| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. সত্তৰস্সানুবন্ধসুত্তং
4. Sattavassānubandhasuttaṃ
১৬০. এৰং মে সুতং – একং সমযং ভগৰা উরুৰেলাযং ৰিহরতি নজ্জা নেরঞ্জরায তীরে অজপালনিগ্রোধে। তেন খো পন সমযেন মারো পাপিমা সত্তৰস্সানি ভগৰন্তং অনুবন্ধো হোতি ওতারাপেক্খো ওতারং অলভমানো। অথ খো মারো পাপিমা যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –
160. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhe. Tena kho pana samayena māro pāpimā sattavassāni bhagavantaṃ anubandho hoti otārāpekkho otāraṃ alabhamāno. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘সোকাৰতিণ্ণো নু ৰনম্হি ঝাযসি,
‘‘Sokāvatiṇṇo nu vanamhi jhāyasi,
ৰিত্তং নু জীনো উদ পত্থযানো।
Vittaṃ nu jīno uda patthayāno;
আগুং নু গামস্মিমকাসি কিঞ্চি,
Āguṃ nu gāmasmimakāsi kiñci,
কস্মা জনেন ন করোসি সক্খিং।
Kasmā janena na karosi sakkhiṃ;
সক্খী ন সম্পজ্জতি কেনচি তে’’তি॥
Sakkhī na sampajjati kenaci te’’ti.
‘‘সোকস্স মূলং পলিখায সব্বং,
‘‘Sokassa mūlaṃ palikhāya sabbaṃ,
অনাগু ঝাযামি অসোচমানো।
Anāgu jhāyāmi asocamāno;
ছেত্ৰান সব্বং ভৰলোভজপ্পং,
Chetvāna sabbaṃ bhavalobhajappaṃ,
অনাসৰো ঝাযামি পমত্তবন্ধূ’’তি॥
Anāsavo jhāyāmi pamattabandhū’’ti.
‘‘যং ৰদন্তি মম যিদন্তি, যে ৰদন্তি মমন্তি চ।
‘‘Yaṃ vadanti mama yidanti, ye vadanti mamanti ca;
এত্থ চে তে মনো অত্থি, ন মে সমণ মোক্খসী’’তি॥
Ettha ce te mano atthi, na me samaṇa mokkhasī’’ti.
‘‘যং ৰদন্তি ন তং ময্হং, যে ৰদন্তি ন তে অহং।
‘‘Yaṃ vadanti na taṃ mayhaṃ, ye vadanti na te ahaṃ;
এৰং পাপিম জানাহি, ন মে মগ্গম্পি দক্খসী’’তি॥
Evaṃ pāpima jānāhi, na me maggampi dakkhasī’’ti.
‘‘সচে মগ্গং অনুবুদ্ধং, খেমং অমতগামিনং।
‘‘Sace maggaṃ anubuddhaṃ, khemaṃ amatagāminaṃ;
অপেহি গচ্ছ ত্ৰমেৰেকো, কিমঞ্ঞমনুসাসসী’’তি॥
Apehi gaccha tvameveko, kimaññamanusāsasī’’ti.
‘‘অমচ্চুধেয্যং পুচ্ছন্তি, যে জনা পারগামিনো।
‘‘Amaccudheyyaṃ pucchanti, ye janā pāragāmino;
তেসাহং পুট্ঠো অক্খামি, যং সচ্চং তং নিরূপধি’’ন্তি॥
Tesāhaṃ puṭṭho akkhāmi, yaṃ saccaṃ taṃ nirūpadhi’’nti.
‘‘সেয্যথাপি, ভন্তে, গামস্স ৰা নিগমস্স ৰা অৰিদূরে পোক্খরণী। তত্রস্স কক্কটকো। অথ খো, ভন্তে, সম্বহুলা কুমারকা ৰা কুমারিকাযো ৰা তম্হা গামা ৰা নিগমা ৰা নিক্খমিত্ৰা যেন সা পোক্খরণী তেনুপসঙ্কমেয্যুং; উপসঙ্কমিত্ৰা তং কক্কটকং উদকা উদ্ধরিত্ৰা থলে পতিট্ঠপেয্যুং। যং যদেৰ হি সো, ভন্তে, কক্কটকো অল়ং অভিনিন্নামেয্য তং তদেৰ তে কুমারকা ৰা কুমারিকাযো ৰা কট্ঠেন ৰা কথলায ৰা সঞ্ছিন্দেয্যুং সম্ভঞ্জেয্যুং সম্পলিভঞ্জেয্যুং। এৰঞ্হি সো, ভন্তে, কক্কটকো সব্বেহি অল়েহি সঞ্ছিন্নেহি সম্ভগ্গেহি সম্পলিভগ্গেহি অভব্বো তং পোক্খরণিং ওতরিতুং। এৰমেৰ খো, ভন্তে, যানি কানিচি ৰিসূকাযিকানি 1 ৰিসেৰিতানি ৰিপ্ফন্দিতানি, সব্বানি তানি 2 ভগৰতা সঞ্ছিন্নানি সম্ভগ্গানি সম্পলিভগ্গানি। অভব্বো দানাহং, ভন্তে, পুন ভগৰন্তং উপসঙ্কমিতুং যদিদং ওতারাপেক্খো’’তি। অথ খো মারো পাপিমা ভগৰতো সন্তিকে ইমা নিব্বেজনীযা গাথাযো অভাসি –
‘‘Seyyathāpi, bhante, gāmassa vā nigamassa vā avidūre pokkharaṇī. Tatrassa kakkaṭako. Atha kho, bhante, sambahulā kumārakā vā kumārikāyo vā tamhā gāmā vā nigamā vā nikkhamitvā yena sā pokkharaṇī tenupasaṅkameyyuṃ; upasaṅkamitvā taṃ kakkaṭakaṃ udakā uddharitvā thale patiṭṭhapeyyuṃ. Yaṃ yadeva hi so, bhante, kakkaṭako aḷaṃ abhininnāmeyya taṃ tadeva te kumārakā vā kumārikāyo vā kaṭṭhena vā kathalāya vā sañchindeyyuṃ sambhañjeyyuṃ sampalibhañjeyyuṃ. Evañhi so, bhante, kakkaṭako sabbehi aḷehi sañchinnehi sambhaggehi sampalibhaggehi abhabbo taṃ pokkharaṇiṃ otarituṃ. Evameva kho, bhante, yāni kānici visūkāyikāni 3 visevitāni vipphanditāni, sabbāni tāni 4 bhagavatā sañchinnāni sambhaggāni sampalibhaggāni. Abhabbo dānāhaṃ, bhante, puna bhagavantaṃ upasaṅkamituṃ yadidaṃ otārāpekkho’’ti. Atha kho māro pāpimā bhagavato santike imā nibbejanīyā gāthāyo abhāsi –
‘‘মেদৰণ্ণঞ্চ পাসাণং, ৰাযসো অনুপরিযগা।
‘‘Medavaṇṇañca pāsāṇaṃ, vāyaso anupariyagā;
অপেত্থ মুদুং ৰিন্দেম, অপি অস্সাদনা সিযা॥
Apettha muduṃ vindema, api assādanā siyā.
‘‘অলদ্ধা তত্থ অস্সাদং, ৰাযসেত্তো অপক্কমে।
‘‘Aladdhā tattha assādaṃ, vāyasetto apakkame;
কাকোৰ সেলমাসজ্জ, নিব্বিজ্জাপেম গোতমা’’তি॥
Kākova selamāsajja, nibbijjāpema gotamā’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. সত্তৰস্সানুবন্ধসুত্তৰণ্ণনা • 4. Sattavassānubandhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. সত্তৰস্সানুবন্ধসুত্তৰণ্ণনা • 4. Sattavassānubandhasuttavaṇṇanā
