nisinno kho āyasmā rādho bhagavantaṃ etadavoca – ‘‘‘satto, satto’ti, bhante, vuccati. Kittāvatā nu kho, bhante , sattoti vuccatī’’ti? ‘‘Rūpe kho, rādha, yo chando yo rāgo yā nandī yā taṇhā, tatra satto, tatra visatto, tasmā sattoti vuccati. Vedanāya… saññāya… saṅkhāresu… viññāṇe yo chando yo rāgo yā nandī yā taṇhā, tatra satto, tatra visatto, tasmā sattoti vuccati’’.
‘‘སེཡྻཐཱཔི, རཱདྷ, ཀུམཱརཀཱ ཝཱ ཀུམཱརིཀཱཡོ ཝཱ པཾསྭཱགཱརཀེཧི ཀཱིལ༹ནྟི། ཡཱཝཀཱིཝཉྩ ཏེསུ པཾསྭཱགཱརཀེསུ ཨཝིགཏརཱགཱ ཧོནྟི ཨཝིགཏཙྪནྡཱ ཨཝིགཏཔེམཱ ཨཝིགཏཔིཔཱསཱ ཨཝིགཏཔརིལཱ༹ཧཱ ཨཝིགཏཏཎྷཱ, ཏཱཝ ཏཱནི པཾསྭཱགཱརཀཱནི ཨལླཱིཡནྟི ཀེལཱ༹ཡནྟི དྷནཱཡནྟི 1 མམཱཡནྟི། ཡཏོ ཙ ཁོ, རཱདྷ, ཀུམཱརཀཱ ཝཱ ཀུམཱརིཀཱཡོ ཝཱ ཏེསུ པཾསྭཱགཱརཀེསུ ཝིགཏརཱགཱ ཧོནྟི ཝིགཏཙྪནྡཱ ཝིགཏཔེམཱ ཝིགཏཔིཔཱསཱ ཝིགཏཔརིལཱ༹ཧཱ ཝིགཏཏཎྷཱ, ཨཐ ཁོ ཏཱནི པཾསྭཱགཱརཀཱནི ཧཏྠེཧི ཙ པཱདེཧི ཙ ཝིཀིརནྟི ཝིདྷམནྟི ཝིདྡྷཾསེནྟི ཝིཀཱིལ༹ནིཡཾ 2 ཀརོནྟི། ཨེཝམེཝ ཁོ, རཱདྷ, ཏུམྷེཔི རཱུཔཾ ཝིཀིརཐ ཝིདྷམཐ ཝིདྡྷཾསེཐ ཝིཀཱིལ༹ནིཡཾ ཀརོཐ ཏཎྷཱཀྑཡཱཡ པཊིཔཛྫཐ། ཝེདནཾ ཝིཀིརཐ ཝིདྷམཐ ཝིདྡྷཾསེཐ ཝིཀཱིལ༹ནིཡཾ ཀརོཐ ཏཎྷཱཀྑཡཱཡ པཊིཔཛྫཐ། སཉྙཾ… སངྑཱརེ ཝིཀིརཐ ཝིདྷམཐ ཝིདྡྷཾསེཐ ཝིཀཱིལ༹ནིཡཾ ཀརོཐ ཏཎྷཱཀྑཡཱཡ པཊིཔཛྫཐ། ཝིཉྙཱཎཾ ཝིཀིརཐ ཝིདྷམཐ ཝིདྡྷཾསེཐ ཝིཀཱིལ༹ནིཡཾ ཀརོཐ ཏཎྷཱཀྑཡཱཡ པཊིཔཛྫཐ། ཏཎྷཱཀྑཡོ ཧི, རཱདྷ, ནིབྦཱན’’ནྟི། དུཏིཡཾ།
‘‘Seyyathāpi, rādha, kumārakā vā kumārikāyo vā paṃsvāgārakehi kīḷanti. Yāvakīvañca tesu paṃsvāgārakesu avigatarāgā honti avigatacchandā avigatapemā avigatapipāsā avigatapariḷāhā avigatataṇhā, tāva tāni paṃsvāgārakāni allīyanti keḷāyanti dhanāyanti 3 mamāyanti. Yato ca kho, rādha, kumārakā vā kumārikāyo vā tesu paṃsvāgārakesu vigatarāgā honti vigatacchandā vigatapemā vigatapipāsā vigatapariḷāhā vigatataṇhā, atha kho tāni paṃsvāgārakāni hatthehi ca pādehi ca vikiranti vidhamanti viddhaṃsenti vikīḷaniyaṃ 4 karonti. Evameva kho, rādha, tumhepi rūpaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Vedanaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Saññaṃ… saṅkhāre vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Viññāṇaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Taṇhākkhayo hi, rādha, nibbāna’’nti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢-༡༠. སཏྟསུཏྟཱདིཝཎྞནཱ • 2-10. Sattasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢-༡༠. སཏྟསུཏྟཱདིཝཎྞནཱ • 2-10. Sattasuttādivaṇṇanā
