| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. ஸத்தட்டா²னஸுத்தவண்ணனா
5. Sattaṭṭhānasuttavaṇṇanā
57. பஞ்சமே ஸத்தட்டா²னகுஸலோதி ஸத்தஸு ஓகாஸேஸு சே²கோ. வுஸிதவாதி வுஸிதவாஸோ. உத்தமபுரிஸோதி ஸெட்ட²புரிஸோ. ஸேஸமெத்த² வுத்தனயேனேவ வேதி³தப்³ப³ங். இத³ங் பன ஸுத்தங் உஸ்ஸத³னந்தி³யஞ்சேவ பலோப⁴னீயஞ்சாதி வேதி³தப்³ப³ங். யதா² ஹி ராஜா விஜிதஸங்கா³மோ ஸங்கா³மே விஜயினோ யோதே⁴ உச்சட்டா²னே ட²பெத்வா தேஸங் ஸக்காரங் கரோதி. கிங் காரணா? ஏதேஸங் ஸக்காரங் தி³ஸ்வா ஸேஸாபி ஸூரா ப⁴விதுங் மஞ்ஞிஸ்ஸந்தீதி, ஏவமேவ ப⁴க³வா அப்பமெய்யங் காலங் பாரமியோ பூரெத்வா மஹாபோ³தி⁴மண்டே³ கிலேஸமாரவிஜயங் கத்வா ஸப்³ப³ஞ்ஞுதங் பத்தோ ஸாவத்தி²யங் ஜேதவனமஹாவிஹாரே நிஸீதி³த்வா இமங் ஸுத்தங் தே³ஸெந்தோ கீ²ணாஸவே உக்கி²பித்வா தோ²மேஸி வண்ணேஸி. கிங் காரணா? ஏவங் அவஸேஸா ஸெக்க²புக்³க³லா அரஹத்தப²லங் பத்தப்³ப³ங் மஞ்ஞிஸ்ஸந்தீதி. ஏவமேதங் ஸுத்தங் கீ²ணாஸவானங் உக்கி²பித்வா பஸங்ஸிதத்தா உஸ்ஸத³னந்தி³யங், ஸெக்கா²னங் பலோபி⁴தத்தா பலோப⁴னீயந்தி வேதி³தப்³ப³ங்.
57. Pañcame sattaṭṭhānakusaloti sattasu okāsesu cheko. Vusitavāti vusitavāso. Uttamapurisoti seṭṭhapuriso. Sesamettha vuttanayeneva veditabbaṃ. Idaṃ pana suttaṃ ussadanandiyañceva palobhanīyañcāti veditabbaṃ. Yathā hi rājā vijitasaṅgāmo saṅgāme vijayino yodhe uccaṭṭhāne ṭhapetvā tesaṃ sakkāraṃ karoti. Kiṃ kāraṇā? Etesaṃ sakkāraṃ disvā sesāpi sūrā bhavituṃ maññissantīti, evameva bhagavā appameyyaṃ kālaṃ pāramiyo pūretvā mahābodhimaṇḍe kilesamāravijayaṃ katvā sabbaññutaṃ patto sāvatthiyaṃ jetavanamahāvihāre nisīditvā imaṃ suttaṃ desento khīṇāsave ukkhipitvā thomesi vaṇṇesi. Kiṃ kāraṇā? Evaṃ avasesā sekkhapuggalā arahattaphalaṃ pattabbaṃ maññissantīti. Evametaṃ suttaṃ khīṇāsavānaṃ ukkhipitvā pasaṃsitattā ussadanandiyaṃ, sekkhānaṃ palobhitattā palobhanīyanti veditabbaṃ.
ஏவங் கோ², பி⁴க்க²வே, பி⁴க்கு² ஸத்தட்டா²னகுஸலோ ஹோதீதி எத்தாவதா செத்த² மக்³க³ப²லபச்சவெக்க²ணவஸேன தே³ஸனங் நிட்ட²பெத்வாபி புன கத²ஞ்ச, பி⁴க்க²வே, பி⁴க்கு² திவிதூ⁴பபரிக்கீ² ஹோதீதி இத³ங் ‘‘கீ²ணாஸவோ யஸ்மிங் ஆரம்மணே ஸததவிஹாரேன விஹரதி, தங் ஸத்தோ வா புக்³க³லோ வா ந ஹோதி, தா⁴துஆதி³மத்தமேவ பன ஹோதீ’’தி ஏவங் கீ²ணாஸவஸ்ஸ ஸததவிஹாரஞ்ச, ‘‘இமேஸு த⁴ம்மேஸு கம்மங் கத்வா அயங் ஆக³தோ’’தி ஆக³மனீயபடிபத³ஞ்ச த³ஸ்ஸேதுங் வுத்தங். தத்த² தா⁴துஸோ உபபரிக்க²தீதி தா⁴துஸபா⁴வேன பஸ்ஸதி ஓலோகேதி. ஸேஸபத³த்³வயேபி ஏஸேவ நயோ. பஞ்சமங்.
Evaṃkho, bhikkhave, bhikkhu sattaṭṭhānakusalo hotīti ettāvatā cettha maggaphalapaccavekkhaṇavasena desanaṃ niṭṭhapetvāpi puna kathañca, bhikkhave, bhikkhu tividhūpaparikkhī hotīti idaṃ ‘‘khīṇāsavo yasmiṃ ārammaṇe satatavihārena viharati, taṃ satto vā puggalo vā na hoti, dhātuādimattameva pana hotī’’ti evaṃ khīṇāsavassa satatavihārañca, ‘‘imesu dhammesu kammaṃ katvā ayaṃ āgato’’ti āgamanīyapaṭipadañca dassetuṃ vuttaṃ. Tattha dhātuso upaparikkhatīti dhātusabhāvena passati oloketi. Sesapadadvayepi eseva nayo. Pañcamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 5. ஸத்தட்டா²னஸுத்தங் • 5. Sattaṭṭhānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. ஸத்தட்டா²னஸுத்தவண்ணனா • 5. Sattaṭṭhānasuttavaṇṇanā
