| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. සත්‌තවස්‌සානුබන්‌ධසුත්‌තං
4. Sattavassānubandhasuttaṃ
160. එවං මෙ සුතං – එකං සමයං භගවා උරුවෙලායං විහරති නජ්‌ජා නෙරඤ්‌ජරාය තීරෙ අජපාලනිග්‍රොධෙ. තෙන ඛො පන සමයෙන මාරො පාපිමා සත්‌තවස්‌සානි භගවන්‌තං අනුබන්‌ධො හොති ඔතාරාපෙක්‌ඛො ඔතාරං අලභමානො. අථ ඛො මාරො පාපිමා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං ගාථාය අජ්‌ඣභාසි –
160. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhe. Tena kho pana samayena māro pāpimā sattavassāni bhagavantaṃ anubandho hoti otārāpekkho otāraṃ alabhamāno. Atha kho māro pāpimā yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘සොකාවතිණ්‌ණො නු වනම්‌හි ඣායසි,
‘‘Sokāvatiṇṇo nu vanamhi jhāyasi,
විත්‌තං නු ජීනො උද පත්‌ථයානො;
Vittaṃ nu jīno uda patthayāno;
ආගුං නු ගාමස්‌මිමකාසි කිඤ්‌චි,
Āguṃ nu gāmasmimakāsi kiñci,
කස්‌මා ජනෙන න කරොසි සක්‌ඛිං;
Kasmā janena na karosi sakkhiṃ;
සක්‌ඛී න සම්‌පජ්‌ජති කෙනචි තෙ’’ති.
Sakkhī na sampajjati kenaci te’’ti.
‘‘සොකස්‌ස මූලං පලිඛාය සබ්‌බං,
‘‘Sokassa mūlaṃ palikhāya sabbaṃ,
අනාගු ඣායාමි අසොචමානො;
Anāgu jhāyāmi asocamāno;
ඡෙත්‌වාන සබ්‌බං භවලොභජප්‌පං,
Chetvāna sabbaṃ bhavalobhajappaṃ,
අනාසවො ඣායාමි පමත්‌තබන්‌ධූ’’ති.
Anāsavo jhāyāmi pamattabandhū’’ti.
‘‘යං වදන්‌ති මම යිදන්‌ති, යෙ වදන්‌ති මමන්‌ති ච;
‘‘Yaṃ vadanti mama yidanti, ye vadanti mamanti ca;
එත්‌ථ චෙ තෙ මනො අත්‌ථි, න මෙ සමණ මොක්‌ඛසී’’ති.
Ettha ce te mano atthi, na me samaṇa mokkhasī’’ti.
‘‘යං වදන්‌ති න තං මය්‌හං, යෙ වදන්‌ති න තෙ අහං;
‘‘Yaṃ vadanti na taṃ mayhaṃ, ye vadanti na te ahaṃ;
එවං පාපිම ජානාහි, න මෙ මග්‌ගම්‌පි දක්‌ඛසී’’ති.
Evaṃ pāpima jānāhi, na me maggampi dakkhasī’’ti.
‘‘සචෙ මග්‌ගං අනුබුද්‌ධං, ඛෙමං අමතගාමිනං;
‘‘Sace maggaṃ anubuddhaṃ, khemaṃ amatagāminaṃ;
අපෙහි ගච්‌ඡ ත්‌වමෙවෙකො, කිමඤ්‌ඤමනුසාසසී’’ති.
Apehi gaccha tvameveko, kimaññamanusāsasī’’ti.
‘‘අමච්‌චුධෙය්‍යං පුච්‌ඡන්‌ති, යෙ ජනා පාරගාමිනො;
‘‘Amaccudheyyaṃ pucchanti, ye janā pāragāmino;
තෙසාහං පුට්‌ඨො අක්‌ඛාමි, යං සච්‌චං තං නිරූපධි’’න්‌ති.
Tesāhaṃ puṭṭho akkhāmi, yaṃ saccaṃ taṃ nirūpadhi’’nti.
‘‘සෙය්‍යථාපි, භන්‌තෙ, ගාමස්‌ස වා නිගමස්‌ස වා අවිදූරෙ පොක්‌ඛරණී. තත්‍රස්‌ස කක්‌කටකො. අථ ඛො, භන්‌තෙ, සම්‌බහුලා කුමාරකා වා කුමාරිකායො වා තම්‌හා ගාමා වා නිගමා වා නික්‌ඛමිත්‌වා යෙන සා පොක්‌ඛරණී තෙනුපසඞ්‌කමෙය්‍යුං; උපසඞ්‌කමිත්‌වා තං කක්‌කටකං උදකා උද්‌ධරිත්‌වා ථලෙ පතිට්‌ඨපෙය්‍යුං. යං යදෙව හි සො, භන්‌තෙ, කක්‌කටකො අළං අභිනින්‌නාමෙය්‍ය තං තදෙව තෙ කුමාරකා වා කුමාරිකායො වා කට්‌ඨෙන වා කථලාය වා සඤ්‌ඡින්‌දෙය්‍යුං සම්‌භඤ්‌ජෙය්‍යුං සම්‌පලිභඤ්‌ජෙය්‍යුං. එවඤ්‌හි සො, භන්‌තෙ, කක්‌කටකො සබ්‌බෙහි අළෙහි සඤ්‌ඡින්‌නෙහි සම්‌භග්‌ගෙහි සම්‌පලිභග්‌ගෙහි අභබ්‌බො තං පොක්‌ඛරණිං ඔතරිතුං. එවමෙව ඛො, භන්‌තෙ, යානි කානිචි විසූකායිකානි 1 විසෙවිතානි විප්‌ඵන්‌දිතානි, සබ්‌බානි තානි 2 භගවතා සඤ්‌ඡින්‌නානි සම්‌භග්‌ගානි සම්‌පලිභග්‌ගානි. අභබ්‌බො දානාහං, භන්‌තෙ, පුන භගවන්‌තං උපසඞ්‌කමිතුං යදිදං ඔතාරාපෙක්‌ඛො’’ති. අථ ඛො මාරො පාපිමා භගවතො සන්‌තිකෙ ඉමා නිබ්‌බෙජනීයා ගාථායො අභාසි –
‘‘Seyyathāpi, bhante, gāmassa vā nigamassa vā avidūre pokkharaṇī. Tatrassa kakkaṭako. Atha kho, bhante, sambahulā kumārakā vā kumārikāyo vā tamhā gāmā vā nigamā vā nikkhamitvā yena sā pokkharaṇī tenupasaṅkameyyuṃ; upasaṅkamitvā taṃ kakkaṭakaṃ udakā uddharitvā thale patiṭṭhapeyyuṃ. Yaṃ yadeva hi so, bhante, kakkaṭako aḷaṃ abhininnāmeyya taṃ tadeva te kumārakā vā kumārikāyo vā kaṭṭhena vā kathalāya vā sañchindeyyuṃ sambhañjeyyuṃ sampalibhañjeyyuṃ. Evañhi so, bhante, kakkaṭako sabbehi aḷehi sañchinnehi sambhaggehi sampalibhaggehi abhabbo taṃ pokkharaṇiṃ otarituṃ. Evameva kho, bhante, yāni kānici visūkāyikāni 3 visevitāni vipphanditāni, sabbāni tāni 4 bhagavatā sañchinnāni sambhaggāni sampalibhaggāni. Abhabbo dānāhaṃ, bhante, puna bhagavantaṃ upasaṅkamituṃ yadidaṃ otārāpekkho’’ti. Atha kho māro pāpimā bhagavato santike imā nibbejanīyā gāthāyo abhāsi –
‘‘මෙදවණ්‌ණඤ්‌ච පාසාණං, වායසො අනුපරියගා;
‘‘Medavaṇṇañca pāsāṇaṃ, vāyaso anupariyagā;
අපෙත්‌ථ මුදුං වින්‌දෙම, අපි අස්‌සාදනා සියා.
Apettha muduṃ vindema, api assādanā siyā.
‘‘අලද්‌ධා තත්‌ථ අස්‌සාදං, වායසෙත්‌තො අපක්‌කමෙ;
‘‘Aladdhā tattha assādaṃ, vāyasetto apakkame;
කාකොව සෙලමාසජ්‌ජ, නිබ්‌බිජ්‌ජාපෙම ගොතමා’’ති.
Kākova selamāsajja, nibbijjāpema gotamā’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. සත්‌තවස්‌සානුබන්‌ධසුත්‌තවණ්‌ණනා • 4. Sattavassānubandhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. සත්‌තවස්‌සානුබන්‌ධසුත්‌තවණ්‌ණනා • 4. Sattavassānubandhasuttavaṇṇanā
