| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৪. সত্তৰস্সানুবন্ধসুত্তৰণ্ণনা
4. Sattavassānubandhasuttavaṇṇanā
১৬০. চতুত্থে সত্ত ৰস্সানীতি পুরে বোধিযা ছব্বস্সানি, বোধিতো পচ্ছা একং ৰস্সং। ওতারাপেক্খোতি ‘‘সচে সমণস্স গোতমস্স কাযদ্ৰারাদীসু কিঞ্চিদেৰ অননুচ্ছৰিকং পস্সামি, চোদেস্সামি ন’’ন্তি এৰং ৰিৰরং অপেক্খমানো। অলভমানোতি রথরেণুমত্তম্পি অৰক্খলিতং অপস্সন্তো। তেনাহ –
160. Catutthe satta vassānīti pure bodhiyā chabbassāni, bodhito pacchā ekaṃ vassaṃ. Otārāpekkhoti ‘‘sace samaṇassa gotamassa kāyadvārādīsu kiñcideva ananucchavikaṃ passāmi, codessāmi na’’nti evaṃ vivaraṃ apekkhamāno. Alabhamānoti rathareṇumattampi avakkhalitaṃ apassanto. Tenāha –
‘‘সত্ত ৰস্সানি ভগৰন্তং, অনুবন্ধিং পদাপদং।
‘‘Satta vassāni bhagavantaṃ, anubandhiṃ padāpadaṃ;
ওতারং নাধিগচ্ছিস্সং, সম্বুদ্ধস্স সতীমতো’’তি॥ (সু॰ নি॰ ৪৪৮)।
Otāraṃ nādhigacchissaṃ, sambuddhassa satīmato’’ti. (su. ni. 448);
উপসঙ্কমীতি ‘‘অজ্জ সমণং গোতমং অতিগহেত্ৰা গমিস্সামী’’তি উপসঙ্কমি।
Upasaṅkamīti ‘‘ajja samaṇaṃ gotamaṃ atigahetvā gamissāmī’’ti upasaṅkami.
ঝাযসীতি ঝাযন্তো অৰজ্ঝাযন্তো নিসিন্নোসীতি ৰদতি। ৰিত্তং নু জীনোতি সতং ৰা সহস্সং ৰা জিতোসি নু। আগুং নু গামস্মিন্তি, কিং নু অন্তোগামে পমাণাতিক্কন্তং পাপকম্মং অকাসি, যেন অঞ্ঞেসং মুখং ওলোকেতুং অৰিসহন্তো অরঞ্ঞে ৰিচরসি? সক্খিন্তি মিত্তভাৰং।
Jhāyasīti jhāyanto avajjhāyanto nisinnosīti vadati. Vittaṃ nu jīnoti sataṃ vā sahassaṃ vā jitosi nu. Āguṃ nu gāmasminti, kiṃ nu antogāme pamāṇātikkantaṃ pāpakammaṃ akāsi, yena aññesaṃ mukhaṃ oloketuṃ avisahanto araññe vicarasi? Sakkhinti mittabhāvaṃ.
পলিখাযাতি খণিত্ৰা। ভৰলোভজপ্পন্তি ভৰলোভসঙ্খাতং তণ্হং। অনাসৰো ঝাযামীতি নিত্তণ্হো হুত্ৰা দ্ৰীহি ঝানেহি ঝাযামি। পমত্তবন্ধূতি মারং আলপতি। সো হি যেকেচি লোকে পমত্তা, তেসং বন্ধু।
Palikhāyāti khaṇitvā. Bhavalobhajappanti bhavalobhasaṅkhātaṃ taṇhaṃ. Anāsavo jhāyāmīti nittaṇho hutvā dvīhi jhānehi jhāyāmi. Pamattabandhūti māraṃ ālapati. So hi yekeci loke pamattā, tesaṃ bandhu.
সচে মগ্গং অনুবুদ্ধন্তি যদি তযা মগ্গো অনুবুদ্ধো। অপেহীতি অপযাহি। অমচ্চুধেয্যন্তি মচ্চুনো অনোকাসভূতং নিব্বানং। পারগামিনোতি যেপি পারং গতা, তেপি পারগামিনো। যেপি পারং গচ্ছিস্সন্তি, যেপি পারং গন্তুকামা, তেপি পারগামিনো।
Sace maggaṃ anubuddhanti yadi tayā maggo anubuddho. Apehīti apayāhi. Amaccudheyyanti maccuno anokāsabhūtaṃ nibbānaṃ. Pāragāminoti yepi pāraṃ gatā, tepi pāragāmino. Yepi pāraṃ gacchissanti, yepi pāraṃ gantukāmā, tepi pāragāmino.
ৰিসূকাযিকানীতি মারৰিসূকানি। ৰিসেৰিতানীতি ৰিরুদ্ধসেৰিতানি, ‘‘অপ্পমাযু মনুস্সানং, অচ্চযন্তি অহোরত্তা’’তি ৰুত্তে। ‘‘দীঘমাযু মনুস্সানং, নাচ্চযন্তি অহোরত্তা’’তিআদীনি পটিলোমকারণানি। ৰিপ্ফন্দিতানীতি, তম্হি তম্হি কালে হত্থিরাজৰণ্ণসপ্পৰণ্ণাদিদস্সনানি। নিব্বেজনীযাতি উক্কণ্ঠনীযা।
Visūkāyikānīti māravisūkāni. Visevitānīti viruddhasevitāni, ‘‘appamāyu manussānaṃ, accayanti ahorattā’’ti vutte. ‘‘Dīghamāyu manussānaṃ, nāccayanti ahorattā’’tiādīni paṭilomakāraṇāni. Vipphanditānīti, tamhi tamhi kāle hatthirājavaṇṇasappavaṇṇādidassanāni. Nibbejanīyāti ukkaṇṭhanīyā.
অনুপরিযগাতিআদীসু কিঞ্চাপি অতীতৰচনং কতং, অত্থো পন ৰিকপ্পৰসেন ৰেদিতব্বো। ইদং ৰুত্তং হোতি – যথা মেদৰণ্ণং পাসাণং ৰাযসো দিস্ৰা – ‘‘অপি নামেত্থ মুদুং ৰিন্দেয্যাম, অপি অস্সাদো সিযা’’তি অনুপরিগচ্ছেয্য, অথ সো তত্থ অস্সাদং অলভিত্ৰাৰ ৰাযসো এত্তো অপক্কমেয্য, ততো পাসাণা অপগচ্ছেয্য, এৰং মযম্পি সো কাকো ৰিয সেলং গোতমং আসজ্জ অস্সাদং ৰা সন্থৰং ৰা অলভন্তা গোতমা নিব্বিন্দিত্ৰা অপগচ্ছাম। চতুত্থং।
Anupariyagātiādīsu kiñcāpi atītavacanaṃ kataṃ, attho pana vikappavasena veditabbo. Idaṃ vuttaṃ hoti – yathā medavaṇṇaṃ pāsāṇaṃ vāyaso disvā – ‘‘api nāmettha muduṃ vindeyyāma, api assādo siyā’’ti anuparigaccheyya, atha so tattha assādaṃ alabhitvāva vāyaso etto apakkameyya, tato pāsāṇā apagaccheyya, evaṃ mayampi so kāko viya selaṃ gotamaṃ āsajja assādaṃ vā santhavaṃ vā alabhantā gotamā nibbinditvā apagacchāma. Catutthaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. সত্তৰস্সানুবন্ধসুত্তং • 4. Sattavassānubandhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. সত্তৰস্সানুবন্ধসুত্তৰণ্ণনা • 4. Sattavassānubandhasuttavaṇṇanā
