| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൨. സത്തസുത്തം
2. Sattasuttaṃ
൧൬൧. സാവത്ഥിനിദാനം. ഏകമന്തം നിസിന്നോ ഖോ ആയസ്മാ രാധോ ഭഗവന്തം ഏതദവോച – ‘‘‘സത്തോ, സത്തോ’തി, ഭന്തേ, വുച്ചതി. കിത്താവതാ നു ഖോ, ഭന്തേ , സത്തോതി വുച്ചതീ’’തി? ‘‘രൂപേ ഖോ, രാധ, യോ ഛന്ദോ യോ രാഗോ യാ നന്ദീ യാ തണ്ഹാ, തത്ര സത്തോ, തത്ര വിസത്തോ, തസ്മാ സത്തോതി വുച്ചതി. വേദനായ… സഞ്ഞായ… സങ്ഖാരേസു… വിഞ്ഞാണേ യോ ഛന്ദോ യോ രാഗോ യാ നന്ദീ യാ തണ്ഹാ, തത്ര സത്തോ, തത്ര വിസത്തോ, തസ്മാ സത്തോതി വുച്ചതി’’.
161. Sāvatthinidānaṃ. Ekamantaṃ nisinno kho āyasmā rādho bhagavantaṃ etadavoca – ‘‘‘satto, satto’ti, bhante, vuccati. Kittāvatā nu kho, bhante , sattoti vuccatī’’ti? ‘‘Rūpe kho, rādha, yo chando yo rāgo yā nandī yā taṇhā, tatra satto, tatra visatto, tasmā sattoti vuccati. Vedanāya… saññāya… saṅkhāresu… viññāṇe yo chando yo rāgo yā nandī yā taṇhā, tatra satto, tatra visatto, tasmā sattoti vuccati’’.
‘‘സേയ്യഥാപി, രാധ, കുമാരകാ വാ കുമാരികായോ വാ പംസ്വാഗാരകേഹി കീളന്തി. യാവകീവഞ്ച തേസു പംസ്വാഗാരകേസു അവിഗതരാഗാ ഹോന്തി അവിഗതച്ഛന്ദാ അവിഗതപേമാ അവിഗതപിപാസാ അവിഗതപരിളാഹാ അവിഗതതണ്ഹാ, താവ താനി പംസ്വാഗാരകാനി അല്ലീയന്തി കേളായന്തി ധനായന്തി 1 മമായന്തി. യതോ ച ഖോ, രാധ, കുമാരകാ വാ കുമാരികായോ വാ തേസു പംസ്വാഗാരകേസു വിഗതരാഗാ ഹോന്തി വിഗതച്ഛന്ദാ വിഗതപേമാ വിഗതപിപാസാ വിഗതപരിളാഹാ വിഗതതണ്ഹാ, അഥ ഖോ താനി പംസ്വാഗാരകാനി ഹത്ഥേഹി ച പാദേഹി ച വികിരന്തി വിധമന്തി വിദ്ധംസേന്തി വികീളനിയം 2 കരോന്തി. ഏവമേവ ഖോ, രാധ, തുമ്ഹേപി രൂപം വികിരഥ വിധമഥ വിദ്ധംസേഥ വികീളനിയം കരോഥ തണ്ഹാക്ഖയായ പടിപജ്ജഥ. വേദനം വികിരഥ വിധമഥ വിദ്ധംസേഥ വികീളനിയം കരോഥ തണ്ഹാക്ഖയായ പടിപജ്ജഥ. സഞ്ഞം… സങ്ഖാരേ വികിരഥ വിധമഥ വിദ്ധംസേഥ വികീളനിയം കരോഥ തണ്ഹാക്ഖയായ പടിപജ്ജഥ. വിഞ്ഞാണം വികിരഥ വിധമഥ വിദ്ധംസേഥ വികീളനിയം കരോഥ തണ്ഹാക്ഖയായ പടിപജ്ജഥ. തണ്ഹാക്ഖയോ ഹി, രാധ, നിബ്ബാന’’ന്തി. ദുതിയം.
‘‘Seyyathāpi, rādha, kumārakā vā kumārikāyo vā paṃsvāgārakehi kīḷanti. Yāvakīvañca tesu paṃsvāgārakesu avigatarāgā honti avigatacchandā avigatapemā avigatapipāsā avigatapariḷāhā avigatataṇhā, tāva tāni paṃsvāgārakāni allīyanti keḷāyanti dhanāyanti 3 mamāyanti. Yato ca kho, rādha, kumārakā vā kumārikāyo vā tesu paṃsvāgārakesu vigatarāgā honti vigatacchandā vigatapemā vigatapipāsā vigatapariḷāhā vigatataṇhā, atha kho tāni paṃsvāgārakāni hatthehi ca pādehi ca vikiranti vidhamanti viddhaṃsenti vikīḷaniyaṃ 4 karonti. Evameva kho, rādha, tumhepi rūpaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Vedanaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Saññaṃ… saṅkhāre vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Viññāṇaṃ vikiratha vidhamatha viddhaṃsetha vikīḷaniyaṃ karotha taṇhākkhayāya paṭipajjatha. Taṇhākkhayo hi, rādha, nibbāna’’nti. Dutiyaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൨-൧൦. സത്തസുത്താദിവണ്ണനാ • 2-10. Sattasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൨-൧൦. സത്തസുത്താദിവണ്ണനാ • 2-10. Sattasuttādivaṇṇanā
