| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. সত্তৰস্সানুবন্ধসুত্তৰণ্ণনা
4. Sattavassānubandhasuttavaṇṇanā
১৬০. যস্মা কপিলৰত্থুতো নিক্খন্তকালতো পট্ঠায মারো ওতারাপেক্খো লোকনাথং অনুবন্ধিতুং আরদ্ধো, তস্মা ৰুত্তং ‘‘পুরে বোধিযা ছব্বস্সানী’’তি। অতিগহেত্ৰাতি অনুগন্ত্ৰা তস্স যথারুচি পটিপত্তিং অনুৰত্তো ৰিয হুত্ৰা।
160. Yasmā kapilavatthuto nikkhantakālato paṭṭhāya māro otārāpekkho lokanāthaṃ anubandhituṃ āraddho, tasmā vuttaṃ ‘‘pure bodhiyā chabbassānī’’ti. Atigahetvāti anugantvā tassa yathāruci paṭipattiṃ anuvatto viya hutvā.
অৰজ্ঝাযন্তোতি পজ্ঝাযন্তো। জিতো ৰিত্তপরাজিতো অসি নু। পমাণাতিক্কন্তন্তি গরুতরং।
Avajjhāyantoti pajjhāyanto. Jito vittaparājito asi nu. Pamāṇātikkantanti garutaraṃ.
খনিত্ৰা উম্মূলেত্ৰা। কামাসৰাদীনি পজহন্তো অনাসৰো।
Khanitvā ummūletvā. Kāmāsavādīni pajahanto anāsavo.
পেহীতি অপেহি। পারগামিনোতি পারঙ্গমনসীলা। তেকালিকো অযং গামি-সদ্দোতি আহ ‘‘যেপী’’তিআদি।
Pehīti apehi. Pāragāminoti pāraṅgamanasīlā. Tekāliko ayaṃ gāmi-saddoti āha ‘‘yepī’’tiādi.
মারৰিসূকানীতি মারকণ্টকানি কণ্টকসদিসানি মারস্স দুরাচারানি। ৰিরুদ্ধসেৰিতানি ৰিরোধৰসেন তাসংযেৰ ৰেৰচনানি। তানি সরূপতো দস্সেতুং ‘‘অপ্পমাযূ’’তিআদি ৰুত্তং। নিব্বেজনীযাতি নিব্বেদদাযিকা। উক্কণ্ঠনীযাতি উক্কণ্ঠৰহা।
Māravisūkānīti mārakaṇṭakāni kaṇṭakasadisāni mārassa durācārāni. Viruddhasevitāni virodhavasena tāsaṃyeva vevacanāni. Tāni sarūpato dassetuṃ ‘‘appamāyū’’tiādi vuttaṃ. Nibbejanīyāti nibbedadāyikā. Ukkaṇṭhanīyāti ukkaṇṭhavahā.
ৰিকপ্পৰসেন ৰেদিতব্বো ওপম্মপরিকপ্পৰিসযত্তা তস্স কিরিযাপদস্স। তেনাহ ‘‘অনুপরিগচ্ছেয্যা’’তি। এত্থাতি এতস্মিং মেদৰণ্ণৰত্থুস্মিং। মুদুন্তি মুদুমধুরসং ৰিন্দেয্যাম পটিলভেয্যাম। অস্সাদোতি অস্সাদেতব্বো।
Vikappavasenaveditabbo opammaparikappavisayattā tassa kiriyāpadassa. Tenāha ‘‘anuparigaccheyyā’’ti. Etthāti etasmiṃ medavaṇṇavatthusmiṃ. Mudunti mudumadhurasaṃ vindeyyāma paṭilabheyyāma. Assādoti assādetabbo.
সত্তৰস্সানুবন্ধসুত্তৰণ্ণনা নিট্ঠিতা।
Sattavassānubandhasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. সত্তৰস্সানুবন্ধসুত্তং • 4. Sattavassānubandhasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. সত্তৰস্সানুবন্ধসুত্তৰণ্ণনা • 4. Sattavassānubandhasuttavaṇṇanā
