| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. மஹாயஞ்ஞவக்³கோ³
5. Mahāyaññavaggo
1-2. ஸத்தவிஞ்ஞாணட்டி²திஸுத்தாதி³வண்ணனா
1-2. Sattaviññāṇaṭṭhitisuttādivaṇṇanā
44-45. பஞ்சமஸ்ஸ பட²மே விஞ்ஞாணட்டி²தியோதி படிஸந்தி⁴விஞ்ஞாணஸ்ஸ டா²னானி. ஸெய்யதா²பீதி நித³ஸ்ஸனத்தே² நிபாதோ, யதா² மனுஸ்ஸாதி அத்தோ². அபரிமாணேஸு ஹி சக்கவாளேஸு அபரிமாணானங் மனுஸ்ஸானங் வண்ணஸண்டா²னாதி³வஸேன த்³வேபி ஏகஸதி³ஸா நத்தி². யேபி ஹி கத்த²சி யமகபா⁴தரோ வண்ணேன வா ஸண்டா²னேன வா ஸதி³ஸா ஹொந்தி, தேஸம்பி ஆலோகிதவிலோகிதகதி²தஹஸிதக³மனட்டா²னாதீ³ஹி விஸேஸோ ஹோதியேவ. தஸ்மா நானத்தகாயாதி வுத்தா. படிஸந்தி⁴ஸஞ்ஞா பன நேஸங் திஹேதுகாபி த்³விஹேதுகாபி அஹேதுகாபி ஹோதி. தஸ்மா நானத்தஸஞ்ஞினோதி வுத்தா. ஏகச்சே ச தே³வாதி ச² காமாவசரதே³வா. தேஸு ஹி கேஸஞ்சி காயோ நீலோ ஹோதி, கேஸஞ்சி பீதகாதி³வண்ணோ. ஸஞ்ஞா பன தேஸங் த்³விஹேதுகாபி திஹேதுகாபி ஹோதி, அஹேதுகா நத்தி². ஏகச்சே ச வினிபாதிகாதி சதுஅபாயவினிமுத்தா உத்தரமாதா யக்கி²னீ, பியங்கரமாதா, பு²ஸ்ஸமித்தா, த⁴ம்மகு³த்தாதி ஏவமாதி³கா அஞ்ஞே ச வேமானிகா பேதா. ஏதேஸஞ்ஹி பீதஓதா³தகாளமங்கு³ரச்ச²விஸாமவண்ணாதி³வஸேன சேவ கிஸ தூ²லரஸ்ஸதீ³க⁴வஸேன ச காயோ நானா ஹோதி, மனுஸ்ஸானங் விய த்³விஹேதுகதிஹேதுகஅஹேதுகவஸேன ஸஞ்ஞாபி. தே பன தே³வா விய ந மஹேஸக்கா², கபணமனுஸ்ஸா விய அப்பேஸக்கா² து³ல்லப⁴கா⁴ஸச்சா²த³னா து³க்க²பீளிதா விஹரந்தி. ஏகச்சே காளபக்கே² து³க்கி²தா ஜுண்ஹபக்கே² ஸுகி²தா ஹொந்தி. தஸ்மா ஸுக²ஸமுஸ்ஸயதோ வினிபதிதத்தா வினிபாதிகாதி வுத்தா. யே பனெத்த² திஹேதுகா, தேஸங் த⁴ம்மாபி⁴ஸமயோபி ஹோதி பியங்கரமாதாதீ³னங் விய.
44-45. Pañcamassa paṭhame viññāṇaṭṭhitiyoti paṭisandhiviññāṇassa ṭhānāni. Seyyathāpīti nidassanatthe nipāto, yathā manussāti attho. Aparimāṇesu hi cakkavāḷesu aparimāṇānaṃ manussānaṃ vaṇṇasaṇṭhānādivasena dvepi ekasadisā natthi. Yepi hi katthaci yamakabhātaro vaṇṇena vā saṇṭhānena vā sadisā honti, tesampi ālokitavilokitakathitahasitagamanaṭṭhānādīhi viseso hotiyeva. Tasmā nānattakāyāti vuttā. Paṭisandhisaññā pana nesaṃ tihetukāpi dvihetukāpi ahetukāpi hoti. Tasmā nānattasaññinoti vuttā. Ekacce ca devāti cha kāmāvacaradevā. Tesu hi kesañci kāyo nīlo hoti, kesañci pītakādivaṇṇo. Saññā pana tesaṃ dvihetukāpi tihetukāpi hoti, ahetukā natthi. Ekacceca vinipātikāti catuapāyavinimuttā uttaramātā yakkhinī, piyaṅkaramātā, phussamittā, dhammaguttāti evamādikā aññe ca vemānikā petā. Etesañhi pītaodātakāḷamaṅguracchavisāmavaṇṇādivasena ceva kisa thūlarassadīghavasena ca kāyo nānā hoti, manussānaṃ viya dvihetukatihetukaahetukavasena saññāpi. Te pana devā viya na mahesakkhā, kapaṇamanussā viya appesakkhā dullabhaghāsacchādanā dukkhapīḷitā viharanti. Ekacce kāḷapakkhe dukkhitā juṇhapakkhe sukhitā honti. Tasmā sukhasamussayato vinipatitattā vinipātikāti vuttā. Ye panettha tihetukā, tesaṃ dhammābhisamayopi hoti piyaṅkaramātādīnaṃ viya.
ப்³ரஹ்மகாயிகாதி ப்³ரஹ்மபாரிஸஜ்ஜப்³ரஹ்மபுரோஹிதமஹாப்³ரஹ்மானோ. பட²மாபி⁴னிப்³ப³த்தாதி தே ஸப்³பே³பி பட²மஜ்ஜா²னேன அபி⁴னிப்³ப³த்தா. ப்³ரஹ்மபாரிஸஜ்ஜா பன பரித்தேன அபி⁴னிப்³ப³த்தா, தேஸங் கப்பஸ்ஸ ததியோ பா⁴கோ³ ஆயுப்பமாணங். ப்³ரஹ்மபுரோஹிதா மஜ்ஜி²மேன, தேஸங் உபட்³ட⁴கப்போ ஆயுப்பமாணங், காயோ ச தேஸங் விப்பா²ரிகதரோ ஹோதி. மஹாப்³ரஹ்மானோ பணீதேன, தேஸங் கப்போ ஆயுப்பமாணங், காயோ ச பன தேஸங் அதிவிப்பா²ரிகோவ ஹோதி. இதி தே காயஸ்ஸ நானத்தா பட²மஜ்ஜா²னவஸேன ஸஞ்ஞாய ஏகத்தா நானத்தகாயா ஏகத்தஸஞ்ஞினோதி வேதி³தப்³பா³.
Brahmakāyikāti brahmapārisajjabrahmapurohitamahābrahmāno. Paṭhamābhinibbattāti te sabbepi paṭhamajjhānena abhinibbattā. Brahmapārisajjā pana parittena abhinibbattā, tesaṃ kappassa tatiyo bhāgo āyuppamāṇaṃ. Brahmapurohitā majjhimena, tesaṃ upaḍḍhakappo āyuppamāṇaṃ, kāyo ca tesaṃ vipphārikataro hoti. Mahābrahmāno paṇītena, tesaṃ kappo āyuppamāṇaṃ, kāyo ca pana tesaṃ ativipphārikova hoti. Iti te kāyassa nānattā paṭhamajjhānavasena saññāya ekattā nānattakāyā ekattasaññinoti veditabbā.
யதா² ச தே, ஏவங் சதூஸு அபாயேஸு ஸத்தா. நிரயேஸு ஹி கேஸஞ்சி கா³வுதங், கேஸஞ்சி அட்³ட⁴யோஜனங், கேஸஞ்சி யோஜனங் அத்தபா⁴வோ ஹோதி, தே³வத³த்தஸ்ஸ பன யோஜனஸதிகோ ஜாதோ. திரச்சா²னேஸுபி கேசி கு²த்³த³கா, கேசி மஹந்தா. பெத்திவிஸயேஸுபி கேசி ஸட்டி²ஹத்தா², கேசி அஸீதிஹத்தா² ஹொந்தி, கேசி ஸுவண்ணா, கேசி து³ப்³ப³ண்ணா. ததா² காலகஞ்சிகா அஸுரா. அபிசெத்த² தீ³க⁴பிட்டி²கபேதா நாம ஸட்டி²யோஜனிகாபி ஹொந்தி. ஸஞ்ஞா பன ஸப்³பே³ஸம்பி அகுஸலவிபாகாஹேதுகாவ ஹோதி. இதி ஆபாயிகாபி நானத்தகாயா ஏகத்தஸஞ்ஞினோத்வேவ ஸங்க்²யங் க³ச்ச²ந்தி.
Yathā ca te, evaṃ catūsu apāyesu sattā. Nirayesu hi kesañci gāvutaṃ, kesañci aḍḍhayojanaṃ, kesañci yojanaṃ attabhāvo hoti, devadattassa pana yojanasatiko jāto. Tiracchānesupi keci khuddakā, keci mahantā. Pettivisayesupi keci saṭṭhihatthā, keci asītihatthā honti, keci suvaṇṇā, keci dubbaṇṇā. Tathā kālakañcikā asurā. Apicettha dīghapiṭṭhikapetā nāma saṭṭhiyojanikāpi honti. Saññā pana sabbesampi akusalavipākāhetukāva hoti. Iti āpāyikāpi nānattakāyā ekattasaññinotveva saṅkhyaṃ gacchanti.
ஆப⁴ஸ்ஸராதி த³ண்ட³உக்காய அச்சி விய ஏதேஸங் ஸரீரதோ ஆபா⁴ சி²ஜ்ஜித்வா சி²ஜ்ஜித்வா பதந்தீ விய ஸரதி விஸ்ஸரதீதி ஆப⁴ஸ்ஸரா. தேஸு பஞ்சகனயே து³தியததியஜ்ஜா²னத்³வயங் பரித்தங் பா⁴வெத்வா உபபன்னா பரித்தாபா⁴ நாம ஹொந்தி, தேஸங் த்³வே கப்பா ஆயுப்பமாணங். மஜ்ஜி²மங் பா⁴வெத்வா உபபன்னா அப்பமாணாபா⁴ நாம ஹொந்தி, தேஸங் சத்தாரோ கப்பா ஆயுப்பமாணங். பணீதங் பா⁴வெத்வா உபபன்னா ஆப⁴ஸ்ஸரா நாம ஹொந்தி, தேஸங் அட்ட² கப்பா ஆயுப்பமாணங். இத⁴ பன உக்கட்ட²பரிச்சே²த³வஸேன ஸப்³பே³வ தே க³ஹிதா. ஸப்³பே³ஸஞ்ஹி தேஸங் காயோ ஏகவிப்பா²ரோவ ஹோதி, ஸஞ்ஞா பன அவிதக்கவிசாரமத்தா வா அவிதக்கஅவிசாரா வாதி நானா.
Ābhassarāti daṇḍaukkāya acci viya etesaṃ sarīrato ābhā chijjitvā chijjitvā patantī viya sarati vissaratīti ābhassarā. Tesu pañcakanaye dutiyatatiyajjhānadvayaṃ parittaṃ bhāvetvā upapannā parittābhā nāma honti, tesaṃ dve kappā āyuppamāṇaṃ. Majjhimaṃ bhāvetvā upapannā appamāṇābhā nāma honti, tesaṃ cattāro kappā āyuppamāṇaṃ. Paṇītaṃ bhāvetvā upapannā ābhassarā nāma honti, tesaṃ aṭṭha kappā āyuppamāṇaṃ. Idha pana ukkaṭṭhaparicchedavasena sabbeva te gahitā. Sabbesañhi tesaṃ kāyo ekavipphārova hoti, saññā pana avitakkavicāramattā vā avitakkaavicārā vāti nānā.
ஸுப⁴கிண்ஹாதி ஸுபே⁴ன வோகிண்ணா விகிண்ணா, ஸுபே⁴ன ஸரீரப்பபா⁴வண்ணேன ஏகக்³க⁴னாதி அத்தோ². ஏதேஸஞ்ஹி ந ஆப⁴ஸ்ஸரானங் விய சி²ஜ்ஜித்வா சி²ஜ்ஜித்வா பபா⁴ க³ச்ச²தி. பஞ்சகனயே பன பரித்தமஜ்ஜி²மபணீதஸ்ஸ சதுத்த²ஜ்ஜா²னஸ்ஸ வஸேன ஸோளஸபா³த்திங்ஸசதுஸ்ஸட்டி²கப்பாயுகா பரித்தஅப்பமாணஸுப⁴கிண்ஹா நாம ஹுத்வா நிப்³ப³த்தந்தி. இதி ஸப்³பே³பி தே ஏகத்தகாயா சேவ சதுத்த²ஜ்ஜா²னஸஞ்ஞாய ஏகத்தஸஞ்ஞினோ சாதி வேதி³தப்³பா³. வேஹப்ப²லாபி சதுத்த²விஞ்ஞாணட்டி²திமேவ ப⁴ஜந்தி. அஸஞ்ஞஸத்தா விஞ்ஞாணாபா⁴வா எத்த² ஸங்க³ஹங் ந க³ச்ச²ந்தி, ஸத்தாவாஸேஸு க³ச்ச²ந்தி.
Subhakiṇhāti subhena vokiṇṇā vikiṇṇā, subhena sarīrappabhāvaṇṇena ekagghanāti attho. Etesañhi na ābhassarānaṃ viya chijjitvā chijjitvā pabhā gacchati. Pañcakanaye pana parittamajjhimapaṇītassa catutthajjhānassa vasena soḷasabāttiṃsacatussaṭṭhikappāyukā parittaappamāṇasubhakiṇhā nāma hutvā nibbattanti. Iti sabbepi te ekattakāyā ceva catutthajjhānasaññāya ekattasaññino cāti veditabbā. Vehapphalāpi catutthaviññāṇaṭṭhitimeva bhajanti. Asaññasattā viññāṇābhāvā ettha saṅgahaṃ na gacchanti, sattāvāsesu gacchanti.
ஸுத்³தா⁴வாஸா விவட்டபக்கே² டி²தா ந ஸப்³ப³காலிகா, கப்பஸதஸஹஸ்ஸம்பி அஸங்கெ²ய்யம்பி பு³த்³த⁴ஸுஞ்ஞே லோகே ந உப்பஜ்ஜந்தி. ஸோளஸகப்பஸஹஸ்ஸஅப்³ப⁴ந்தரே பு³த்³தே⁴ஸு உப்பன்னேஸுயேவ உப்பஜ்ஜந்தி. த⁴ம்மசக்கப்பவத்திஸ்ஸ ப⁴க³வதோ க²ந்தா⁴வாரட்டா²னஸதி³ஸா ஹொந்தி. தஸ்மா நேவ விஞ்ஞாணட்டி²திங் ந ஸத்தாவாஸங் ப⁴ஜந்தி. மஹாஸீவத்தே²ரோ பன ‘‘ந கோ² பன ஸோ, ஸாரிபுத்த, ஆவாஸோ ஸுலப⁴ரூபோ, யோ மயா அனாவுத்த²புப்³போ³ இமினா தீ³கே⁴ன அத்³து⁴னா அஞ்ஞத்ர ஸுத்³தா⁴வாஸேஹி தே³வேஹீ’’தி (ம॰ நி॰ 1.160) இமினா ஸுத்தேன ஸுத்³தா⁴வாஸாபி சதுத்த²விஞ்ஞாணட்டி²திங் சதுத்த²ஸத்தாவாஸஞ்ச ப⁴ஜந்தீதி வத³தி, தங் அப்பதிபா³ஹியத்தா ஸுத்தஸ்ஸ அனுஞ்ஞாதங்.
Suddhāvāsā vivaṭṭapakkhe ṭhitā na sabbakālikā, kappasatasahassampi asaṅkheyyampi buddhasuññe loke na uppajjanti. Soḷasakappasahassaabbhantare buddhesu uppannesuyeva uppajjanti. Dhammacakkappavattissa bhagavato khandhāvāraṭṭhānasadisā honti. Tasmā neva viññāṇaṭṭhitiṃ na sattāvāsaṃ bhajanti. Mahāsīvatthero pana ‘‘na kho pana so, sāriputta, āvāso sulabharūpo, yo mayā anāvutthapubbo iminā dīghena addhunā aññatra suddhāvāsehi devehī’’ti (ma. ni. 1.160) iminā suttena suddhāvāsāpi catutthaviññāṇaṭṭhitiṃ catutthasattāvāsañca bhajantīti vadati, taṃ appatibāhiyattā suttassa anuññātaṃ.
நேவஸஞ்ஞானாஸஞ்ஞாயதனங் யதே²வ ஸஞ்ஞாய, ஏவங் விஞ்ஞாணஸ்ஸாபி ஸுகு²மத்தா நேவ விஞ்ஞாணங் நாவிஞ்ஞாணங். தஸ்மா விஞ்ஞாணட்டி²தீஸு ந வுத்தங். து³தியே ஸமாதி⁴பரிக்கா²ராதி மக்³க³ஸமாதி⁴ஸ்ஸ ஸம்பா⁴ரா.
Nevasaññānāsaññāyatanaṃ yatheva saññāya, evaṃ viññāṇassāpi sukhumattā neva viññāṇaṃ nāviññāṇaṃ. Tasmā viññāṇaṭṭhitīsu na vuttaṃ. Dutiye samādhiparikkhārāti maggasamādhissa sambhārā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. ஸத்தவிஞ்ஞாணட்டி²திஸுத்தங் • 1. Sattaviññāṇaṭṭhitisuttaṃ
2. ஸமாதி⁴பரிக்கா²ரஸுத்தங் • 2. Samādhiparikkhārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā)
1. ஸத்தவிஞ்ஞாணட்டி²திஸுத்தவண்ணனா • 1. Sattaviññāṇaṭṭhitisuttavaṇṇanā
2. ஸமாதி⁴பரிக்கா²ரஸுத்தவண்ணனா • 2. Samādhiparikkhārasuttavaṇṇanā
