| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៤. សត្តវស្សានុពន្ធសុត្តវណ្ណនា
4. Sattavassānubandhasuttavaṇṇanā
១៦០. យស្មា កបិលវត្ថុតោ និក្ខន្តកាលតោ បដ្ឋាយ មារោ ឱតារាបេក្ខោ លោកនាថំ អនុពន្ធិតុំ អារទ្ធោ, តស្មា វុត្តំ ‘‘បុរេ ពោធិយា ឆព្ពស្សានី’’តិ។ អតិគហេត្វាតិ អនុគន្ត្វា តស្ស យថារុចិ បដិបត្តិំ អនុវត្តោ វិយ ហុត្វា។
160. Yasmā kapilavatthuto nikkhantakālato paṭṭhāya māro otārāpekkho lokanāthaṃ anubandhituṃ āraddho, tasmā vuttaṃ ‘‘pure bodhiyā chabbassānī’’ti. Atigahetvāti anugantvā tassa yathāruci paṭipattiṃ anuvatto viya hutvā.
អវជ្ឈាយន្តោតិ បជ្ឈាយន្តោ។ ជិតោ វិត្តបរាជិតោ អសិ នុ។ បមាណាតិក្កន្តន្តិ គរុតរំ។
Avajjhāyantoti pajjhāyanto. Jito vittaparājito asi nu. Pamāṇātikkantanti garutaraṃ.
ខនិត្វា ឧម្មូលេត្វា។ កាមាសវាទីនិ បជហន្តោ អនាសវោ។
Khanitvā ummūletvā. Kāmāsavādīni pajahanto anāsavo.
បេហីតិ អបេហិ។ បារគាមិនោតិ បារង្គមនសីលា។ តេកាលិកោ អយំ គាមិ-សទ្ទោតិ អាហ ‘‘យេបី’’តិអាទិ។
Pehīti apehi. Pāragāminoti pāraṅgamanasīlā. Tekāliko ayaṃ gāmi-saddoti āha ‘‘yepī’’tiādi.
មារវិសូកានីតិ មារកណ្ដកានិ កណ្ដកសទិសានិ មារស្ស ទុរាចារានិ។ វិរុទ្ធសេវិតានិ វិរោធវសេន តាសំយេវ វេវចនានិ។ តានិ សរូបតោ ទស្សេតុំ ‘‘អប្បមាយូ’’តិអាទិ វុត្តំ។ និព្ពេជនីយាតិ និព្ពេទទាយិកា។ ឧក្កណ្ឋនីយាតិ ឧក្កណ្ឋវហា។
Māravisūkānīti mārakaṇṭakāni kaṇṭakasadisāni mārassa durācārāni. Viruddhasevitāni virodhavasena tāsaṃyeva vevacanāni. Tāni sarūpato dassetuṃ ‘‘appamāyū’’tiādi vuttaṃ. Nibbejanīyāti nibbedadāyikā. Ukkaṇṭhanīyāti ukkaṇṭhavahā.
វិកប្បវសេន វេទិតព្ពោ ឱបម្មបរិកប្បវិសយត្តា តស្ស កិរិយាបទស្ស។ តេនាហ ‘‘អនុបរិគច្ឆេយ្យា’’តិ។ ឯត្ថាតិ ឯតស្មិំ មេទវណ្ណវត្ថុស្មិំ។ មុទុន្តិ មុទុមធុរសំ វិន្ទេយ្យាម បដិលភេយ្យាម។ អស្សាទោតិ អស្សាទេតព្ពោ។
Vikappavasenaveditabbo opammaparikappavisayattā tassa kiriyāpadassa. Tenāha ‘‘anuparigaccheyyā’’ti. Etthāti etasmiṃ medavaṇṇavatthusmiṃ. Mudunti mudumadhurasaṃ vindeyyāma paṭilabheyyāma. Assādoti assādetabbo.
សត្តវស្សានុពន្ធសុត្តវណ្ណនា និដ្ឋិតា។
Sattavassānubandhasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៤. សត្តវស្សានុពន្ធសុត្តំ • 4. Sattavassānubandhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៤. សត្តវស្សានុពន្ធសុត្តវណ្ណនា • 4. Sattavassānubandhasuttavaṇṇanā
