| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൫. സത്തട്ഠാനസുത്തവണ്ണനാ
5. Sattaṭṭhānasuttavaṇṇanā
൫൭. സത്തസു ഓകാസേസൂതി രൂപപജാനനാദീസു സത്തസു ഓകാസേസു. വുസിതവാസോതി വുസിതഅരിയവാസോ. ഏത്ഥാതി ഇമസ്മിം ഉദ്ദേസേ. സേസം നാമ ഇധ വുത്താവസേസം. വുത്തനയേനാതി ഹേട്ഠാ വുത്തനയേന വേദിതബ്ബം. ഉസ്സദനന്ദിയന്തി ഉസ്സന്നഗുണവതോ തോസനം സമ്മോദാപനം. ഗുണകിത്തനേന പലോഭനീയം സേക്ഖകല്യാണപുഥുജ്ജനാനം പസാദുപ്പാദനേന. ഇദാനി വുത്തമേവ അത്ഥം പാകടം കാതും ‘‘യഥാ ഹീ’’തിആദി വുത്തം.
57.Sattasuokāsesūti rūpapajānanādīsu sattasu okāsesu. Vusitavāsoti vusitaariyavāso. Etthāti imasmiṃ uddese. Sesaṃ nāma idha vuttāvasesaṃ. Vuttanayenāti heṭṭhā vuttanayena veditabbaṃ. Ussadanandiyanti ussannaguṇavato tosanaṃ sammodāpanaṃ. Guṇakittanena palobhanīyaṃ sekkhakalyāṇaputhujjanānaṃ pasāduppādanena. Idāni vuttameva atthaṃ pākaṭaṃ kātuṃ ‘‘yathā hī’’tiādi vuttaṃ.
ഏത്താവതാതി പഞ്ചന്നം ഖന്ധാനം വസേന സത്തസു ഠാനേസു കോസല്ലദീപനേന ഏത്തകേന ദേസനാക്കമേന. തന്തി ആരമ്മണം. ധാതുആദിമത്തമേവാതി ധാതായതനപടിച്ചസമുപ്പാദമത്തമേവ. ഇമേസു ധമ്മേസൂതി ഇമേസു ജാതാദീസു. കമ്മം കത്വാതി സമ്മസനകമ്മം നിട്ഠപേത്വാതി അത്ഥോ. ഏവമേത്ഥ പഞ്ചന്നം ഖന്ധാനം വസേന സത്തട്ഠാനകോസല്ലപവത്തിയാ പഭേദേന വിഭജിത്വാ ‘‘തിവിധൂപപരിക്ഖീ’’തി ദസ്സേതി ധമ്മരാജാ.
Ettāvatāti pañcannaṃ khandhānaṃ vasena sattasu ṭhānesu kosalladīpanena ettakena desanākkamena. Tanti ārammaṇaṃ. Dhātuādimattamevāti dhātāyatanapaṭiccasamuppādamattameva. Imesu dhammesūti imesu jātādīsu. Kammaṃ katvāti sammasanakammaṃ niṭṭhapetvāti attho. Evamettha pañcannaṃ khandhānaṃ vasena sattaṭṭhānakosallapavattiyā pabhedena vibhajitvā ‘‘tividhūpaparikkhī’’ti dasseti dhammarājā.
സത്തട്ഠാനസുത്തവണ്ണനാ നിട്ഠിതാ.
Sattaṭṭhānasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൫. സത്തട്ഠാനസുത്തം • 5. Sattaṭṭhānasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൫. സത്തട്ഠാനസുത്തവണ്ണനാ • 5. Sattaṭṭhānasuttavaṇṇanā
