| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. ஸத்தவஸ்ஸானுப³ந்த⁴ஸுத்தவண்ணனா
4. Sattavassānubandhasuttavaṇṇanā
160. சதுத்தே² ஸத்த வஸ்ஸானீதி புரே போ³தி⁴யா ச²ப்³ப³ஸ்ஸானி, போ³தி⁴தோ பச்சா² ஏகங் வஸ்ஸங். ஓதாராபெக்கோ²தி ‘‘ஸசே ஸமணஸ்ஸ கோ³தமஸ்ஸ காயத்³வாராதீ³ஸு கிஞ்சிதே³வ அனநுச்ச²விகங் பஸ்ஸாமி, சோதெ³ஸ்ஸாமி ந’’ந்தி ஏவங் விவரங் அபெக்க²மானோ. அலப⁴மானோதி ரத²ரேணுமத்தம்பி அவக்க²லிதங் அபஸ்ஸந்தோ. தேனாஹ –
160. Catutthe satta vassānīti pure bodhiyā chabbassāni, bodhito pacchā ekaṃ vassaṃ. Otārāpekkhoti ‘‘sace samaṇassa gotamassa kāyadvārādīsu kiñcideva ananucchavikaṃ passāmi, codessāmi na’’nti evaṃ vivaraṃ apekkhamāno. Alabhamānoti rathareṇumattampi avakkhalitaṃ apassanto. Tenāha –
‘‘ஸத்த வஸ்ஸானி ப⁴க³வந்தங், அனுப³ந்தி⁴ங் பதா³பத³ங்;
‘‘Satta vassāni bhagavantaṃ, anubandhiṃ padāpadaṃ;
ஓதாரங் நாதி⁴க³ச்சி²ஸ்ஸங், ஸம்பு³த்³த⁴ஸ்ஸ ஸதீமதோ’’தி. (ஸு॰ நி॰ 448);
Otāraṃ nādhigacchissaṃ, sambuddhassa satīmato’’ti. (su. ni. 448);
உபஸங்கமீதி ‘‘அஜ்ஜ ஸமணங் கோ³தமங் அதிக³ஹெத்வா க³மிஸ்ஸாமீ’’தி உபஸங்கமி.
Upasaṅkamīti ‘‘ajja samaṇaṃ gotamaṃ atigahetvā gamissāmī’’ti upasaṅkami.
ஜா²யஸீதி ஜா²யந்தோ அவஜ்ஜா²யந்தோ நிஸின்னோஸீதி வத³தி. வித்தங் நு ஜீனோதி ஸதங் வா ஸஹஸ்ஸங் வா ஜிதோஸி நு. ஆகு³ங் நு கா³மஸ்மிந்தி, கிங் நு அந்தோகா³மே பமாணாதிக்கந்தங் பாபகம்மங் அகாஸி, யேன அஞ்ஞேஸங் முக²ங் ஓலோகேதுங் அவிஸஹந்தோ அரஞ்ஞே விசரஸி? ஸக்கி²ந்தி மித்தபா⁴வங்.
Jhāyasīti jhāyanto avajjhāyanto nisinnosīti vadati. Vittaṃ nu jīnoti sataṃ vā sahassaṃ vā jitosi nu. Āguṃ nu gāmasminti, kiṃ nu antogāme pamāṇātikkantaṃ pāpakammaṃ akāsi, yena aññesaṃ mukhaṃ oloketuṃ avisahanto araññe vicarasi? Sakkhinti mittabhāvaṃ.
பலிகா²யாதி க²ணித்வா. ப⁴வலோப⁴ஜப்பந்தி ப⁴வலோப⁴ஸங்கா²தங் தண்ஹங். அனாஸவோ ஜா²யாமீதி நித்தண்ஹோ ஹுத்வா த்³வீஹி ஜா²னேஹி ஜா²யாமி. பமத்தப³ந்தூ⁴தி மாரங் ஆலபதி. ஸோ ஹி யேகேசி லோகே பமத்தா, தேஸங் ப³ந்து⁴.
Palikhāyāti khaṇitvā. Bhavalobhajappanti bhavalobhasaṅkhātaṃ taṇhaṃ. Anāsavo jhāyāmīti nittaṇho hutvā dvīhi jhānehi jhāyāmi. Pamattabandhūti māraṃ ālapati. So hi yekeci loke pamattā, tesaṃ bandhu.
ஸசே மக்³க³ங் அனுபு³த்³த⁴ந்தி யதி³ தயா மக்³கோ³ அனுபு³த்³தோ⁴. அபேஹீதி அபயாஹி. அமச்சுதெ⁴ய்யந்தி மச்சுனோ அனோகாஸபூ⁴தங் நிப்³பா³னங். பாரகா³மினோதி யேபி பாரங் க³தா, தேபி பாரகா³மினோ. யேபி பாரங் க³ச்சி²ஸ்ஸந்தி, யேபி பாரங் க³ந்துகாமா, தேபி பாரகா³மினோ.
Sace maggaṃ anubuddhanti yadi tayā maggo anubuddho. Apehīti apayāhi. Amaccudheyyanti maccuno anokāsabhūtaṃ nibbānaṃ. Pāragāminoti yepi pāraṃ gatā, tepi pāragāmino. Yepi pāraṃ gacchissanti, yepi pāraṃ gantukāmā, tepi pāragāmino.
விஸூகாயிகானீதி மாரவிஸூகானி. விஸேவிதானீதி விருத்³த⁴ஸேவிதானி, ‘‘அப்பமாயு மனுஸ்ஸானங், அச்சயந்தி அஹோரத்தா’’தி வுத்தே. ‘‘தீ³க⁴மாயு மனுஸ்ஸானங், நாச்சயந்தி அஹோரத்தா’’திஆதீ³னி படிலோமகாரணானி. விப்ப²ந்தி³தானீதி, தம்ஹி தம்ஹி காலே ஹத்தி²ராஜவண்ணஸப்பவண்ணாதி³த³ஸ்ஸனானி. நிப்³பே³ஜனீயாதி உக்கண்ட²னீயா.
Visūkāyikānīti māravisūkāni. Visevitānīti viruddhasevitāni, ‘‘appamāyu manussānaṃ, accayanti ahorattā’’ti vutte. ‘‘Dīghamāyu manussānaṃ, nāccayanti ahorattā’’tiādīni paṭilomakāraṇāni. Vipphanditānīti, tamhi tamhi kāle hatthirājavaṇṇasappavaṇṇādidassanāni. Nibbejanīyāti ukkaṇṭhanīyā.
அனுபரியகா³திஆதீ³ஸு கிஞ்சாபி அதீதவசனங் கதங், அத்தோ² பன விகப்பவஸேன வேதி³தப்³போ³. இத³ங் வுத்தங் ஹோதி – யதா² மேத³வண்ணங் பாஸாணங் வாயஸோ தி³ஸ்வா – ‘‘அபி நாமெத்த² முது³ங் விந்தெ³ய்யாம, அபி அஸ்ஸாதோ³ ஸியா’’தி அனுபரிக³ச்செ²ய்ய, அத² ஸோ தத்த² அஸ்ஸாத³ங் அலபி⁴த்வாவ வாயஸோ எத்தோ அபக்கமெய்ய, ததோ பாஸாணா அபக³ச்செ²ய்ய, ஏவங் மயம்பி ஸோ காகோ விய ஸேலங் கோ³தமங் ஆஸஜ்ஜ அஸ்ஸாத³ங் வா ஸந்த²வங் வா அலப⁴ந்தா கோ³தமா நிப்³பி³ந்தி³த்வா அபக³ச்சா²ம. சதுத்த²ங்.
Anupariyagātiādīsu kiñcāpi atītavacanaṃ kataṃ, attho pana vikappavasena veditabbo. Idaṃ vuttaṃ hoti – yathā medavaṇṇaṃ pāsāṇaṃ vāyaso disvā – ‘‘api nāmettha muduṃ vindeyyāma, api assādo siyā’’ti anuparigaccheyya, atha so tattha assādaṃ alabhitvāva vāyaso etto apakkameyya, tato pāsāṇā apagaccheyya, evaṃ mayampi so kāko viya selaṃ gotamaṃ āsajja assādaṃ vā santhavaṃ vā alabhantā gotamā nibbinditvā apagacchāma. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. ஸத்தவஸ்ஸானுப³ந்த⁴ஸுத்தங் • 4. Sattavassānubandhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. ஸத்தவஸ்ஸானுப³ந்த⁴ஸுத்தவண்ணனா • 4. Sattavassānubandhasuttavaṇṇanā
