| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៥. សត្តដ្ឋានសុត្តវណ្ណនា
5. Sattaṭṭhānasuttavaṇṇanā
៥៧. សត្តសុ ឱកាសេសូតិ រូបបជាននាទីសុ សត្តសុ ឱកាសេសុ។ វុសិតវាសោតិ វុសិតអរិយវាសោ។ ឯត្ថាតិ ឥមស្មិំ ឧទ្ទេសេ។ សេសំ នាម ឥធ វុត្តាវសេសំ។ វុត្តនយេនាតិ ហេដ្ឋា វុត្តនយេន វេទិតព្ពំ។ ឧស្សទនន្ទិយន្តិ ឧស្សន្នគុណវតោ តោសនំ សម្មោទាបនំ។ គុណកិត្តនេន បលោភនីយំ សេក្ខកល្យាណបុថុជ្ជនានំ បសាទុប្បាទនេន។ ឥទានិ វុត្តមេវ អត្ថំ បាកដំ កាតុំ ‘‘យថា ហី’’តិអាទិ វុត្តំ។
57.Sattasuokāsesūti rūpapajānanādīsu sattasu okāsesu. Vusitavāsoti vusitaariyavāso. Etthāti imasmiṃ uddese. Sesaṃ nāma idha vuttāvasesaṃ. Vuttanayenāti heṭṭhā vuttanayena veditabbaṃ. Ussadanandiyanti ussannaguṇavato tosanaṃ sammodāpanaṃ. Guṇakittanena palobhanīyaṃ sekkhakalyāṇaputhujjanānaṃ pasāduppādanena. Idāni vuttameva atthaṃ pākaṭaṃ kātuṃ ‘‘yathā hī’’tiādi vuttaṃ.
ឯត្តាវតាតិ បញ្ចន្នំ ខន្ធានំ វសេន សត្តសុ ឋានេសុ កោសល្លទីបនេន ឯត្តកេន ទេសនាក្កមេន។ តន្តិ អារម្មណំ។ ធាតុអាទិមត្តមេវាតិ ធាតាយតនបដិច្ចសមុប្បាទមត្តមេវ។ ឥមេសុ ធម្មេសូតិ ឥមេសុ ជាតាទីសុ។ កម្មំ កត្វាតិ សម្មសនកម្មំ និដ្ឋបេត្វាតិ អត្ថោ។ ឯវមេត្ថ បញ្ចន្នំ ខន្ធានំ វសេន សត្តដ្ឋានកោសល្លបវត្តិយា បភេទេន វិភជិត្វា ‘‘តិវិធូបបរិក្ខី’’តិ ទស្សេតិ ធម្មរាជា។
Ettāvatāti pañcannaṃ khandhānaṃ vasena sattasu ṭhānesu kosalladīpanena ettakena desanākkamena. Tanti ārammaṇaṃ. Dhātuādimattamevāti dhātāyatanapaṭiccasamuppādamattameva. Imesu dhammesūti imesu jātādīsu. Kammaṃ katvāti sammasanakammaṃ niṭṭhapetvāti attho. Evamettha pañcannaṃ khandhānaṃ vasena sattaṭṭhānakosallapavattiyā pabhedena vibhajitvā ‘‘tividhūpaparikkhī’’ti dasseti dhammarājā.
សត្តដ្ឋានសុត្តវណ្ណនា និដ្ឋិតា។
Sattaṭṭhānasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៥. សត្តដ្ឋានសុត្តំ • 5. Sattaṭṭhānasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៥. សត្តដ្ឋានសុត្តវណ្ណនា • 5. Sattaṭṭhānasuttavaṇṇanā
