| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. སཏྟཱཝཱསསུཏྟཾ
4. Sattāvāsasuttaṃ
༢༤. 1 ‘‘ནཝཡིམེ, བྷིཀྑཝེ, སཏྟཱཝཱསཱ། ཀཏམེ ནཝ? སནྟི, བྷིཀྑཝེ, སཏྟཱ ནཱནཏྟཀཱཡཱ ནཱནཏྟསཉྙིནོ, སེཡྻཐཱཔི མནུསྶཱ, ཨེཀཙྩེ ཙ དེཝཱ, ཨེཀཙྩེ ཙ ཝིནིཔཱཏིཀཱ། ཨཡཾ པཋམོ སཏྟཱཝཱསོ།
24.2 ‘‘Navayime, bhikkhave, sattāvāsā. Katame nava? Santi, bhikkhave, sattā nānattakāyā nānattasaññino, seyyathāpi manussā, ekacce ca devā, ekacce ca vinipātikā. Ayaṃ paṭhamo sattāvāso.
‘‘སནྟི , བྷིཀྑཝེ, སཏྟཱ ནཱནཏྟཀཱཡཱ ཨེཀཏྟསཉྙིནོ, སེཡྻཐཱཔི དེཝཱ བྲཧྨཀཱཡིཀཱ པཋམཱབྷིནིབྦཏྟཱ། ཨཡཾ དུཏིཡོ སཏྟཱཝཱསོ།
‘‘Santi , bhikkhave, sattā nānattakāyā ekattasaññino, seyyathāpi devā brahmakāyikā paṭhamābhinibbattā. Ayaṃ dutiyo sattāvāso.
‘‘སནྟི , བྷིཀྑཝེ, སཏྟཱ ཨེཀཏྟཀཱཡཱ ནཱནཏྟསཉྙིནོ, སེཡྻཐཱཔི དེཝཱ ཨཱབྷསྶརཱ། ཨཡཾ ཏཏིཡོ སཏྟཱཝཱསོ།
‘‘Santi , bhikkhave, sattā ekattakāyā nānattasaññino, seyyathāpi devā ābhassarā. Ayaṃ tatiyo sattāvāso.
‘‘སནྟི, བྷིཀྑཝེ, སཏྟཱ ཨེཀཏྟཀཱཡཱ ཨེཀཏྟསཉྙིནོ, སེཡྻཐཱཔི དེཝཱ སུབྷཀིཎྷཱ། ཨཡཾ ཙཏུཏྠོ སཏྟཱཝཱསོ།
‘‘Santi, bhikkhave, sattā ekattakāyā ekattasaññino, seyyathāpi devā subhakiṇhā. Ayaṃ catuttho sattāvāso.
‘‘སནྟི, བྷིཀྑཝེ, སཏྟཱ ཨསཉྙིནོ ཨཔྤཊིསཾཝེདིནོ, སེཡྻཐཱཔི དེཝཱ ཨསཉྙསཏྟཱ། ཨཡཾ པཉྩམོ སཏྟཱཝཱསོ།
‘‘Santi, bhikkhave, sattā asaññino appaṭisaṃvedino, seyyathāpi devā asaññasattā. Ayaṃ pañcamo sattāvāso.
‘‘སནྟི , བྷིཀྑཝེ, སཏྟཱ སབྦསོ རཱུཔསཉྙཱནཾ སམཏིཀྐམཱ པཊིགྷསཉྙཱནཾ ཨཏྠངྒམཱ ནཱནཏྟསཉྙཱནཾ ཨམནསིཀཱརཱ ‘ཨནནྟོ ཨཱཀཱསོ’ཏི ཨཱཀཱསཱནཉྩཱཡཏནཱུཔགཱ། ཨཡཾ ཚཊྛོ སཏྟཱཝཱསོ།
‘‘Santi , bhikkhave, sattā sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ananto ākāso’ti ākāsānañcāyatanūpagā. Ayaṃ chaṭṭho sattāvāso.
‘‘སནྟི, བྷིཀྑཝེ, སཏྟཱ སབྦསོ ཨཱཀཱསཱནཉྩཱཡཏནཾ སམཏིཀྐམྨ ‘ཨནནྟཾ ཝིཉྙཱཎ’ནྟི ཝིཉྙཱཎཉྩཱཡཏནཱུཔགཱ། ཨཡཾ སཏྟམོ སཏྟཱཝཱསོ།
‘‘Santi, bhikkhave, sattā sabbaso ākāsānañcāyatanaṃ samatikkamma ‘anantaṃ viññāṇa’nti viññāṇañcāyatanūpagā. Ayaṃ sattamo sattāvāso.
‘‘སནྟི, བྷིཀྑཝེ, སཏྟཱ སབྦསོ ཝིཉྙཱཎཉྩཱཡཏནཾ སམཏིཀྐམྨ ‘ནཏྠི ཀིཉྩཱི’ཏི ཨཱཀིཉྩཉྙཱཡཏནཱུཔགཱ། ཨཡཾ ཨཊྛམོ སཏྟཱཝཱསོ།
‘‘Santi, bhikkhave, sattā sabbaso viññāṇañcāyatanaṃ samatikkamma ‘natthi kiñcī’ti ākiñcaññāyatanūpagā. Ayaṃ aṭṭhamo sattāvāso.
‘‘སནྟི, བྷིཀྑཝེ, སཏྟཱ སབྦསོ ཨཱཀིཉྩཉྙཱཡཏནཾ སམཏིཀྐམྨ ནེཝསཉྙཱནཱསཉྙཱཡཏནཱུཔགཱ། ཨཡཾ ནཝམོ སཏྟཱཝཱསོ། ཨིམེ ཁོ, བྷིཀྑཝེ, ནཝ སཏྟཱཝཱསཱ’’ཏི། ཙཏུཏྠཾ།
‘‘Santi, bhikkhave, sattā sabbaso ākiñcaññāyatanaṃ samatikkamma nevasaññānāsaññāyatanūpagā. Ayaṃ navamo sattāvāso. Ime kho, bhikkhave, nava sattāvāsā’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. སཏྟཱཝཱསསུཏྟཝཎྞནཱ • 4. Sattāvāsasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤-༥. སཏྟཱཝཱསསུཏྟཱདིཝཎྞནཱ • 4-5. Sattāvāsasuttādivaṇṇanā
